Atuun 17

Pɔɔl nì Siilasi bí Teesalooniiki

1 Pɔɔl nì Siilasi dī Aŋfiipooliisi pú ki cūtìi jítì Apooloonii, ní ki nín bàn̄ Teesalooniiki. Juuda yab nìn tí cáá niin kukpafidii. 2 Pɔɔl nìn kɔ́ ki bíi dàkà kii u nín pée ŋáań puee, ki ŋá nnyɔmu muta. Kinyɔŋ sá kamaa poonee, u nìn cá kukpafidiin ŋwiŋŋuŋfikaa dal ki sòoǹ nì bi, 3 ki kàaǹ ki dàkà-bi Unimbɔti gbɔŋku, laakin an nìn ŋmàn̄ yii Meesiya làá dāá kpú kí dāá fìkitī bitaŋkpiibi kansikinee. Ní u bí-bi yii: «Yeesu un bɔti m sòoǹ-ni nee, úǹ di sá Meesiya.» 4 Juuda yab kansikin biba béè mimmee, ki dū bi-ba ki nákáǹ Pɔɔl nì Siilasi. Míǹ mun ní ki kpáaǹ Greeki yab bin nìn tɔ́ Unimbɔti marabee tikpil, nì binimpugaakaabee tikpil mun nìn dū bi-ba ki nákáǹ-bi. 5 Ama Juuda yab ŋá ipoompoon ki cūtì kitiŋin ki nyàabìń anileen ŋin còom̄ adan puee ki kpáfì kunipaau, ki cáań fìkil fikil kitiŋ poon. Dinikitilee yíkìi cūtì Jasɔn dumpu kí nyàabìń Pɔɔl nì Siilasi kí cáań samaa nimbiin bí bàlifì-bi tibɔti. 6 Bi bàn̄ Jasɔn dumpu, kaa ká-bee, ní ki cúuń Jasɔn nì nnabiyaamu mubɔ ki cáań bikpilib nimbiin, ní ki tátí yii: «Bitiŋwiiliibi bin yìiǹ duulinya kɔkɔnee bāań ti-mun cee doo. 7 Jasɔn fōō-bi bi kóò u-dumpu. Binib gbanti kaa fàŋkí gɔminakpaan Seesaar marab, kun puee bi cáá yii ubɔti ubɔ gíti bí, bi yíì-u Yeesu.» 8 An bɔtee bíil̀ samaa kɔkɔ pɔbiliŋ ki kpáaǹ bikpilib, 9 ní bikpilibee gíí Jasɔn nì bin kíǹee dipɔŋkpaandi bí pà kí wàatī bí nín líí-bi.

Pɔɔl nì Siilasi bí Beeree

10 Kunyeeu mɔ́ kpalaayee, nnabiyaamu yāntì Pɔɔl nì Siilasi búntì Beeree. Bi bàn̄ niinee, ní ki nín cá Juuda yab kpafidiikun. 11 Binib gbanti nìn cáá mbimbimɔntiim ki jítiǹ Teesalooniiki yab, kun puee bíǹ nìn fōō Unimbɔti bɔti mmɔntiimin. Bi nìn kpátí Unimbɔti gbɔŋku ŋwiin kamaa ki kpèé yii tin Pɔɔl sòoǹ nì bee yaa sá ibaamɔn. 12 An pu ní bi-kansikin kunipaau, ki kpáaǹ Greeki pijab nì bininjab tikpil, nìn fōō ki kíí. 13 Ama Juuda yab bin bí Teesalooniikee nín béè yii Pɔɔl tí bíi sòoǹ Unimbɔti bɔti Beereeyee, ní bi dɔ́miń niin ki cáań fìkil fikil kitiŋin, ki yāntì samaa pɔbiliŋ bíil̀. 14 Niinee ní nnabiyaamu yāntì Pɔɔl búntì tiŋku caŋin. Siilasi nì Tiimootee, bíǹ nìn gbíntìi bí Beeree niin. 15 Bin nìn céeǹ Pɔɔlee nìn cáá-u ki cūnnì áli Ateeni ki fàtīi gítińee, ní Pɔɔl bí yii bi yaa bàn̄ee bí tùkù Siilasi nì Tiimootee yii bí kíntiń-u malaa.

Pɔɔl bí Ateeni

16 Ŋyunti ŋun Pɔɔl nìn kā Ateeni ki cí-bee, an nìn páb́-u tikpil, kun puee kitiŋ gbanti sá awaa ŋmaniŋma ní. 17 Ní u kíĺ ki bíi sòoǹ nì Juuda yab nì bin nìn tɔ́ Unimbɔti marabee kukpafidiin, ní ki sòoǹ ŋwiin kamaa kinyɔŋin, laakin binib kpáfée. 18 Anikiti ali aba nì Pɔɔl nìn bíi sòoǹ. Binib gbantee nìn nyí kugbɔŋu tiŋan. Dinikitil diba sá Eepiikuur yab, ní din kíǹee sá Stooyiiki yab. Ní biba bí yii: «Unifan nee kalin sòoǹ ba yati ní?» Ní bin kíǹee bí yii: «U máaǹ ki làá nīn sá un sòoǹ inimbɔticaan bɔtee ní.» Kun pu bi lì mimmee di sá yii Pɔɔl nìn bíi sòoǹ Yeesu nì difìkitil bɔti pu. 19 Ní bi yōoǹ Pɔɔl ki cūnnì kitiŋ yidambi nimbiin^a, ní ki bí-u yii: «A-dàkatam nee sá tibɔcan, mimmee, a ŋūǹ kí tùkù-ti tibɔcan tin a dàkà nee taapuɔɔɔ? 20 Kun puee tin ti pée gbìl̀ a sòoǹee, taa láá gbìl̄-tì ki ká dalba dalba. Míǹ puee, ti bàà là kí béé tibɔti gbanti nín sá puee.» - 21 Di sá yii Ateeni yab nì binicambi bin bí bi-kansikinee yati di nìn pée sá bí nīn kā ki pílifí tibɔcan ŋma. - 22 Ní Pɔɔl yáatìi yúl̀ biyidambi nimbiin ki bí yii: «Ateeni yab, m ká yii, binib kansikinee, nimbi di sá bin nóó inimbɔti tiŋanee. 23 Di sá yii m nín jītí ni-tiŋki nee poonee, m ká tiwan tin ní ni jáaḿee. Áli gba, m kpáàa ká nsaraafan ŋun pu bi ŋmàn̄ yii: <Unimbɔti un baa nyée.> Un ni jáaḿ kaa nyée, úǹ pu ní m dɔ́miń kí sòoǹ nì ni. 24 Úǹ di sá Unimbɔti un náań duulinya nì tin kɔkɔwoooo pée bée, ki sá yilpu nì taapu Dindaan. Waa kóò adiin ŋin binib cáá bi-ŋalii ki māāyee ni, 25 kaa nyàab̀ binib tūtuntam báà an yaa pée sá tintee. An kaa sá úǹ di tìì báà ŋma dimaŋfal nì ŋfam nì tikɔkɔɔɔ^b? 26 Úǹ di dī unibaanti pu ki nyántì anibul ki gbéeǹ kitiŋ kɔkɔ pu, ki síiǹ atimbun kɔkɔ nì ŋi-kɔŋkooŋyi nyɔkɔm^c. 27 U ŋá míǹ ki là yii bin yaa táfí ki nyàab̀ úǹ Unimbɔtee yaa táá ŋmā kí ká-u. Ama Unimbɔti gbanti kaa dátiǹ-ti, 28 di sá yii:

<Úǹ pu ní ti fòotī ki pɔ̄ɔ̄ ní ki bí.>

Kii ni-laŋgaaliibi biba nín gāā puee, yii:

29 Kii ti nín sá u-biyaamu puee, taa máaǹ kí dàkafì yii Unimbɔti sá kii awaa ŋin binib dākafì ki dū bi-ciiŋyi ki dū sindaariyab nì animbil ki mɔ́ɔ́yee, àá kii tiwaŋkpítikaalee. 30 Ama Unimbɔti kaa dū ŋyunti ŋun binib kaa nìn nyí tibee ki dūu ŋá tibɔti. Míǹ puee ní kɔŋkɔnnee u bíi tùkù ajan kɔkɔ nib yii bi-kɔkɔ máaǹ kí fá bi-kpitii. 31 Di sá yii u yóoǹ ŋwiin ŋubɔ ŋun ní u làá yàntī Yeesu ń sòoǹ duulinya kɔkɔ bɔti nì ibaamɔnee, kun puee uninja gbanti ní u fīkitì bitaŋkpiibi kansikin ki dàkā-ti kudaaŋŋu páaa yii úǹ ní u lēē.»

32 Bi nín gbìl̄ u sòon̄ bitaŋkpiibi fìkititam puee, ní biba bíi bèel̄-u, ní bin kíǹee bí yii: «Dalba á dāá gíti sòoǹ tibɔti gbanti pu.» 33 Niinee ní Pɔɔl yíkì bi-kansikin ki nyáń. 34 Nì míǹ kɔkɔee, binib biba nìn fōō ki kíí, ki dū bi-ba ki nákáǹ Pɔɔl. Uyidaan un bi yíì Deeniiyee nì unimpu ubɔ bi yíì-u Damariisi nìn bí bi-kansikin. Biba mun nìn kútì.