Kugbɔŋu kun Pɔɔl ŋmàn̄ ki tīī
Galaati
yabee
Tibɔkilkaal
Abin alaataa ata bí màal̀ Yeesu Kriisitooyee ní Gooli yab yíkìi nín cá Asii tiŋkin ki kāl̀ niin. Bi-naantiibi ní bi yíì Galaati yab. Bi-tiŋki pìl̄ Tuurkii tiŋyil Aŋkara ní. Pɔɔl nín cōom̀ nliliitiim nì ntataatiim ki túń Unimbɔti tundee, binib gbanti biba nìn fōō ti-Dindaan ki kíí (Atuun 16.6 nì 18.23).
Ama Pɔɔl boonee, binib biba mun dɔ́miń ki māntì bi-pu. Bíǹ nìn dàkà yii Kriisitoo yab bin kaa sá Juuda yabee máaǹ kí nīn ŋúb́ Juuda yab koobiliŋ, cilinjee bí yàntī bí gíí-bi dikpancandi. Pɔɔl ceeyee, mbimbim gbanti jáà nì Yeesu Kriisitoo Bɔmɔntiiti, kun puee án làá yàntī Galaati yab bin kpántì Kriisitoo yabee ń kpántí an dàkatam yumbui. Pɔɔl nìn máaǹ ki bí Eefeesi ní ki gbìl̄ yii Galaati yab fōō didàkal gbanti kí bíi ŋáań míǹ. Niinee ní u ŋmàn̄-bi kugbɔŋu nee.
Kí gíiǹní u-nabiyaamu tibɔti tin pée sá «Tibɔmɔntiilee» puee, Pɔɔl sòon̄ abɔtaa ata pu:
- U sòon̄ úǹ u-ba pu: u-bakpantil pu, nì u nì Kriisitoo nikitil din bí Jeerusaleemee nín sòon̄ ki gbìlīǹ tɔb puee (Kriisitoo yab bin kaa sá Juuda yabee kaa máaǹ kí nīn ŋúb́ Juuda yab koobiliŋ). U tí sòon̄ u nì Peetroo nín kpáká pu tibɔti gbanti pu puee. Pɔɔl sòon̄ u nín sá Kriisitoo kpambal ki cáá mpɔn ŋuŋyee pu ki lī yii ti-Dindaan u-ba di dū ditundi gbanti ki ŋúbiǹ-u (ayil 1–2).
- U yōoǹ Dipooŋkpikil jaŋŋi tikpil ki lēē taapu ki dàkā yii unil kaa kāntí difiil u nín ŋúb́ Juuda yab koobiliŋee pu, ama u kāntí difiil u nín fōō ti-Dindaan Yeesu Kriisitoo ki kííyee baba pu ní (ayil 3–4).
- U kúntì u-gbɔŋku nee ki kpáafì Galaati yab ki lī yii unil máaǹ kí nīn tɔ́ u-ba kí yàntī Unimbɔti Fam ń kpòotī-u, di sá yii Ŋfam lòoǹ unilin mbimbipɔm, cilinjee dineendi (ayil 5–6).
Kriisitoo nikitil kamaa nì Kriisitoo yɔu kamaa máaǹ kí gbìl̄ u-ni tibɔkpaafikaal gbanti ní kí nīn ŋúb́ míǹ nì dipɔbil diba, án nín làá ŋá pu ú taa kɔ́ kuyuŋu kubɔnee.