Maatiiu 28

Yeesu fìkititam

(Kpèè Maar 16.1-8, Luuki 24.1-12, Yoow 20.1-10)

1 Ŋwiŋŋuŋfikaa jítì ku wúntì kɔɔsil ntaafaabɔmbɔminee, Maarii un sá Magidalaa tiŋkinee, nì Maarii un kíǹee^a cūtì kí kpèè dikaakul. 2 Kpalaayee kitiŋ cīŋkì tikpil, ní Unimbɔti tuuŋŋu ŋubɔ nyánní yilpu ki dɔ́miń ki cúú ditaŋkpakpaandee ki bíntì ní ki kāl̀ di-pu. 3 U nìn jìl̀ kii ntaaŋmɔŋmɔee, ní u-wampeeŋkaati pīiǹ káŋkaŋ. 4 Soojab nín wál̀-uee, ní bi fāŋkì tikpil, bi-wunti bíi jìkì ní bi fìkī. 5 Ní Unimbɔti tuuŋŋuee bí binimpoobee yii: «Nimbi taa fàŋkìmaan! M nyí ni nín nyàab̀ Yeesu un bi kpáá ndɔpuntikaa puee. 6 Waa bí doo, u fīkitì, kii u nín nìn pée lī puee. Dāan̄ kí kpèèmaan laakin u nìn dɔ̄ee, 7 kí nīn cámaan malaa, kí tùkù u-boonnooliibi yii u fīkitì ditaŋkpiilin. U làá lìntī kí cù Galiilee^b, niin ní ni làá tin ká-u. Tin m cáá kí tùkù-nee dee.»

8 Niinee ní bíǹ búntì malaa, tifaandi nì dipɔɔpiŋkpaandi kɔkɔ ŋmàl̄, ki sáń ki cá kí cáá dinyɔɔbundee kí tùkù Yeesu boonnooliibi. 9 Niin kpalaa ní Yeesu tú-bi nsan ní ki jáam̀-bi, ní bi sútì ki pìl̄-u ní ki tātìi gbāaǹ u-taaŋi taapu ki jáam̀-u. 10 Ní Yeesu bí-bi yii: «Taa fàŋkìmaan! Cù kí tùkùmaan m-nabiyaamu yii bí nīn cá Galiilee. Niin ní bi làá tin ká-mi.»

Soojab máafì tin bi kée

11 Ŋyunti ŋun binimpoobee dáá bí nsanni ki cée, ní soojab bin nìn cí dikaakulee biba cūtì kitiŋin ki máafì bisaraaŋakpilib tin jítèe kɔkɔ. 12 Ní bíǹ kpáfì Juuda yab tindaŋkpilib ki sòon̄ ki gbìlīǹ tɔb, ní ki nyàab̄ kunimbigbaau ki ŋéeb́ soojab nyɔmmu, 13 ní ki tùkū-bi yii: «Ní lì yii, kunyeeu timbi dɔ̄ ki gèeǹee, ní u-boonnooliibi dɔ́miń ki yùn̄ u-wunti^c. 14 Báà gɔmina yaa gbìl̄aaa, timbi làá sɔ̀kɔl̀-u kí nyāntí-ni tibɔtin.» 15 Ní soojab fōō animbil, ní ki ŋá bi nín bí bí ŋá puee. Ní an bɔtee gbītì Juuda yab kansikin ki dāa sāā díǹ.

Yeesu boonnooliibi ká-u

(Kpèè Maar 16.14-18, Luuki 24.36-49, Yoow 20.19-23)

16 Yeesu boonnooliibi saalaa nì ubɔee búntì Galiilee gbantaŋki kiba pu, laakin Yeesu nìn bí bí kíntí-uee^d. 17 Bi nín ká-uee, ní bi gbāaǹ ki jáam̀-u, ama nì míǹ kɔkɔee, bi-kansikin biba nìn dàkafī mili mili. 18 Ní Yeesu sútìń ki sòon̄ nì bi, yii: «M fōō yilpu nì taapu kɔkɔ pu mpɔn. 19 Míǹ puee, nín̄ cámaan atimbun kɔkɔ nib cee kí dū-bi kí kpántí m-boonnooliibi^e, kí fàl̀-bi Unimbɔti nyim, Ubaati, nì man u-Jipɔɔn nì Circir Fam yindi pu. 20 Ní dàkà-bi bí nīn ŋúb́ tin kɔkɔ m tīī-ni ní ŋée. Ní nīn nyí yii m bí ni-cee baabadal áli duulinya kúntitam.»