Galaati 2

Pɔɔl nì akpambal ŋin kíǹee

1 Dibindi diba kpá saalku boonee, ní m gítì Jeerusaleem. M nìn kpáaǹ Baarnaabaasi nì Tiiti^a. 2 An sá Unimbɔti di nìn lēē ki dàkā-mi yii ḿ cù ní m cūtì. Ní m gāntì Kriisitoo nikitil kpilib ki kàan̄ ki tùkū-bi Tibɔmɔntiil tin m sòoǹ bin kaa sá Juuda yabee kansikinee. Maa là ditundi din m túńee nì din m bíi tūǹee ń ŋá fám. 3 Ní baa páb́ Tiiti un sá Greeki, m-tɔntɔnjutee yii ú gíí dikpancandi. 4 Ama biba dɔ́miń ki ŋmālim̀ ti-kansikin ki mɔ́ntì yii bi sá ti-nabiyaamu ama ní kaa sá. Bíǹ di bàà là ú gíí. An nibee ŋá soooo ki kɔ́ ti-kansikin kí cɔ̄ŋkì kí kpèè dibatɔl din ti cáá Yeesu Kriisitoonee, kí ŋmā kí gíiǹ-ti kuyuŋun. 5 Taa pée pú-bi mpaan ŋyunti ŋubɔ poon báà fiii, Tibɔmɔntiil baamɔŋyi ń nīn bí ki tīī-ni.

6 An yaa kíǹ bin bi yíì binikpaambee^b - bi yaa sá biŋyee, man ceeyee an kaa páb́, kun puee Unimbɔti kaa gàntī binib -, binikpaambi kaa kútì tibɔti tiba Tibɔmɔntiil tin m sòoǹee pu. 7 Áli gba, bi ká yii Unimbɔti dū bin kaa sá Juuda yabee ki ŋúbiǹ-mi ḿ sòoǹ nì bi Tibɔmɔntiil, kii u nín dū bin sá Juuda yabee ki ŋúbiǹ Peetroo puee. 8 Di sá yii Unimbɔti un yāntì Peetroo kpántì Yeesu kpambal Juuda yab kansikinee di yāntì ma mun kpántì u-kpambal bin kaa sá Juuda yabee kansikin. 9 Ní Yakubu nì Peetroo nì Yoowaneesi, bin pu bi nyí yii bi sá Kriisitoo nikitil kpilibee, béè yii Unimbɔti di pú-mi an pɔŋŋu. Bi nìn tīī man nì Baarnaabaasi kuboou ki dàkā yii ti-kɔkɔ ŋá ubaanti, timbi ń cù bin kaa sá Juuda yabee cee, bíǹ ń cù Juuda yab cee. 10 Ama tin baba bi mēē-tee di sá yii tí taa súntí biwɔfib pu, tibɔti tin mun nìn pée bí m-pɔbilin m ŋáańee dee^c.

Pɔɔl wòon̄ Peetroo Antiyɔɔsi

11 Ama, ŋyunti ŋun Peetroo nìn dɔ́miń Antiyɔɔsee^d, m nìn wòon̄-u u-nimbiin, kun puee u nìn yīntì. 12 Di sá yii, kí wàatī ní binib biba ń nyānní Yakubu cee kí dāan̄ Antiyɔɔsee, u nì bin kaa sá Juuda yabee nìn kpáfí ki jīǹ tijin. Binib bin là báà ŋma ń gīfì dikpancandee bāańee, ní u fāŋkì-bi, ní ki kíǹ ki bāal̀, kaa ti là u nì bin kaa sá Juuda yabee ń kpāfì. 13 Ní Juuda yab bin kíǹee mun fōō u-biibiiu gbanti, áli gba ki téé Baarnaabaasi mun ki kɔ́ǹ biibii gbantin. 14 M nín ká yii baa ti bíi còom̄ deedee kii Tibɔmɔntiil baamɔŋyi nín sá puee, ní m lī Peetroo báà ŋma nimbiin yii: «Sii un sá Juuda yɔuee yaa kaa nóó Juuda yab bimbim, ní ki yaa fōō bin kaa sá Juuda yabee bimbimee, ba ŋá ní a là kí páb́ bin kaa sá Juuda yabee bí fōō Juuda yab bimbim?»

Fookii pu ní unil dì kí ká difiil

15 Bi màl̄ timbi ti sá Juuda yab, kaa sá biniyaŋyambi bikpitib. 16 Nì míǹ kɔkɔee, ti nyí yii ti nín fōō Yeesu Kriisitoo ki kííyee di yàntī ti kpántí deedeedambi Unimbɔti nimbiin, an kaa sá Mooyiisi marab ŋúbitam pu. Ti mun fōō Yeesu Kriisitoo ki kíí ní ki kpántì deedeedambi dimákal din ti cáá Kriisitoo puee, kaa sá marabee ŋúbitam pu. Di sá yii báà ubɔ kaa ŋūǹ kí kpántí deedeedaan^e Unimbɔti nimbiin nì marab ŋúbitam pu. 17 Ti nín nyàab̀ kí kpántí deedeedambi Kriisitoo puee, ti béè yii timbi mun sá binikpitib dee. Mimmee Kriisitoo yàntī tikpitil wīintáaa? Aayee, kpataaa! 18 Ama, m yaa fātìi máń kun m nìn gbáń ki wīīyee, m kpántì uyintil dee m-ba. 19 Di sá yii marabee yāntì m kpíì ki nyáń marab taapu, kí ŋmā kí nīn bí ki tīī Unimbɔti. Man nì Kriisitoo di kpáfì ki kpíì ndɔpuntikaa pu. 20 M nín bí nee, kaa ti sá man di bí, Kriisitoo di bí m-ni. M nín bí dimaŋfalinee, Unimbɔti Jipɔɔn ní m fōō ki kíí, úǹ di néeń-mi ki dū u-ba ki tīī man pu. 21 Maa kpèé Unimbɔti ŋanti fám. An yaa bàà sá Mooyiisi marab ŋúbitam pu ní unil dì kí kpántí deedeedaan Unimbɔti nimbiinee, mimmee Kriisitoo kpíì fám deeyaa.