Atuun 16

Tiimootee céeǹ Pɔɔl nì Siilasi

1 Pɔɔl bàn̄ Deebi nì Liistee, Kriisitoo yɔu ubɔ nìn bí niin, bi yíì-u Tiimootee. U-na nìn sá Ujuudanimpu ní ki fōō ki kíí, ní u-baa sá Ugreekija. 2 Nnabiyaamu mun nìn bí Liista nì Ikooniyumee nìn sòoǹ kijapaayee pu yii u sá unimɔnti. 3 Pɔɔl nìn là Tiimootee ń nīn bí u-ceeyee, ní u kpáaǹ-u. Juuda yab bin nìn kóò niinee puee, u nìn gíí-u dikpancandi, kun puee bi kɔkɔ nìn nyí yii Tiimootee baa sá Ugreekija. 4 Ntimu mun kɔkɔwoooo poon bi jītée, bi sòoǹ ki tùkù Kriisitoo yab yii Yeesu kpambaliŋ nì Jeerusaleem kpilib nín nìn kpáfì ki ká tiŋyee, bí nīn ŋúb́-tì tiŋan. 5 An nìn yāntì Kriisitoo nikitiŋ nìn mɔ̀tīi fòol̄ ki kíikí ní bi-wíiŋŋu gbēentí kutaa sá kamaa.

Pɔɔl ká dileedakal Troowaasi tiŋkin

6 Circir Fam nìn yíì yii Pɔɔl ń taa sòoǹ Unimbɔti bɔti Asii tiŋkinee, ní bi dūu dī Friijii nì Galaati timmun watil. 7 Bi tóob́ Miisii tiŋkee ki bàà mākafì kí cù Bitinii, ama ní Yeesu Fam tí yíì, yii bí taa dī niin. 8 Niinee ní bi dūu dī Miisii ki nín sìntī Troowaasi. 9 Kunyeeuee ní Unimbɔti ŋúbitì Pɔɔl nimbiliŋ, u ká umaseeduwaanja ubɔ yú ki gbàam̄-u yii: «Dīń Maseeduwaan kí dāá jòoń-ti!» 10 Pɔɔl ká mimmee, ní ti béè yii Unimbɔti di yíì-ti tí cùú sòoǹ u-bɔmɔntiiti Maseeduwaan. Dicilpu niinee ní ti bɔ́ntì ki nín cá.

Liidiya fōō Yeesu ki kíí Fiiliipi tiŋkin

11 Ti kɔ́ meela ki yíkì Troowaasi, ní ki túĺ dicancaal ki búntì Samootraasi. Kutaa wúntèe, ti nín cá Neeyapooliisi, 12 ní ki dāa yíkì niin ki búntì Fiiliipi, kitiŋkpaaŋŋi kin bí Maseeduwaan tiŋkin, ki bí Room yab ŋaanee. Ti nìn kāl̀ kitiŋ gbantin iwiŋkaaŋkaa iba. 13 Ŋwiŋŋuŋfikaa dalee, ti nyáń kitiŋ kpaanceetiŋu ŋkpin ŋubɔ caŋin, ki nyàab̀ laakin bi kpáfí ki mèé Unimbɔtee. Ti kāl̀ee, ní ki sòon̄ nì binimpoobi bin nìn kpáfì niinee. 14 Unimpu ubɔ nìn bí bin nìn bíi pílifée kansikin, bi yíì-u Liidiya. U nìn nyánní Tiyatiir tiŋkin ki sá unyampu ki nyáfí bisatamambi. U nìn tɔ́ Unimbɔti marab, ní ti-Dindaan pīitì u-pɔbil ki yāntì u fōō Pɔɔl bɔti. 15 Unimpuee yāntì ti fùl̄ u nì u-samaau Unimbɔti nyim. Ní u mēē-ti yii: «Ni yaa lafun nyí yii tiŋman m fōō ti-Dindaan ki kíí, ní dāan̄ kí nīn kóò m-dumpu.» Ní u páb́-ti áli ti lafun cūtì u-dumpu.

Bi cúú Pɔɔl nì Siilasi ki tɔ́ sarkan

16 Dalba ti nìn cá ŋwimmeem paaŋŋu puee, ti tú uyumbusapɔɔn ubɔ. U nìn cáá arasinii ubɔ u-ni ki wāĺ. An di nìn yì-tì u kāntí animbil tikpil ki cāabìń u-dindambi. 17 Ní usapɔɔnee kíǹ ki nóó ti nì Pɔɔl, ki tátí yii: «Bininjab nee sá yilpu Nimbɔtiu tɔntɔnliibi ní, bi bíi sòoǹ nì ni min ní ni làá dī kí ká difiilee ní!» 18 U dū iwiin tikpil ki nóó-ti ki sòoǹ an bɔti. Pɔɔl dāa gīīyee, ní ki fātìi bí arasiniiyee yii: «Nì Yeesu Kriisitoo yindi pu ní m bí yii á nyā usapɔɔn nee ni.» Ní arasiniiyee kpáàa nyáń niin dicilpu. 19 Uyumbuee dindambi ká yii Pɔɔl bíil̀ nsan ŋun pu bi dì ki kāntí animbilee, ní bi cúú u nì Siilasi ki dáaĺ-bi ki cáa cūnnì bikpilib nimbiin laakin kunipaau nìn kpáfée, 20 ní ki dāa yōoǹ-bi ki cūnnì biyidambi cee ki bí yii: «Binib nee di bíiĺ kitiŋ. Bi sá Juuda yab ní. 21 Marab bin bi dàkèe, timbi Room yab kaa ŋūǹ kí fōōyaaa, kaa ŋūǹ kí dī-bi mun.»

22 Niinee ní kunipaauee kɔkɔ dɔ́miń ki kútì bi-pu, ní bi kpáfì Pɔɔl nì Siilasi pu, ní biyidambi dáaĺ Pɔɔl nì Siilasi bɔkutiŋ ki pēetì, ní ki bí yii bí gbá-bi anaalab. 23 Bi yāntì bi tāfì-bi míǹ ki dóòyee, ní bi cáá-bi ki tɔ́ sarkan, ní ki bí yii sooja un cí bisarkadambee ń nīn kpèé-bi tiŋan. 24 Bi kpáafì soojee míǹ ki dóòyee, ní u fōō-bi ki cáa tɔ́ kusarkadii poon ki bá-bi abaa. 25 Kunyataasiiu nyɔkɔmee, Pɔɔl nì Siilasi bíi mèé ki gà ilan ki nyɔ́ŋkí Unimbɔti, ní bisarkadambi bin kíǹee bíi pílifí. 26 Kpalaa kpalaa niinee, kitiŋ cīŋkì ki kpáaǹ kusarkadii. Dicilpu niinee, mpunyɔmu kɔkɔ cúu pīitì, ní tin bi bóob́ bisarkadambee kɔkɔ cúu bútì. 27 Sooja un cí bisarkadambee nín fīntì, mpunyɔmu wāāyee, u dàkafī yii bisarkadambi kɔkɔ sáǹ ki kátì dee, ní u dáaĺ ki fɔ́fì u-tàataajiki kí bàà kpɔ̀ u-ba. 28 Niinee ní Pɔɔl téeń mpɔn yii: «Taa kpɔ̀ a-ba! Ti-kɔkɔ sèé doo.» 29 Ní soojee bí yii bí pɔ̄ń-u ŋŋmi. Niinee ní u tóotì malaa ki cūtìi gbāaǹ Pɔɔl nì Siilasi nimbiin, tiwun jìkì. 30 Ní u cáá-bi ki nyántì mmɔŋki, ní ki bālifì-bi yii: «M-dindambi, m làá ŋá mana ní kí nín ká difiil dee?» 31 Ní bi kíí-u yii: «Fōō ti-Dindaan Yeesu kí kíí, a làá ká difiil, sii nì a-dicaŋku kɔkɔ.» 32 Niinee ní bi bíi sòoǹ nì u nì bin kɔkɔ nìn bí u-dumpuee ti-Dindaan nyɔɔbundi. 33 Ní soojee yōoǹ-bi kunyeeu kukúluu gbanti poon ki fíntì bi-buuŋyi. Niin dicilpu ní bi fùl̄ u nì u-dicaŋku kɔkɔ Unimbɔti nyim. 34 Boonee ní u yōoǹ-bi ki cáa jɔ́m̀ u-dumpu yilpu, ní ki ŋá-bi tijin. Ní u nì u-dicaŋku kíǹ ki bí dipɔɔpindin bi nín fōō Unimbɔti ki kííyee pu.

35 Kutaa wúntèe ní biyidambee túnní pilisib ń dāá tùkù soojee ú líí binibee. 36 Ní soojee cūtìi tùkū Pɔɔl yii: «Biyidambi túnní yii ḿ líí-ni. Míǹ puee, nyā kí nīn cámaan nì ŋgbansɔŋfi.» 37 Ní Pɔɔl bí pilisibee yii: «Bi cúú timbi bin sá Room tindambiyaamuee, kaa sòon̄ ti-bɔti ki ká ti-bɔkpil ní ki gbáń-ti samaa kɔkɔ nimbiin ki cáań-ti ki pīiǹ kudii. Ní kɔŋkɔnnee, bi là kí báĺ soooo kí nyāntí-taaa^a? Ti yíì kpataaa, see biyidambi bi-ba ń dāan̄ kí nyāntí-ti!» 38 Pilisib cáá dinyɔɔbundee ki fātìi bàn̄ biyidambee cee. Bi nín gbìl̄ yii njapaamu gbanti sá Room tindambiyaamuee, tifaandi kɔ́-bi. 39 Ní bi dɔ́miń ki sɔ̄ŋkì bi-pɔbiliŋ ki nín nyántì-bi, ní ki gbāam̀-bi yii bí yīkì kitiŋ gbanti poon. 40 Bi nyáń kusarkadiinee, ní ki cūtìi kɔ́ Liidiya cee ki ká nnabiyaamu ki kútì-bi tibɔti, ní ki nín yíkì niin.