2 Kɔranti 10

Pɔɔl bíi mɔ́tí u-tundi pu

1 Man Pɔɔl m-ba, m dū Kriisitoo basintil nì u-niti ki sáŋkí-ni, man un ni lì yii m yaa bí ni-cee m-nyɔkɔ pɔ̀fì, ama ní m yaa bíń ndan, m sòoǹ nì anyɔɔbun ŋin pɔ̄ɔ̄yee. 2 Tin m mèé-nee di sá, m yaa láa bāań ni-ceeyee, ní taa láa yàntī ḿ tāā kí bīikì ni-kansikin biba pu, kun puee m nyí yii m yaa láa bāań, see ḿ dāá tāā kí bīikì bin lì yii ti-bimbim nì ti-bɔti tin ti dàkèe sá nniyaaminee pu. 3 Tiŋman ti lafun sá binib, ama dikɔ̀ndi din poon ti bí nee, taa jáà nniyaamin. 4 Di sá tijanjawan tin ti cáa jáàyee kaa sá binib nín mɔ́ɔ̀ tiŋyee. Ama an sá mpɔn ŋun nyánní Unimbɔti ceeyee ní, ní ki bíiĺ ipɔn in pu binib mákée. Ní ti cáa kpìtī bi-nyimɔmbɔti, 5 nì alambil ŋin kɔkɔ bi cáá kaa là kí béé Unimbɔtee. An ní ti cáa cútí binib landɔkɔi ki gīintiń-bi bí nīn tɔ́ Kriisitoo. 6 Ti bɔ́ntì ki cí ŋyunti ŋun nimbi yaa láa dū ni-ba kɔkɔ ki tīī Unimbɔtee ní tí dāá dáaĺ bin bin kaa tɔ́ Unimbɔtee tafal.

7 Ní nīn kpèémaan tiwan ti-pú. Un yaa nyí u-ba pu yii u sá Kriisitoo yɔuee, ú béé tiŋan yii ti mun sá míǹ ní. 8 Ti-Dindaan tīī-ti mpɔn tí dūú tūtuǹ-ni nnimbɔtisan poon, an kaa sá kí ŋá-ni tikpitil. An pu ní m sòoǹ kí gúntí m-ba, ní an kaa cáá-mi icoo! 9 Kaa sá m nyàab̀ kí nīn ŋmà tigbɔn ki fàantí-ni. 10 Di sá yii binib lì yii: «Pɔɔl gbɔnti tin u ŋmèe poonee, u sòoǹ ní an pɔ̄ɔ̄ kpaŋkpam, ama ní u yaa bí ti-kansikin ki sòoǹee ní u sá uwɔfi ní u-nyɔkɔ pɔ̀fì. 11 Bin bin dàkafī an landɔkɔŋuee ń béé yii ti nín yaa bí ndan ti sòoǹ ti-gbɔŋku poon an pɔ̄ɔ̄ miŋyee, míǹ ní ti yaa pée tí bí ni-nimbiinee, ti làá tí sòoǹ.

12 Taa là kí dū ti-ba kí ŋmàntīǹ kii biba nín pàkà bi-ba min ki cáǹ bi-ba ki ŋmàntīǹ min bi lèe, an sá digbaandi ní. 13 Timbi kaa cáǹ ti-ba laakin taa bàn̄ee. Unimbɔti nín yóoǹ tí tɔ̄ kí gbèen̄ nimbi nyɔkɔmee di sá ti túń ki bàn̄ ni-cee nee. 14 Timbi kaa lákatí laakin an sá tí sòoǹ kí gbèen̄ee pu. Míǹ ní taa tí ŋūǹ kí gbèen̄ nsanni kí taa bàń-ni. Míǹ pu ní ti péé ki dɔ́miń ni-cee ki sòon̄ nì ni Kriisitoo Bɔmɔntiiti. 15 An puee taa lákatí ti-gbeennyɔkɔm pu, taa tí pàkà ti-ba biba tuuŋŋi pu. Ama ti-mákal di sá yii ni-fookiiu yaa bíi wīintée, ti nín túń ditundi ni-cee ki gbēeǹ laakiŋyee, an nìkī kí cù nyɔkɔpu tikpil, ama kí taa nín lákatí ti-kpaanyɔkɔ^a. 16 Boonee ní ti dāa ŋūǹ kí cáá Tibɔmɔntiilee kí cùnnì ntimu mun bí ni-nyɔkɔpu ubɔ kaa láá cūtèe, kí taa nín̄ fòol̄ atuun ŋin biba túń laan sá bí tɔ̄ee nyooti ki gà ti-biŋŋi.

17 An ŋmàn̄ Unimbɔti gbɔŋku poon yii: «Un pàkèe ń pàkà ti-Dindaan^b.» 18 An kaa sá a yaa bí ki pàkà a-bee di dàkà yii a lafun máaǹ kupampakau, see sii un Unimbɔti pàkèe.