Yeesu bɔti tin
Luuki
ŋmàn̄ee
Tibɔkilkaal
Kii Maatiiu nì Maarki nín ŋmàn̄ bi-gbɔnti puee, míǹ ní Luuki mun ŋmàn̄ u-gbɔŋku:
- Yoowaneesi un fùul̀ binib Unimbɔti nyimee sòon̄ ki dàkā yii úǹ di dɔ́miń kí ŋàtī Yeesu nsan (3.1-20). Míǹ boonee ní u fùl̄-u Unimbɔti nyim ní Sitaan cɔ́ŋkì-u (3.21–4.13).
- Yeesu kíĺ u-tundi kunipaaun Galiilee tiŋkin. Niin ní u sòon̄ nì binib Unimbɔti bɔti ki cáaǹ bibunliibi mun (4.14–9.50).
- Yeesu nyáń Galiilee ki cōom̀ ki cūtì Jeerusaleem tiŋkin (9.51–19.28). Ama Luuki kútì doo nee tibɔti tikpil tin Maarki ŋmàn̄ee pu, a lì kii usamaariijamɔnti bɔŋmantikaati, nì ugaajagbaan bɔŋmantikaati nì kibiki kin wáŋkì bi fātìi ká-kèe bɔŋmantikaati. U gíti kútì tibɔti tiba mun kii Yeesu nín cūtìi māntì Maarta nì Maarii pu puee.
- U gíti sòon̄ Yeesu tuuŋŋi ŋin u túń Jeerusaleem tiŋkinee (19.29–21.38),
- nì falaa un u jíń ki dāa kpáàa kpíìyee bɔti (ayil 22–23).
- Kugbɔŋu nee kúntì nì Dilákatil jiŋaaliu wiiŋŋu bɔti ní (ayil 24). Yeesu nín fīkitèe, u lēē u-ba ki dàkā u-boonnooliibi Eemaayusi tiŋkin ki wāatì ní ki nín jɔ́m̀.
Ama Luuki nín kíĺ u-gbɔŋku puee nyáń u-ba nì Maarki yɔkɔ. U kíĺ u-gbɔŋku kii unil nín ŋmà kugbɔŋu kí tīī u-juti puee ní, ní ki lēē u nín bɔ́ntì pu ki ŋmàn̄ u-gbɔŋku puee ki dàkā (1.1-4). Míǹ boonee ní u nín kíĺ kugbɔŋu ku-ba bɔti diŋmal ki sòon̄ Yeesu nì Yoowaneesi un fùul̀ binib Unimbɔti nyimee nyeeŋu (ayil 1-2). Niin ní ti kāntí ntuun nín sòon̄ nì Maarii puee, nì ŋu nín sòon̄ yii bi làá màal̀ Yoowaneesi unyiŋfaldi puee, nì bi nín màl̄ Yeesu nì bipikpaaliibi nín dɔ́miń ki jáam̀-u puee. Ti gíti tí kāntí Maarii nì Sakari nì Simeeyɔn nín gāā ilan iŋyee. Dijampeekaal gbanti poonee, Luuki lēē kun baasii sá u-seerau pɔ̀ti puee ki dàkā: Yeesu nyánní Unimbɔti cee ní. Tinitanee, u sá uisirayeelja. Niin di làá dàkà u-dāantam nín cáá kudapɔɔu ki tīī inifunaan kɔkɔ puee. Luuki gíti lēē ki dàkā mun yii Unimbɔti néeń ŋwaamu, an dàkà yii bin sīntiǹ bi-ba taapuee nì bin binib dūu fée nì binimpoobi nì biwɔfib nì binicambi. U dàkā mun yii Unimbɔti Fam tundi sá dikpaandi, ní laakin Yeesu bɔmɔntiiti yaa bàn̄ee, an cāabìń mmɔn nì inyɔŋki nì ŋwimmeem ní.
Tigbɔn tinaa tin sòoǹ Yeesu puee, Luuki gbɔŋku di sòon̄ Yeesu pu ki dūu dī nì Greeki yab koobiliŋ pu. U nyí yii bin u bíi ŋmà kugbɔŋu nee ki tììyee kaa baasii nyí Isirayeel yab yaajakoobiliŋ tiŋan, an pu ní u yōoǹ ŋyunti ki sòon̄ ki cántì tin ŋūǹ kí nīn sá-bi ticanee. Waanee nib ceeyee, kugbɔŋu nee sá kun sòoǹ Yeesu pu unil ń ŋmā kí gbìl̄ taapu sɔkɔmiiyee. Unil yaa bíi kàaǹ kugbɔŋu nee nyɔɔbuŋŋi diba dibee, u làá ká binib kɔkɔ Fiiliu.