2 Kɔranti 9

Bí tūtuǹ Unimbɔti nib

1 An kaa bàlifī ḿ gíti ŋmà-ni kugbɔŋu kí tùkù-ni ti nín máaǹ kí tūtuǹ Kriisitoo yab bin bí Juudeeyee puee. 2 M nyí ni-landɔkɔmɔntii pu, m tīī-ni disíndi Maseeduwaan yab cee ki tùkū-bi yii doooo jiil ní nimbi nnabiyaamu Akaayi yab bɔ́ntì, ní ni-faŋgiil tīī binib tikpil kunyannyaau. 3 An pu ní m dū nnabiyaamu nee ki túnní ni-cee, án nín làá ŋá pu disíndi din m tīī-nee, bí lafun ká yii ni máaǹ-dèe, kí lafun bɔ́ntí tikɔkɔ kii m nín tùkū-bi yii ní bɔ́ntí puee. 4 An yaa sá fám, man nì Maseeduwaan yab biba yaa táań ki bāań ní naa láá bɔ́ntì ki dóòyee, ti-mákal din ti cáá ni-puee làá kpántí-ti icoo ní, icoo gbanti làá jī kí kpáaǹ ni mun. 5 An puee ní m mēē nnabiyaamu nee bí péeǹ timbi kí dāan̄ ni-cee. Ní bɔ́ntí kí ŋá ni-niti tin ni pōoǹ kí ŋée, man dāa bàńee, an bɔ́ntì dee. Míǹ di làá dàkà yii ni tīī nì dipɔbil diba, naa tìì ki yáliŋkí.

6 Téetímaan yii un yaa búĺ fiiiyee dāa tí cēē fiii ní, ní un búĺ tikpilee mun dāa tí cēē tikpil. 7 An puee báà ŋma ń tīī min u-pɔbil fáatì ú tīīyee, án taa nín̄ sá nì kunimbaauaaa, dipabil bɔti, kun puee Unimbɔti néeń un tìì nì dipɔɔpindee ní. 8 Unimbɔti cáá mpɔn kí tīī-ni tiŋan kɔkɔ nì ti-nyɔkɔm tikpil tikpil, án nín làá ŋá pu ní nīn cáá baabadal tin kɔkɔ ni yaa lèe án lákatí ní nīn cáa tūǹ atummɔnti kɔkɔee. 9 A lì kii Unimbɔti gbɔŋku poon nín lī puee yii:

«Un ŋáań biwɔfib tinitee,

Unimbɔti làá bìin̄ u-boon

ní u-niti ń nīn pée bí ki cá^a.»

10 Unimbɔti un tìì ukpaal iwambool, ki tìì tijikaalee^b, làá tīī-ni iwambool kɔkɔ nì i-nyɔkɔm kí yàntī í lòoǹ, án nín làá ŋá pu ni-niti ń lòoǹ abimɔntee. 11 U làá yàntī ní nīn sá bigaajab kí ŋmā kí nīn ŋáań tiniti, án nín làá ŋá pu binib tikpil ń nīn jáaḿ Unimbɔti tin ni ŋáań ki tìì-bi ti cāabìń-bee pu. 12 An kaa sá Kriisitoo yab bin lóò tibee ŋmaniŋma ní ni-tundi din ni tūǹee tútúǹ, ama an yàntī binib tikpil jáaḿ Unimbɔti múlmul. 13 Ni-tundi din ni tūǹee di dàkà binib bin ní ni sée, ní ki yàntī binib nyɔ́ŋkí Unimbɔti ni nín tɔ́ Kriisitoo Bɔmɔntiiti puee, ní ki nyɔ́ŋkí Unimbɔti ni-niti tin ni ŋáań ki tìì bíǹ nì bin kɔkɔ kaa cááyee. 14 Bi làá mèè ni-pu ní ki dàkà-ni dineeŋkpaandi, kun puee Unimbɔti ŋá-ni tiŋaŋkpaandi. 15 Tí jāam̀maan Unimbɔti u-pɔ̄tam nín kaa cáá jutee pu!