Atuun 20

Pɔɔl cūtì Maseeduwaan nì Greeki timmun

1 Fìkil fikilee jítèe, ní Pɔɔl yíiń Kriisitoo yab, ki tīī-bi kunyannyaau, ní ki kāaǹ-bi, ní ki yíkì bi-kansikin ki búntì Maseeduwaan. 2 U dī Maseeduwaan tiŋgbammun, ki sòon̄ nì Kriisitoo yab ki sáŋkí-bi tikpil ki wāatì ní ki nín bàn̄ Greeki tiŋkin. 3 U nìn ŋá niin iŋmal ita ní. Ŋyunti ŋun u bɔ́ntì ki làá kɔ́ meela kí nīn cá Siiriiyee, ní u béè yii Juuda yab sòon̄ ki bɔ́ntì nsàmbiyaamu mun pu bi làá dī kí kpɔ̀-uee. Niinee ní u fātìi dūu dīń Maseeduwaan pú. 4 Bin nìn nóó-uee di sá: Sɔpateer, Piirusi jipɔɔn un nìn sá Beereeyee, nì Ariistaarki nì Seekundusi, bíǹ sá Teesalooniiki yab, Gaayusi un sá Deebee, nì Tiimootee nì Tiisiiki nì Troofiim, bíǹ nyánní Asii. 5 Bíǹ kɔkɔ nìn līntì ki cūtìi cíitì-ti Troowaasi. 6 Iwiin in poon Juuda yab ŋmóò kpɔnɔb bin baa ŋá ŋkpɔnɔnyɔkɔee boonee, timbi kɔ́nní meela ki yíkìń Fiiliipi tiŋkin, ki ŋá iwiin iŋmoo ní ki nín bàn̄ bi-cee Troowaasi, ní ki ŋá iwiin iluli niin.

Pɔɔl taaluŋkikaal Troowaasi tiŋkin

7 Kinyɔŋ wimpeepeekaaŋu dalee, ti nìn kpáfì kí jī ti-Dindaan jikaati, ní Pɔɔl kíĺ ki bíi sòoǹ nì bin kpáfì niinee. U nìn sòon̄ ki yúntì tikpil, áli kunyataasiiu tikúti saalaa nì tili, kun puee an nìn sá kutaa ń wúntí ú yīkì ní. 8 Fitilab nìn wīikí diditɔntɔkɔl din poon ti nìn kpáfèe ni tikpil. 9 Unaacimpɔɔn ubɔ nìn bí niin, bi yíì-u Eetiiki. U nìn kā diditɔntɔkɔl tɔkɔlau nyɔɔgbandi pu. Ŋyunti ŋun Pɔɔl gbíntìi bíi sòoǹ nì bi ki cée, ní ŋgeem cúú-u. U bíi gèeǹ tikpil tikpilee, ní ki dāa kpáàa nyánní diditɔntɔkɔl yilpu kuditataatiiu poon ki lítì kitiŋ. Bi pée yōoǹ-uee, u kpíì ní. 10 Niinee ní Pɔɔl kpákatìń ki bōoǹ ki yōoǹ-u ní ki bí yii: «Ni-pɔbiliŋ ń taa máĺ, kun puee u fātìi jɔ́mìń!» 11 Ní u fātìi nín jɔ́ḿ ki cūtìi yākatì kpɔnɔb bi ŋmɔ́, ní u fātìi tí kíĺ ki bíi sòoǹ nì bi áli kutaa nì ku-wuntil, ní boonee u dāa nín yíkì. 12 Ní bi fātìi gíiǹ unaacimpɔɔnee u-dumpu nì alaafiya, ní an nìn mɔ́ɔkiǹ báà ŋma tikpil.

Pɔɔl yíkì Troowaasi ki búntì Miilee

13 Ní timbi kɔ́ meela ki līntì kí cùú kíntí Pɔɔl Asɔsi tiŋkin, kii u nín nìn pée sòon̄ puee, kun puee úǹ làá dāá còomìń ataa pu ní. 14 U bāań ki ká-ti Asɔsee, ní ti yōoǹ-u ki nín cáa cá Miitileen. 15 Niinee ní ti nín nìkì. Áli kutaa nì ku-wuntilee ní ti dūu bàn̄ Kiyoo. Ku tí wúntèe ní ti dūu bàn̄ Samɔsi, ní ku gíti tí wúntèe ní ti yúl̀ Troogiliyɔn ní ki nín bàn̄ Miilee. 16 Pɔɔl nìn lēē yii u là kí gɔ́ntí Eefeesi kí taa bīil̀ ŋyunti kitiŋ gbantin. Míǹ pu ní u nìn túĺ dicancaal, án ŋá-u malaa u yaan ŋūǹ, ú bàà nín̄ bí Jeerusaleem Pantikooti wiiŋŋu dal.

Pɔɔl kāaǹ Kriisitoo nikitil kpilib bin bí Eefeesee

17 Pɔɔl bí Miileeyee, ní ki tú bí cù Eefeesi kí yíiń niin Kriisitoo nikitil kpilib. 18 Bi bāań u-ceeyee, ní u bí-bi yii: «Kéè, nimbi ni-ba nyí doooo ŋwimpeekaa ŋun m kóoń Asii tiŋkinee m nín bí nì ni baabadal miŋyeeyaa! 19 Míǹ ní m nìn sīntiǹ m-ba ki túń ti-Dindaan tundi nì nnyinnyim, ki bí falaabi kansikin kun puee Juuda yab nìn nyàab̀ isan kí kpɔ̀-mi. 20 Míǹ ní ni nyí yii maa nìn bál̀ tin ŋūǹ kí tūtuǹ-nee báà tiba, ki sòoǹ ki dàkà-ni Unimbɔti bɔti laakin binib kpáfée ki kpáaǹ ni-dumpui. 21 M nìn sáŋkí Juuda yab ki kpáaǹ Greeki yab tiŋan, yii bí fá ikpiti, kí fōō ti-Dindaan Yeesu kí kíí kí nóó Unimbɔti. 22 «Kɔŋkɔnnee, m làá nīn cá Jeerusaleem dee kii Unimbɔti Fam nín bí ḿ ŋá puee, kaa nyí tin làá ŋá-mi niinee. 23 Ama ntimu mun kɔkɔ poon m jītée, Circir Fam tùkù-mi yii sarka nì dinimbinaamandi dɔ̄ ki cí-mi. 24 Ama, man maŋfal bɔti kaa páb́-mi, a lì kii an kaa sá-mi tiwammɔntiil tibee ní. Tin di páb́-mee di sá ḿ tɔ̄ ditundi din m fōō ti-Dindaan ceeyee: díǹ di sá ḿ sòoǹ Tibɔmɔntiil kí tùkù binib dineendi din Unimbɔti cáá ti-puee^a.

25 «Míǹ puee, nimbi bin cee m jítì ki sòon̄ Unimbɔti Beel pu bɔtee, kɔŋkɔnnee m nyí yii naa làá ti ká-mi. 26 An di yì-tì ní m tùkù-ni an bɔti díǹ kí síiń, boonee, ubɔ yaa láa gíti wáŋkèe, an kaa dāa gíti sá m-cee. 27 Di sá yii m tùkū-ni kaa bál̀-ni Unimbɔti nín là kí dāá ŋá min miŋyee kɔkɔ. 28 Míǹ puee, ní kpèèmaan ni-ba tiŋan, kí kpèèmaan dinikitil din pu Circir Fam lēē-ni yii ní nīn sá bikpilibee, kí kpòotī Unimbɔti nikitil din u dū u-ba fatikuu ki dée tiŋan. 29 M nyí yii, m-kpátam boonee, binib làá dāá kóoń ni-kansikin. Baa làá dāá tàan̄ dinikitil gbanti, a lì kii agbiŋgbil nín cáá ntoom, kaa tàantí dipikitil puee. 30 Míǹ ní ni-kansikin bininjab biba mun làá dāá yòon̄ tinyimɔmbɔti kí sòoǹ kí ŋmàtiǹ Kriisitoo yab biba ń nīn nóó-bi. 31 Míǹ puee, ní nīn nyímaan nì ni-ba kí nīn téetí m nín nìn sáŋkí-ni pu nì nnyinnyim ŋwiimpu nì kunyeeu áli abin atee.

32 «Kɔŋkɔnnee, m dū-ni ki ŋá Unimbɔti ŋaan, ní nīn ŋúb́ u-bɔmɔntiitee. Tíǹ di cáá mpɔn kí yàntī ní béé Unimbɔti bɔti tikpil kí dāá fōō ipaati in u síiǹ kí tīī bin kɔkɔ sá u-yabee. 33 Ni nyí yii man kaa nìn là ubɔ nimbiliŋ, kaa nìn là ubɔ mun bɔkutil. 34 Nimbi ni-ba nìn nyí yii nì m-ŋalii in bí nee ní m nìn cáa tūǹ ditundi ní man nì bin nìn nóóyee jīǹ. 35 M dàkā-ni ni-kɔkɔ ń béé yii ni máaǹ kí nīn tūǹ ditundi tikpil kí ŋmā kí tūtuǹ biwɔfib, kí nīn téetí ti-Dindaan Yeesu u-ba nín nìn lī dinyɔɔbundi diŋyee, yii: <Á pɔ̄ tiwanee mɔ̄ ki jítiǹ bí pɔ̄-si.>»

36 Pɔɔl lī míǹ ki dóòyee, ní ki gbāaǹ, ní u nì bi kɔkɔ bíi mèé. 37 Niinee ní bi-kɔkɔ bíi sūǹ, ní ki dū bi-ŋalii ki kpàl̄ Pɔɔl. 38 Tin nìn kɔ́ǹ-bi kunimbaauee di sá u nín lī yii dalba dalba baa làá ti ká-uee. Niinee ní bi céeǹ-u áli meela taapu.