Atuun 19

Pɔɔl bí Eefeesi

1 Ŋyunti ŋun Apooloosi nìn bí Kɔrantee, ní Pɔɔl dīń kitiŋ kin bí ajoon puee ki bāań Eefeesi. Niin ní u ká Kriisitoo yab biba, 2 ki bālifì-bi yii: «Ni nín fōō ki kííyee, ni fōō Circir Famaaa?» Ní bi kíí-u yii: «Timbi kaa kpáàa gbìl̄ bi sòon̄ Unimbɔti Fam pu gba ní kaa nín fōō-mì.» 3 Ní Pɔɔl bālifì-bi yii: «Mimmee, dinyiŋfaldi dilal ní bi fùl̄-ni ní?» Ní bi kíí-u yii: «Yoowaneesi yal ní ti fùl̄.» 4 Niinee ní Pɔɔl kíí-bi yii: «Yoowaneesi nyiŋfàltam sá ki tīī bin fá bi-kpitiiyee ní. U nìn tùkù samaa yii bí dāá fōō un làá dāá dāan̄ úǹ boonee kí kíí: an dàkà yii Yeesu^a.» 5 Bi gbìl̄ an bɔtee, ní ki yāntì bi fùl̄-bi nnyim ti-Dindaan Yeesu yindi pu. 6 Ní Pɔɔl dū u-ŋalii ki páaǹ bi-pu. Niinee, Circir Fam kpákatìń bi-pu, ní bi kíǹ ki bíi sòoǹ isooncaan ki nàatī Unimbɔti bɔti. 7 Bininjab gbanti nìn bàn̄ binib saalaa nì bili nyɔkɔm.

8 Niinee ní Pɔɔl ŋá iŋmal ita ki kíǹ ki bí kukpafidiin ki mɔ̀tīi sòoǹ ki cántí-bi Unimbɔti Beel bɔti, án nín làá ŋá pu ní ú ŋmā-bee. 9 Ama biba nìn pɔ́ɔkì bi-pɔbiliŋ, kaa là kí fōō kí kíí, ní ki bí ki sòoǹ ki bíiĺ ti-Dindaan bɔti samaa nimbiin. Niinee ní Pɔɔl yíkì bi-cee, ki kpáaǹ Kriisitoo yab ki kākatì ní ki kíǹ ki dàkà-bi Unimbɔti bɔti ŋwiin kamaa Tranusi sukuliun. 10 U nìn dàkā-bi míǹ áli abin ali. An di yāntì Juuda yab nì Greeki yab bin nìn kóò Asii tiŋkinee kɔkɔ ŋúń ki gbìl̄ ti-Dindaan bɔti.

Sikeefa jipɔmbi bɔti

11 Unimbɔti nìn dì Pɔɔl pu ki ŋáań maamaacikpaambi. 12 Di sá yii Pɔɔl ŋaabikaaa, u-wampeeŋkaati tiba ní bi yaa nìn cáań ki gbēē bibunliibee, iween nìn càntī-bi, ní arasiniibi mun nìn nyēē bi-pu. 13 Binyɔɔdambi biba nìn bí ki sá Juuda yab, ki yìiǹ ki cāantí bin cáá arasiniibee. Bi mun nìn mākaǹ kí yíiń ti-Dindaan Yeesu yindi kí jà arasiniibi. Bi nìn lī yii: «Nì Yeesu un pu Pɔɔl sòoǹee yindi pu ní m bí yii ní nyā.» 14 Sikeefa, Juuda yab saraaŋakpiliu ubɔ jipɔmbi biluli di nìn ŋáań mimmee. 15 Ní arasiniiyee fātìi kíí-bi yii: «Man nyí Yeesu ki nyí Pɔɔl mun. Kin ni mun fáà, ni sá bilab?» 16 Niinee, uninja un pu arasinii kēe ŋàan̄ ki cìb̄-bi, ní ki pɔ́ɔkiǹ bi-kɔkɔ, ki yāntì bi sáǹ mpɔn ki nyáń dicindi gbantin nì dicancaŋgbeel nì tiweendi. 17 Juuda yab nì Greeki yab bin nìn kóò Eefeesee kɔkɔ nín gbìl̄ mimmee, ní tifaandi kɔ́-bi ní bi mɔ̀tīi tìì ti-Dindaan Yeesu yindi tinyool. 18 Bin nìn fōō ki kííyee tikpil nìn dòoń samaa nimbiin ki bìitī tin bi nìn ŋáaǹee pu. 19 Bi-kansikin tikpil bin nìn ŋáań tikpaŋkpantiilee nìn cáań bi-gbɔnti tin bi nìn cáa ŋáań tikpaŋkpantiilee ki wùn̄ ŋŋmi samaa kɔkɔ nimbiin. Bi dāa kàan̄ ki kpēēyee, an sá animbil jitɔmbi kutukub imuŋku ili nì saalaa ní bi nìn dūu dá tigbɔn gbanti^b. 20 Míǹ ní ti-Dindaan bɔti gbītì an kɔkɔ ki báaǹ inyaan mpɔn.

Fìkil fikil kɔ́ Eefeesi tiŋkin

21 Tíǹ jítèe, ní Pɔɔl bíi màkà yii u làá dī Maseeduwaan nì Akaayi pú kí cù Jeerusaleem. U lī mimmee, ní ki bí yii, u yaa bàn̄ niinee, see ú cù Room mun. 22 Ní u dū binib bili bin nìn bí u-cee ki tútúǹ-uee, Tiimootee nì Eeraasiti, ki dūu tú Maseeduwaan. Úǹ u-ba nìn gbíntìi kāl̀ Asii tiŋkin fiii. 23 Ŋyunti gbantee fìkil fikil ubɔ nìn kɔ́ní Eefeesi tiŋkin ti-Dindaan saŋŋu pu. 24 Di sá yii uninja ubɔ nìn bí, bi yíì-u Deemeetriyusi. Kijapaayee nìn cáá tikúti ki mɔ́ɔ̀ ŋwaadibiyaamu ki cáa nántíǹ diwaal Ariteemiisi diiku, ki nìn tìì u-tɔntɔnliibi bi mun ń nīn ŋáań ki kāntí ipaati tiŋan. 25 Ní u kpáfì u-tɔntɔnliibi nì bin kɔkɔ pée tūǹ an tundee, ní ki bí-bi yii: «Ti-yab, kéè, ni-kɔkɔ nyí yii ti-tundi nee di yì ti-jimaa! 26 Kéè, ni ká ki gbìl̄ Asii timmu kɔkɔn, an kaa sá Eefeesi ŋmaniŋma, Pɔɔl gbanti nín ŋúń ki dáaliń binib tikpil ki gíiǹní u-jandi pueeyaa! Pɔɔl ubaantee cáá yii inimbɔti in binib dū bi-ŋalii ki ŋée kaa sá inimbɔti. 27 An sá mbusu ní, kun puee án làá yàntī baa làá nīn gíti tɔ́ ti-tundi nee. Áli gba, baa dāa gíti dù diwaakpaandi Ariteemiisi diiku kí yíiń tiba, ní diwaakpaandi gbanti din Eefeesi tiŋki nì duulinya timmu kɔkɔ nóóyee làá dāá ŋá fám!» 28 Bi gbìl̄ an bɔtee, ní ki fōō diŋuul, ní ki kíǹ ki bíi tátí yii: «Eefeesi yab waal Ariteemiisi di sá diwaakpaandi!» 29 Niinee ní dipɔɔbiildi kɔ́ kitiŋ kɔkɔn. Ní bi cúú Maseeduwaan yab Gaayusi nì Ariistaarki bin nì Pɔɔl nìn nōotée, ki yōoǹ-bi ki cáa cūnnì laakin samaa nìn kpáfée. 30 Pɔɔl bàà nìn là kí cù niin samaa cee, ní Kriisitoo yab yíì. 31 Áli u-bɔɔbi biba bin nìn sá Eefeesi kpilibee nìn túnní u-cee, bí gbàam̀-u ú taa dāan̄ samaayee kansikin. 32 Dikpafil gbanti poonee, biba nìn tátí ki sòoǹ tiba, ní biba mun ŋúb́ tiba. An ŋá fìkil fikil, ní binib tikpil kaa kpáàa nyí kun pu ní bi baasii kpáfèe. 33 Kunipaauee kansikinee biba nìn cūtìi ká Aleekisandir, ní Juuda yab téé-u ki nyántìń ú sòoǹ. Ní Aleekisandir yōoǹ ŋŋal ki téefì-bi bí ŋmīĺ ú bàà sòoǹ nì samaa. 34 Ama bi nín dāa dūu béè yii u sá Ujuudajee, ní bi-kɔkɔ kpáfì ki tátí dicilpu áli tikúmɔn tili nyɔkɔm, ní ki cáá yii: «Eefeesi yab waal Ariteemiisi di sá diwaakpaandi!»

35 Niinee ní ukpil ubɔ yāntì samaa ŋmíl̀, ní u bí yii: «Eefeesi yab, ŋma di kaa nyí yii Eefeesi tiŋki yab di kpèé diwaakpaandi Ariteemiisi din nyánní yilpu ki lítèe nì di-diiku? 36 Ubɔ kaa ŋūǹ kí kpákáǹ an bɔti. Míǹ puee, kàl̄maan soooo, taa jìkìmaan tibɔti nee pu. 37 Binib bin ni cáań nee, baa ŋá digaŋgam ubɔ kuwaadiin, kaa ti sīī ti-waal mun. 38 Míǹ puee, Deemeetriyusi nì bitɔntɔnliibi bin bí u-ceeyee, ubɔ yaa ŋá-bi tibee, iwiin in bi sòoǹ tibɔtee bí, bibɔsoonliibi mun bí! Bí yíiń tɔb ibeeyiin kí sòoǹ. 39 An yaa tí sá bikpilib bɔtaaa, ní bí kpāfì kí kpèè, kii bi nín pée ŋáań puee. 40 Ama tin bāań díǹ neeyee làá yàntī bí lì yii ti là kí bīil̀ gɔmina. Di sá yii taa ŋūǹ kí lì kí dàkà kun pu ní ti kpáfì dooyee taapu.» 41 U lī mimmee, ní ki bí yii báà ŋma ń nīn kùǹ.