Yoowaneesi 1

Yeesu bɔti tin

Yoowaneesi

ŋmàn̄ee

Yeesu di sá «Dinyɔɔbundi» nì «Ŋwalifi»

1 Kí wàatī Unimbɔti ń náań duulinyee, ubɔ nìn bí bi yíì-u Dinyɔɔbundi ní ki bí Unimbɔti cee, ní ki sá Unimbɔti. 2 Dinyɔɔbundi gbanti di nìn pée bí Unimbɔti cee doooo ŋkilkaamin^a. 3 Díǹ ní Unimbɔti dū ki náań tikɔkɔ. Tiba kaa bí fám Unimbɔti kaa dū Dinyɔɔbundee ki náań kudɔŋu^b. 4 Di-ni ní dimaŋfal nìn bí, dimaŋfal gbanti di nìn tìì binib ŋwalifi. 5 Ní ŋwalifee dɔ́miń ki ŋmíntí binib bin bí dibɔmbɔndinee, ní binibee kaa fōō-ŋu.

6 Unimbɔti nìn túnní uninja ubɔ, bi yíì-u Yoowaneesi. 7 U nìn dɔ́miń kí sòoǹ nì binib ŋwalifi bɔti, án nín làá ŋá pu báà ŋma ń dī u-pu kí fōō kí kííyee. 8 Yoowaneesi u-ba kaa nìn sá ŋwalifi, u nìn dɔ́miń kí lēē ŋwalifee pu seera ní. 9 Dinyɔɔbundi di sá ŋwalifi mmɔnti, ki dɔ́miń kitiŋ pu ki ŋmíntí báà ŋma.

10 Unimbɔti dū dinyɔɔbundee ki náań taapu doo wanti kɔkɔ, ama, ŋyunti ŋun dì nìn bí taapu dooyee, baa béè-dì. 11 Un sá Dinyɔɔbundee dɔ́miń u-yab cee, ní u-yab kaa fōō-u. 12 Ama bin kɔkɔ fōō-u ki gbìl̄ ki tīiǹ-uee, u yāntì bidambi kpántì Unimbɔti biyaamu^c, 13 mbiyaamu mun ní unil kaa màl̄, kaa tí sá unil làtamee, ama an sá Unimbɔti di màl̄ múǹ.

14 Un sá Dinyɔɔbundee kpántì unil ki kāl̀ ti-kansikin ki cáá tiŋan nì ibaamɔn tikpil, ní ti ká u-nyooti^d tin u nìn fōō Ubaati ceeyee, kun puee u sá Unimbɔti Jipɔmbaabil. 15 U-pu ní Yoowaneesi nìn kúuǹ ki lī yii: «Un m nìn lī yii u dòoń man boon ama úǹ jítiǹ mamee, dee! Di sá yii úǹ pée bí ní bi nín màl̄ man.» 16 Úǹ cee ní tiŋan kɔwoooo nyánní ní ki bāań-ti, ní timbi kɔkɔ fòol̄-tì múlmul. 17 Unimbɔti nìn yāntì Mooyiisi tīī-ti marab^e, ama ní Yeesu Kriisitoo cáań-ti tiŋan nì ibaamɔn. 18 Báà ubɔ kaa wál̀ Unimbɔti dalba^f, ama u-Jipɔmbaabil un mun sá Unimbɔti ki bí ki nákáǹ u-Baa Unimbɔtee di yāntì ti béè-u.

Yoowaneesi unyiŋfaldi nyɔɔbundi

(Kpèè Maat 3.11-12, Maar 1.7-8, Luuki 3.15-17)

19 Juuda yab kpilib bin nìn bí Jeerusaleemee nìn túnní bisaraaŋaliibi nì Leefii yab bin tūǹ Unimbɔti diiku poon ditundee biba Yoowaneesi cee bí dāá bàlifì-u yii: «Sii di sá ŋma?» Ní u kíí-bi yii: 20 «Man di kaa sá Meesiya.» Waa nìn bál̀-bi, ki sòon̄ ki cántì-bi míǹ. 21 Ní bi fātìi bālifì-u yii: «Kin sii di sá ŋma ní? Eeliiii?» Ní u bí yii: «Aayee, maa sá Eelii.» Ní bi tí bālifì-u yii: «Sii di sá Unimbɔti bɔnaatiliu un máaǹ kí dāan̄eeee?» Ní u tí bí yii: «Aayee^g.» 22 Ní bi fātìi tí bālifì-u yii: «Kin, sii baasii sá ŋma ní? Di sá ti là kí tin tùkù bin túnní-tee un ní a baasii sée. Sii lì yii a sá ŋma ní?» 23 Ní Yoowaneesi kíí-bi yii:

«Man di sá un báakí kuteeun yii:

<Tɔ̄maan nsan ŋun tèen̄ee kí tīī ti-Dindaan,>»

- kii Unimbɔti bɔnaatiliu Yeesaya mun nín nìn lī puee.

24 Fariisab biba nìn bí bin bi nìn túnní Yoowaneesi ceeyee kansikin, 25 ní bíǹ bālifì-u yii: «A yaa kaa sá Meesiya, kaa sá Eelii, kaa tí sá Unimbɔti bɔnaatiliu un ti cée, kin ba pu ní a fùul̀ binib Unimbɔti nyim?» 26 Ní Yoowaneesi kíí-bi yii: «Man fùul̀ binib nnyim ní, ama ubɔ bí ni-kansikin, naa nyí-u, 27 úǹ di làá dāá dāan̄ man boon. Man kaa kpántì kí gútí u-naatakaŋ ŋmiii gba.» 28 Bi nìn bí Beetanii, kitiŋ kin bí Jɔɔdan buŋgbandi lapu pu, laakin Yoowaneesi fùul̀ binib nnyimee, ní ki sòoǹ an bɔti gbanti.

Unimbɔti pibil

29 Kutaa wúntèe ní Yoowaneesi ká Yeesu dòoń u-cee, ní u bí yii: «Kpèèmaan, Unimbɔti pibil din lèekī binib kɔkɔ kpitiiyee dee^h! 30 Úǹ pu ní m fu sòon̄ yii: <Uninja ubɔ làá dāá dāan̄ man boon, ama úǹ jítiǹ man, kun puee úǹ pée bí ní bi nín màl̄ man.> 31 Maa nìn nyí un ní an sée, ama an sá yii Isirayeel yab ń béé-uee pu ní man dɔ́miń ki bíi fùul̀ binib Unimbɔti nyim.»

32 Ní Yoowaneesi gíti lī yii: «M ká Unimbɔti Fam lafun nyánní yilpu kii dibeenanjilee ki kpákatìń Yeesu puⁱ. 33 Maa nìn nyí un ní an sée, ama Unimbɔti un túnní-mi ḿ nīn fùul̀ binib u-nyimee bí-mi yii: <A yaa láa ká man Fam kpákatìń ki kóò un puee, úǹ di làá fàl̀ binib Circir Fam.> 34 M ká mimmee, ní ki sòoǹ ki tùkù-ni yii úǹ di sá Unimbɔti Jipɔɔn.»

Biboonnooliibi bin Yeesu péé péé ki yíińee

35 Kutaa tí wúntèe, Yoowaneesi nì u-boonnooliibi bili tí yú. 36 U ká Yeesu bíi jītée ní u kpēē-u dímmm ki bí yii: «Kpèèmaan, Unimbɔti pibil sèé!» 37 Yoowaneesi boonnooliibi bilee gbìl̄ mimmee, ní ki nóó Yeesu. 38 Yeesu fātìi kpēē bi nóó-uee, ní ki bí-bi yii: «Ni nyàab̀ ba?» Ní bi bí yii: «Rabii, la ní a kóò ní?» - Rabii taapu di sá yii, Udakal. - 39 Ní Yeesu bí yii: «Dāam̄maan kí cùú béé laakin m kóòyee.» Ní bi nóó-u ki cūtìi béè laakin u kóòyee, ní ki kpáàa gbíntì niin yaadal wiiŋŋu. An nìn sá tikúti tinaa kujoou ní bi nìn cūtì.

40 Andree un sá Siimɔn Peetroo naalee nìn sá binib bilee kansikin ubɔ bin nìn gbìl̄ Yoowaneesi nyɔɔbundi gbanti ki nóó Yeesuee, 41 ní Andree péé ki cūtìi ká u-maan Siimɔn ki tùkū-u yii: «Timbi ká Meesiya!» - An dàkà yii Kriisitoo. - 42 Ní u cáá Siimɔn ki cūnnì Yeesu cee. Ní Yeesu kpēē-u ní ki bí yii: «Sii di sá Siimɔn Yoowaneesi jipɔɔn. Bi làá nīn kíǹ ki yíì-si Keefaasi ní», an dàkà yii Peetroo^j.

Yeesu yíiń Fiiliipi nì Natanayeel

43 Kutaa gíti tí wúntèe, Yeesu lēē yii u làá cù Galiilee, ní ki ká Fiiliipi, ní ki bí-u yii: «Nóó-mi!» 44 Fiiliipi nìn sá Beetisayida tiŋkin ní. Niin ní Andree nì Peetroo mun nìn sá. 45 Boonee ní Fiiliipi ká Natanayeel, ki tùkū-u yii: «Timbi ká un pu ní Mooyiisi nìn ŋmàn̄ u-marab gbɔŋkun ki kpáaǹ Unimbɔti bɔnaatiliibi mun sòon̄ u-puee^k. An sá Yeesu Jooseefi jipɔɔn un sá Naasaareetee.» 46 Ní Natanayeel bālifì-u yii: «Mimmee, tiwammɔntiil ŋūǹ kí nyānní Naasaareeti mun deeee?» Ní Fiiliipi bí-u yii: «Dāan̄ kí cùú kpèè.»

47 Yeesu kpēēyee, Natanayeel dòoń u-cee, ní u bíi sòoǹ u-pu yii: «Un bí nee di sá uisirayeelja páaa, kaa sá milimilidaan.» 48 Ní Natanayeel bālifì-u yii: «A ŋá mana ní ki nyí-mi?» Ní Yeesu kíí-u yii: «Min a bí fiigi subu taapuee ní man ká-si ki wāatì ní Fiiliipi dāa nín yíiń-see.» 49 Niinee ní Natanayeel bí-u yii: «Ukpil, a sá Unimbɔti Jipɔɔn ki sá Isirayeel yab mun bɔtiu^l!» 50 Ní Yeesu bí-u yii: «M nín bí yii m ká-si fiigi subu taapuee pu ní a fōō ki kííii? A làá gíti ká tin jítiǹ tin bí neeyee. 51 Ibaamɔn ní m tùkù-ni, ni làá dāá ká kutagbɔŋu cúu pīitì, ní Unimbɔti tuuŋyi sìntīń ki jɔ́ḿ man Kinibiki pu^m.»