Galaati 1

Kugbɔŋu kun Pɔɔl ŋmàn̄ ki tīī

Galaati

yabee

Ijaam

1 Ti-Baa Unimbɔti nì Yeesu Kriisitoo un u nìn fīkitì ditaŋkpiilinee di lēē man Pɔɔl ḿ nīn sá dikpambal, kaa sá binib di lēē-mi, kaa tí sá unil di yì-tì ní m sá dikpambal. 2 Man nì nnabiyaamu mun kɔkɔ bí m-ceeyee di jáaḿ Kriisitoo nikitiŋ ŋin bí Galaati^a tiŋkinee. 3 Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi. 4 Yeesu di dū u-ba ki ŋá saraa ti-kpitii pu kí ŋmā kí nyāntí-ti ŋyuntikpiti ŋun poon ti bí nee. Míǹ ní Unimbɔti un sá ti-Baayee là. 5 Úǹ di máaǹ tinyool kí nīn pée cá jaanjaan! Ameeni.

Yeesu bɔti baba di sá Tibɔmɔntiil

6 M bākatì tikpil yii ni pūtì kpáàa bíi féeń Unimbɔti un dī Kriisitoo ŋanti pu ki yíiń-nee, ki póotí tibɔpɔn tiba. 7 Ama Tibɔmɔntiil tiba kaa ti bí ki kútì Yeesu Bɔmɔntiiti pu. An sá binib biba di là kí lábití ni-landɔkɔi kí cúú Kriisitoo Bɔmɔntiiti kí kpántí. 8 Un di yaa tí dɔ́mińee, - báà an yaa sá timbaaa, an yaa tí sá Unimbɔti tuuŋŋu di yaa nyánní yilpu - ki cáań-ni tibɔpɔn tin nyáń ti-ba nì Tibɔmɔntiil tin ti nìn péé péé ki sòon̄ nì nee, Unimbɔti ń ŋá udaan fám. 9 Ti pée tùkū-ni dooooyee, ní m gíti bíi bùsī-ni díǹ, yii ubɔ yaa sòon̄ nì ni tibɔti tin nyáń ti-ba nì tin tin ni nìn fōōyee, Unimbɔti ń ŋá udaan fám!

10 Tin m sòoǹ nee, m là binib ń pàkà-mi níii? Unimbɔti pampakaku ní m nyàab̀. M nyàab̀ kí fáatíǹ binib níii? M yaan nyàab̀ kí fáatíǹ binibee, maa bàà sámaan Kriisitoo tɔntɔnliu.

Min ní Pɔɔl kpántì Yeesu kpambalee

11 Nnabiyaamu, m là ní béé yii Tibɔmɔntiil tin m sòon̄ nì nee, an kaa sá unil di náań-tì, 12 kaa sá m ká-tì unil ubɔ cee, ubɔ mun kaa tí dàkā-mi-tì. An sá Yeesu Kriisitoo di nyántì-tì ki dàkā-mi.

13 Di sá yii ni gbìl̄ m nín nìn ŋáań min dooooyee. M nín nìn ŋúb́ Juuda yab marabee, m nìn sàantí Unimbɔti nikitil an gíti lákatì, ki nyàab̀ kí kúntí-dì. 14 M nìn ŋúb́ Juuda yab marab ki jítiǹ m-jutiibi tikpil man nì bin ŋmèe, ní ki nìn néeń m-naanjab koobiliŋ ki jítiǹ-bi^b.

15 Ama Unimbɔti nìn pée gāntì-mi ki yóoǹ doooo m-na poon ní ki yíiń-mi u-ŋanti pu. 16 Ŋyunti ŋun u lēēyee ní u dū u-Jipɔɔn ki dàkā-mi m béè-u, án nín làá ŋá pu ḿ sòoǹ u-Jipɔɔnee pu kí tīī bin kaa sá Juuda yabee. Niinee, maa bālifì báà ubɔ isaŋki^c. 17 Maa tí búntì Jeerusaleem kí cùú nyàab̀ bin péeǹ-mi ki kpántì akpambalee. M pée búntì Bilaalibub tiŋkin dicilpu ní. Boonee ní m dāa fātìi gítìń Damaasi tiŋkin. 18 Abin ata boonee ní m nín jɔ́m̀ Jeerusaleem kí béé Peetroo, ní ki kāl̀ u-cee iwiin saalku^d. 19 Maa ti ká Yeesu kpambal diba ki kútì see Yakubu, ti-Dindaan naal. 20 Tin tin m ŋmàn̄-nee, m ŋmàn̄-tì Unimbɔti nimbiin ní, maa mɔ́ntí.

21 Boonee ní m búntì Siirii nì Siilisii timmun. 22 Ŋyunti gbantee, Kriisitoo nikitiŋ ŋin bí Juudee tiŋkinee kaa láá béè-mi. 23 Bi pée gbìl̄ bi sòon̄ yii: «Unil un nìn sàantí-ti tikpilee ki kíǹ ki bíi sòoǹ kɔŋkɔnnee fookii Bɔmɔntiiti tin u nìn nyàab̀ kí kúntée.» 24 Ní bi kíǹ ki bíi pàkà Unimbɔti m-pu.