Yoowaneesi i

Yeesu bɔti tin

Yoowaneesi

ŋmàn̄ee

Tibɔkilkaal

Tibɔti tin bi ŋmàn̄ Yeesu puee, Yoowaneesi nín ŋmàn̄ tiŋyee sá tin ní úǹ u-ba baasii ká ki ŋmàn̄ee ní. Ti yaa yōoǹ u nín máafì bi nín cúú Yeesu ki sāaǹ-u ki dāa kpáá-u ndɔpuntikaa puee (ayil 18–19) boonee, tin sá tibaantiil nì tin bin kíǹee ŋmàn̄ee kaa náaǹ. U sá un baba ŋmàn̄ tibɔti tiba kii Kana nimpucanti (2.1-12) nì Niikoodeem nín cūtìi ká Yeesu puee (3.1-21), nì u nì usamaariinimpu nín sòon̄ puee (4.1-12), nì u nín cáaǹ ufaliŋfaan ubɔ Beetisayida puee (5.1-18), nì uninja un bi pée màl̄ u sá ujɔfuee, nì tiba mun. Ti yaa dūu ŋmāntì nì tigbɔn tita tin bi ŋmàn̄ Yeesu maŋfal wiiŋyi puee, Yoowaneesi úǹ kaa sòon̄ Yeesu maŋfal pu kitiŋ nee pu tikpil. Ama u tìì tin jítì Yeesu maŋfal puee kudapɔɔu tikpil. Di sá yii tibɔti gbanti tikpil dàkà Yeesu dàkatam tin nyóòyee ní.

Tibɔti tin Yoowaneesi dūu kíĺee poonee (1.1-18), u lēē Yeesu ki dàkā yii u sá Unimbɔti nyɔɔbundi din bí talku ní ki kpántì unil ki dɔ́miń ki kāl̀ binib kansikinee ní. Úǹ di sá dimaŋfal, ki sá ŋwalifi nì ibaamɔn.

Ti ŋūǹ kí yàkatī kugbɔŋu nee ajancukukpaan ali ŋin dàkà Yeesu «kulukuee» ní, an dàkà yii u-kúm yuntiŋu ŋun mun sá Unimbɔti nín yōoǹ-u ki kāaǹ tinyoolinee (2.4, 12.23).

- Kí wàatī Yeesu kuluku (1.19–12.50) ń gbée, dijampeepeekaal sòoǹ nì ti seerab bin bi lēē lēē u-puee. Bin lēē u-pu seerab gbantee di sá Yoowaneesi un fùul̀ binib Unimbɔti nyimee nì u-boonnooliibi Andree nì Fiiliipi nì Natanayeel. Bi-kɔkɔ sòon̄ tin bi ká Yeesu puee. Míǹ boonee, kugbɔŋu nee gíti sòoǹ Yeesu nín kántì kántì binib tikpil puee nì maamaaci tuuŋŋi aluli ŋin u yíiń yii «tidaandee». U dàkā yii tin páb́ee di sá unil ń ŋmā kí gbìl̄ taapu. Yoowaneesi kúntì dijampeepeekaal gbanti ki sòon̄ ki kúlifì Yeesu nín sòon̄ tibɔti tiŋyee ní (12.37-50).

Ŋyunti ŋun kukuluu gbáńee (13.1), Yeesu kpáafì u-boonnooliibi kii unil nín kàaǹ u-bɔjoolkaati puee ní (ayil 13–16). Míǹ boon u-wimmeem poonee, u bɔ́ntì kí tūŋkiǹ ŋkúm, ní ki dū bin u làá yīkì kí yàntī u-boonee ki ŋá Ubaati ŋaan (Diyil 17). Yoowaneesi nín sòon̄ bi nín cúú Yeesu pu nì bi nín sòon̄ ki kūū u-bɔti nì bi nín kpáá-u ndɔpuntikaa pu nì u nín fīkitì ki nyáń dikaakulin puee, u sòon̄ ki tɔ́kɔǹ bin ŋmàn̄ Yeesu bɔtee pu dee (ayil 18–20). Dilákatil jiŋaaliu wiiŋŋu dalee, Kriisitoo un fīkitèe lēē u-ba ki dàkā Maarii Magidalaa yɔu. Míǹ boonee ní u lēē u-ba ki dàkā u-boonnooliibi, cilinjee Toomasi. Ayil 21 poonee, biboonnooliibi biluu nì Peetroo ká Yeesu un fīkitèe Tiibeeriyaadi mɔɔgbandi. Niin mun tí sá tin Yoowaneesi dūu kútì kí kúntí u-gbɔŋkuee ní.

Tin u dūu kúntì nee (20.30-31) lèekī kun pu bi ŋmàn̄ kugbɔŋu nee. An di sá ú yàntī un bíi kàaǹ kugbɔŋu nee ń béé yii Yeesu di sá un Unimbɔti nìn pōoǹ yii u làá tɔ̄ńee, Unimbɔti Jipɔɔn. Udaan làá ká dimaŋfal, di sá yii Yeesu un Ubaati túnnée di sá kii úǹ u-ba nín lī puee, «nsan nì ibaamɔn nì dimaŋfal» (14.6).