Atuun 18

Pɔɔl bí Kɔranti

1 Míǹ boonee, Pɔɔl dāa yíkì Ateeni ki búntì Kɔranti. 2 Niin ní u ká uninja ubɔ, bi yíì-u Akiilasi, u sá Ujuudaja ní bi màl̄-u Pɔnti. U nìn nyánní Italii ki bāań kpalaa u nì u-nimpuu Priisiil, kun puee gɔminakpaan Kloodi nìn bí yii Juuda yab kɔkɔ ń nyā Room tiŋkin. Niinee bíǹ nì Pɔɔl dūu píí tɔb kubɔɔtiiu. 3 Kii bi-kɔkɔ nín nìn tūǹ ditumbaantiil puee, ní u kɔ́ bi-cee, ní bi kpáfì ki tūǹ ditundi dicilpu. Bi-kɔkɔ nìn sá bitantiluliibi ní. 4 Ŋwiŋŋuŋfikaa dal sá kamaayee, Pɔɔl nìn pɔ̄ɔntí ní ki sòoǹ kukpafidiin kí ŋmā Juuda yab nì Greeki yab.

5 Ŋyunti ŋun Siilasi nì Tiimootee dāa nyánní Maseeduwaan ki bàn̄ee, ní Pɔɔl dū u-yuntiŋu kɔkɔ ki kíǹ ki cáa sòoǹ Unimbɔti bɔti, ki tùkù Juuda yab yii Yeesu di sá Meesiya. 6 Ama Juuda yab kaa nìn là min u sòoǹee, ní ki bíi sìí-u. Ní u gbáfì u-bɔkutiŋ^a, ki bí-bi yii: «Ni-busuu ń gítí ni-pu! Man nyáń ni-bɔtin. Kɔŋkɔnnee m làá nīn cá bin kaa sá Juuda yabee cee.» 7 U nìn yíkì niin, ki cūtìi kɔ́ uninja un nìn tɔ́ Unimbɔti marabee dumpu, bi yíì-u Titiyusi Justuusi. U-dumpu nìn nákáǹ kukpafidii. 8 Ní Kriipusi kukpafidii kpiliu nì u-dicaŋku kɔkɔ fōō ti-Dindaan ki kíí. Kɔranti yab bin nìn gbìl̄ Pɔɔl nyɔɔbundee tikpil nìn fòol̄ ki kíikí ki yàntī bi fùul̀-bi Unimbɔti nyim.

9 Kunyeeu kubɔee ti-Dindaan nyántì u-ba ki dàkā Pɔɔl ní ki bí-u yii: «Á taa fàŋkì, ama nín̄ sòoǹ kí taa gbèen̄, 10 di sá yii m bí a-cee. Ubɔ kaa làá sútiń kí pìlīń-si ní kaa nín ŋá-si tikpitil. Kun puee, m cáá binib tikpil kitiŋ nee poon.» 11 Pɔɔl nìn kāl̀ bi-kansikin dibindi diba nì dijandi, ki dàkà-bi Unimbɔti bɔti.

12 Bi kāaǹ Galiyɔn gɔmina Akaayi tiŋkinee, ní Juuda yab kpáfì ki yíkìi cúú Pɔɔl, ki cáa cūnnì Galiyɔn nimbiin, 13 ní ki bí yii: «Unil nee yàntī bi nōotí Unimbɔti mbamin, min ní marab kaa lēe.» 14 Ŋyunti ŋun Pɔɔl bàà làá wàan̄ u-nyɔkɔ kí sòoǹee, ní gɔmina Galiyɔn bí Juuda yab yii: «Juuda yab, u yaa bàà ŋá tibɔkpitil tiba àá digaŋgam ubɔ, m bàà ŋūǹ kí pīlifiǹ-ni. 15 Ama an yaa sá yii ni yaa bíi kpákà nimbi ni-ba marab pu tibɔti tiba nì ayin aba puee, m yíì, maa làá sòoǹ an bɔti. Nimbi ni-ba ń kpèè-tì!» 16 Ní u jìn̄-bi ki nyántì. 17 Ní bi-kɔkɔ cúú Sɔsteen kukpafidii kpiliu, ki bíi gbáà gɔmina nimbiin. Ní gɔmina kaa kpáàa fātìi tɔ́.

Pɔɔl gítìń Antiyɔɔsi

18 Pɔɔl gíti kāl̀ Kɔranti ki yúntì fiii. Boonee, u dāa yíkì nnabiyaamu cee ki kɔ́ meela ki búntì Siirii, u nì Priisiil nì Akiilasi. Kí wàatī ú nín yīkì Saŋkireeyee, Pɔɔl nìn kōol̀ diyibaakpandi kí dàkà yii u pōoǹ kí ŋá tiba kí tīī Unimbɔti^b. 19 Bi bàn̄ Eefeesee, ní bin nì Pɔɔl nìn nóóyee gbíntì niin. Pɔɔl nìn kɔ́ kukpafidiin ki tí bíi sòoǹ nì Juuda yab. 20 Binib gbanti nìn bíi mèé-u yii ú gíti kàl̄ iwiŋkaaŋkaa bi-cee. Ní waa kíí. 21 U làá yīkì bi-kansikinee, ní ki bí-bi yii: «Unimbɔti yaa là, m dāa gítiń ni-cee dalba.» 22 U yíkì Eefeesee, ki kɔ́ meela ki kpákatì Seesaaree, ní ki jɔ́m̀ Jeerusaleem ki jáam̀ Kriisitoo yab, ní ki fātìi sīntìń Antiyɔɔsi. 23 U kāl̀ ŋyunti ŋubɔee, ní ki yíkìi cūtì Galaati nì Friijii timmu kɔkɔn, ki tìì Kriisitoo yab kɔkɔ kunyannyaau.

Apooloosi cūtì Eefeesi nì Kɔranti

24 Ujuudaja ubɔ nìn bí, bi yíì-u Apooloosi. Bi nìn màl̄-u Aleekisandirii, ní u dɔ́miń Eefeesi. Uninja gbantee nìn sá un nyí ki sòoǹ tiŋanee, ki nyí Unimbɔti gbɔŋku mun tikpil. 25 Bi nìn dàkā-u ti-Dindaan bɔti, ní u mun cáa sòoǹ deedee ki dàkà Yeesu bɔti nì kunyannyaau. Nì míǹ kɔkɔee, Yoowaneesi nyiŋfàltam baba ní u nìn pée nyí. 26 Ní u mɔ̄tìi bíi sòoǹ ki cántí-bi kukpafidiin. Priisiil nì Akiilasi gbìl̄ mimmee ní ki yōoǹ-u ki cáa cūnnì bi-cee, ki mɔ̄tìi dàkā-u Unimbɔti saŋŋu páaa. 27 Ní Apooloosi lēē yii u làá cù Akaayi. Niinee, nnabiyaamu tīī-u kunyannyaau ki ŋmàn̄ kugbɔŋu ki tīī Kriisitoo yab bin bí lapuee, yii bí fōō-u tiŋan. U nín bàn̄ niinee, nì Unimbɔti pɔŋŋu puee, u tútúǹ bin fōō Yeesu ki kííyee tikpil. 28 Di sá yii, u nì Juuda yab nìn kpákà samaa nimbiin, ní u nìn sòoǹ ki líikí-bi, ki dàkà-bi Unimbɔti gbɔŋku poon yii Yeesu di sá Meesiya.