Yeesu bɔti tin
Maarki
ŋmàn̄ee
Tibɔkilkaal
Yeesu bɔti tin bi ŋmàn̄ ki ŋá tigbɔn tinaa poonee, Maarki yɔkɔ di sá kun kaa fɔ̀kɔ̀ee, ama ku mun di sá kukpikuu.
Maarki gbɔŋku poonee, u lēē ki dàkā yii Yeesu sá «Unimbɔti Jipɔɔn» (1.1). An bɔtee sá bitii yati. Nì míǹ kɔkɔee, u sòon̄ ki kūbitì an bɔti pu u-gbɔŋku kɔkɔ poon (1.11, 9.7, kpèè mun 3.11, 5.7). Yeesu úǹ nín bàà nìn là puee di sá an gbíntí dibalin (kpèè 3.12, 5.43, 7.24, 8.30, 9.30). Ba pu? - Di sá yii a-nimbil yaa kaa ká-u u kpíì ndɔpuntikaa pu kii Room yab soojakpiliu nín ká-u puee, aa làá ŋmā kí gbìl̄ taapu.
Tin bée di sá yii ntuun gbanti nín dɔ́mińee, an máaǹ yii báà ŋmā ń fōō-ŋu kii an nín máaǹ puee ní. Yoowaneesi un fùul̀ binib Unimbɔti nyimee tundi di nìn sá ú bɔ́ntí Unimbɔti nibul dí fōō ntuunee (1.2-8). Úǹ di nìn tí fùl̄ Yeesu Unimbɔti nyim (1.9-11).
Míǹ boonee, Yeesu nìn kāl̀ u-baba ní Sitaan cɔ́ŋkì-u (1.12-13), ní u kíĺ u-tundi binib kansikin. Maarki lēē ki dàkā yii tin kɔkɔ Yeesu nìn ŋáańee, an yaa sá Yeesu nín yíiń u-boonnooliibi bí nóó-u pueeyaaa, u nín nìn dàkà binib pueeyaaa, u nín nìn cāantí bibunliibi pueeyaaa, u nìn ŋáań míǹ kɔkɔ nì Unimbɔti pɔŋŋu ní (1.14-8.30).
Kugbɔŋu nee janliliitiil poonee, Maarki lēē ki dàkā yii Yeesu nìn còom̄ ki túŋkí falaabi nì ŋkúm nì difìkitil din dɔ̄ ki cí-u Jeerusaleemee (8.31-10.52). Ŋfunyɔm mita kɔkɔee, u sòon̄ nì u-boonnooliibi an bɔti pu, ama baa gbìl̄ taapu. Iyunti tikpilee, Yeesu sòoǹ ki yíì u-ba yii «Kinibiki», ama maamaaci niliu un u nìn sée di nìn sá tikpaandi.
U nín kɔ́ Jeerusaleem tiŋkinee, binib nìn kpáafì-u abaal ní ki fōō-u. U nìn jìn̄ biwannyafiliibi bin nìn bí kunimbɔtidiinee ní Isirayeel nimbɔtijaamliibi kpilib bíi jáà nì u. An nìn sá ŋyuntimɔnti ú dàkà u-pulincɔntiibi nì samaa nì u-boonnooliibi didàkaluŋkikaal (ayil 11-13).
Ayil 14-15 sòoǹ nì ti Yeesu maŋfal wiiŋyi ijoolkaa ili in u dūu kāl̀ kitiŋ pu dooyee. Niin ní ti kāntí cilinjee u nì u-boonnooliibi nín kpáfì ki jíń tijikaal tin ki lúŋkì u nì bi kpáfì ki ŋmɔ́ kpɔnɔ ki nyùn̄ ndamamee. Dijandi gbanti mun poon ní ti kāntí u nín mēē u-baba pu Geetiseemanee kpaabunee, nì bi nín cúú-u pu, nì bi nín sòon̄ ki kūū u-bɔti pu, nì bi nín kpáá-u ndɔpuntikaa pu nì bi nín síb́-u puee bɔti. Ama bi nín kūū-u winta dalee, binimpoobi cūtì u-kaakul laŋkee ki ká yii di dɔ̄ dikulindi. Niin ní bi tùkū-bi yii u fīkitì (16.1-8). Kufaaŋŋu nìn kɔ́-bi ní bi sáǹ. (Tigbɔn tiba poon bi kútì yii Yeesu nín fīkitèe, u lēē u-ba ki dàkā binib ní ki nín jɔ́m̀ yilpu. Bi cántì tibɔti gbanti pu tigbɔn tin kíǹ ki sòoǹ Yeesu puee).
A yaa kàan̄ Maarki gbɔŋku ki dóòyee, a làá béé yii Yeesu Naasaareeti yɔu «lafun sá Unimbɔti Jipɔɔn» kii Room yab soojakpiliuee (15.39).