Maatiiu 27

Bi cáá Yeesu ki cūnnì Piilati cee

(Kpèè Maar 15.1, Luuki 23.1-2, Yoow 18.28-32)

1 Kutaafaau pɔ̀lpɔlee, bisaraaŋakpilib kɔkɔ nì Juuda yab tindaŋkpilib kpáfì ki sòon̄ bi nín làá dī nsan ŋun pu ní kí kpɔ̀ Yeesuee. 2 Ní bi bóob́-u ŋŋmii ki cáá-u ki ŋúbiǹ gɔmina Piilati.

Juudasi kūū u-ba

(Kpèè Atuun 1.18-19)

3 Juudasi un nìn dū Yeesu ki nyáfèe nín ká yii bi làá kpɔ̀ Yeesuee, ní u-pɔbil bíil̀ tin u ŋée pu, ní u cáań animbil jitɔmbi mmuŋku nì saalaayee ki gíiǹ ki tīī bisaraaŋakpilib nì Juuda yab tindaŋkpilib, 4 ní ki bí-bi yii: «M ŋá ikpiti ní ki dū un kaa ŋá tibee ki tīī ní kpɔ̀!» Ní bíǹ kíí-u yii: «An ká timbi la? Sii nì a-bɔti dee!» 5 Ní Juudasi dū animbilee ki yàl̄ kunimbɔtidiin, ní ki cūtìi lúntì u-ba ŋŋmii ki kpíì. 6 Niinee bisaraaŋakpilib cūtì ki tōō animbilee, ní ki bí yii: «Ti-marau kaa pú-ti nsan tí dū an nimbiliŋee kí ŋá kunimbɔtidii nimbiliŋ dakaaun, kun puee an sá fatiku nimbiliŋ ní.» 7 Ní bi sòon̄ ki gbìlīǹ tɔb, ní ki dū animbilee ki dá uyɔɔmaati ubɔ kpaabu ki dūu ŋá binicambi ceeku. 8 An puee, bi yíì bukpaa gbanti yii «Fatiku kpaabu» áli nìn díǹ. 9 An ŋá kii Unimbɔti bɔnaatiliibi Yeereemii nín nìn sòon̄ puee dee yii: «Ní bi fōō animbil jitɔmbi mmuŋku nì saalaa ŋin Isirayeel yab nìn kíí yii bí pà u-puee, 10 ní ki dū an nimbiliŋ ki dá uyɔɔmaati kpaabu, kii ti-Dindaan nín nìn tùkū-mi puee^a.»

Piilati bālifì Yeesu tibɔti

(Kpèè Maar 15.2-5, Luuki 23.3-5, Yoow 18.33-38)

11 Bi cáá Yeesu gɔmina nimbiin, ní gɔmina bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee.» 12 Ama, bisaraaŋakpilib nì Juuda yab tindaŋkpilib nín dū tibɔti tin ki túǹ u-puee, waa gātì báà tiba. 13 Ní gɔmina Piilati bí-u yii: «Aa gbìl̄ tin kɔkɔ bi sòoǹ ki tūntí a-puee níii?» 14 Ama Yeesu kaa pée gātì-u báà tiba an poon, ní an mɔ̄tìi bākatiǹ gɔmina tikpil.

Piilati dū Yeesu ki tīī bí kpɔ̀

(Kpèè Maar 15.6-20, Luuki 23.13-25, Yoow 18.38-19.16)

15 Dilákatil jiŋaaliu kamaayee, gɔmina nìn gīintí usarkadaan un samaa kɔkɔ yaa bālifèe ní kí líí. 16 Ŋyunti gbantee usarkadaan ubɔ nìn bí un pu báà ŋma pée nyée, bi yíì-u Baaraabaasi. 17 Ní Piilati bālifì samaa un nìn kpáfèe yii: «Ŋma ní ni là ḿ gíiǹ kí líí, Baaraabaasaaa, Yeesu un bi yíì yii Kriisitooyee?» 18 Di sá yii u nìn nyí yii nnimbidiki ŋun bi cáá Yeesu puee di yì-tì ní bi cáań-u ki ŋúbiǹ-u. 19 Ŋyunti ŋun u kā ibɔsoon puee, ní u-nimpuu túnní bí tùkù-u yii: «Á taa pée cèeǹ deedeedaan nee bɔtin! Di sá yii m jíń u-pu falaa tikpil kudamintiiun díǹ.»

20 Ní bisaraaŋakpilib nì Juuda yab tindaŋkpilib téé kunipaau ń lì yii bi là bí gíiǹ Baaraabaasi kí líí kí kpɔ̀ Yeesu. 21 Ní gɔmina fātìi tí būsì ki bālifì-bi yii: «Binib bili nee kansikinee, ŋma ní ni là ḿ gíiǹ kí líí ní?» Ní bi kíí-u yii: «Baaraabaasi ní ti là á gíiǹ kí líí!» 22 Ní u fātìi bālifì-bi yii: «Kin, m làá ŋá Yeesu un bi yíì yii Kriisitooyee úǹ mana?» Ní bi-kɔkɔ kíí yii: «Bí kpáá-u ndɔpuntikaa pu!» 23 Ní u bālifì-bi yii: «Mimmee, ba kpitii ní u ŋá?» Ama ní bi mɔ̀tīi kūuntí mpɔn yii: «Bí kpáá-u ndɔpuntikaa pu!» 24 Gɔmina Piilati ká yii waa ti ŋūǹ kí ŋá tiba, fìkil fikil mɔ̀tīi bíi wīintée, ní u yōoǹ nnyim ki fíntì u-ŋalii samaa kɔkɔ nimbiin^b, ní ki bí yii: «Maa bí uninja nee kúm poon, ni nì ni-bɔti dee!» 25 Ní kunipaauee kɔkɔ kíí yii: «U-kpuulool ń lúntí timbi nì ti-biyaamu pu!» 26 Niinee ní gɔmina gíiǹ Baaraabaasi ki líì, ní ki yāntì bi gbáń Yeesu anaalab, ní ki dū-u ki tīī bí cáá-u kí kpáá ndɔpuntikaa pu.

Soojab bēel̀ Yeesu

(Kpèè Maar 15.16-20, Yoow 19.2-3)

27 Niinee ní Piilati soojab cáá Yeesu ki kɔ́ǹ gɔmina cindi poon, ní ki yíiń disoojakitil kɔkɔ dɔ́miń ki kpáfì. 28 Bi nìn pēetì u-wanti ní ki dū dibɔkutimandi cínciŋ ki pēeǹ-u. 29 Bi nìn dū ikuŋkum ki lùn̄ kibeefuulii ki cíkiǹ-u, ki dū ŋkpandɔ ki ŋúbiǹ u-ŋaŋgiil, ní ki kíǹ ki gbàantí u-nimbiin ki bèel̄-u yii: «Ti jáaḿ-si, Juuda yab bɔtiu!» 30 ní ki tíiĺ timɔtan ki làbitī-u, ki fòol̄ ŋkpandɔee ki cáa fátí u-yil. 31 Bi bēel̀-u míǹ ki dóòyee, ní ki cúú dibɔkutimandee ki pēetì-u, ní ki gíiǹ úǹ u-ba wanti ki pēeǹ-u, ní ki cáá-u ki búntì kí tin kpáá ndɔpuntikaa pu.

Bi kpáá Yeesu ndɔpuntikaa pu

(Kpèè Maar 15.21-32, Luuki 23.26-43, Yoow 19.17-27)

32 Bi nyáń ki cée, ki tú uninja ubɔ nsanni u sá Siireen tiŋkin, bi yíì-u Siimɔn. Bi nìn páb́-u ú fōō Yeesu dɔpuntikaaŋu kí bùkun̄. 33 Bi nìn cáá Yeesu ki bānnì laakin bi yii Gɔlgɔtee, an taapu sá yii: «Kuyikpabiku laŋki.» 34 Bi nìn dū ŋkaam ki ŋmālim̀ ndamam poon^c ki tīī-u ú nyɔ̀. U dákée ní ki yíì, kaa nyùn̄.

35 Ní bi dū-u ki kpáá ndɔpuntikaa pu, ní ki tɔ́ kasi ki yākatì u-bɔkutiŋ^d, 36 ki kíǹ ki kā ki cí-u. 37 Bi nìn ŋmàn̄ tiŋmaŋmabiti ki nákáǹ u-yil pú kí dàkà kun pu ní bi kūū-uee, yii: «Un bí nee di sá Yeesu, Juuda yab bɔtiu.» 38 Bi nìn kpáá digaŋgandambi bili idɔpuntikaa pu ki ŋàl̄-u, ubɔ bí u-ŋaŋgiil pú ní un kíǹee bí u-ŋaŋgan pú^e.

39 Bisanjitiliibi nìn bèel̄-u, ki gàatī bi-yiliŋ^f, 40 ki lì yii: «Sii un gbáà kí wīī kunimbɔtidii kí fàtīí mā-ku iwiin itee, a yaa sá Unimbɔti biki, fīī a-ba kí kpákatiń ndɔpuntikaa pu^g!» 41 Míǹ mbaantiim, bisaraaŋakpilib, nì bimaradakaliibi nì Juuda yab tindaŋkpilib mun bí ki bèel̄-u, ki lì yii: 42 «U fīī biba dee, kaa ŋūǹ kí fīī u-ba! U sá Isirayeel yab bɔtiu naa! Ú kpákatiń ndɔpuntikaa pu kɔŋkɔnnee! Mimmee, ti làá fōō-u kí kíí. 43 U dū u-mákal ki ŋá Unimbɔti pu dee, ki lì yii: <Man sá Unimbɔti Jipɔɔn>. Too, kɔŋkɔnnee Unimbɔti yaa néeń-u, ú fīī-uaa^h!» 44 Digaŋgandambi bin bi nìn kpáá ki ŋàl̄-uee mun nìn sìí-u míǹ mbaantiim.

Yeesu kúm

(Kpèè Maar 15.33-41, Luuki 23.44-49, Yoow 19.28-30)

45 Kuwiŋkuluuee, dibɔmbɔndi jéetì kitiŋ kɔkɔ pu ki tin sāā tikúti tita. 46 Ki cá tikúti titee, Yeesu fáá mbiil mpɔn, yii: «Eelii, Eelii, lama sabakitanii?» Taapu sá yii, «M-Nimbɔtiu, m-Nimbɔtiu, ba ŋá ní a dū-mi ki fá?ⁱ» 47 Yeesu fáá mbiil mimmee, ní bin bí niinee biba gbìl̄ u-biiliŋuee pu, ní ki lī yii: «U yíì Eelii dee!» 48 Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ki dūu túuń ŋkpandɔ pu ki tīī-u ú nyɔ̀^j. 49 Ama ní bin kíǹee bí yii: «Yàntī! Tí kpèèmaan Eelii yaa làá dāá fīī-u!»

50 Yeesu gíti fáá mbiil mpɔnee ní ki sīntì. 51 Niinee, sata un bi nìn dūu pītì kunimbɔtidii^k poon ki gāntì laakin bi yíì circir páaa laŋkee nì laan kíǹee cúu cátì yilpu ki tin kátì taapu, ní kitiŋ cīŋkì, ní titaŋkpanaakɔti cúu búkutì. 52 Akaakul nìn cúu bīitì, ní bin nìn nóó Unimbɔti ki kpíìyee tikpil fīkitì, 53 ki nyáń bi-kaakuliŋin. Yeesu fìkititam boonee, an nibee kɔ́ Jeerusaleem tiŋkin, ní binib tikpil ká-bi.

54 Room soojakpiliu nì u-yab bin nìn cí Yeesuee nín ká kitiŋ cìŋkitam nì tin kɔkɔ pée jítèe, ní tifaandi cúú-bi tikpil ní bi lī yii: «Tiŋman, kijapaai nee lafun sá Unimbɔti Jipɔɔn ní.» 55 Binimpoobi kupaau mun nìn yú ndan ki kpèeń. Bi nìn céeǹní-u doooo Galiilee ní ki tútúǹ-u atuun. 56 Maarii un sá Magidalaa tiŋkinee nì Maarii un sá Yakubu nì Jooseefi nee, nì Seebeedee jipɔmbi na nìn bí bi-kansikin.

Bi nín síb́ Yeesu puee

(Kpèè Maar 15.42-47, Luuki 23.50-56, Yoow 19.38-42)

57 Kujoou jóotèe, ní ugaaja ubɔ dɔ́miń laakin bi nìn kpáá Yeesuee, bi yíì-u Jooseefi, u sá Arimatee tiŋkin. U mun nìn sá Yeesu boonnooliu. 58 Ní u cūtì ki ká Piilati, ní ki mēē-u nsan kí yòon̄ Yeesu wunti, ní Piilati bí yii bí dūú tīī-u. 59 Ní u cūtìi yōoǹ, ki nyàab̄ ŋŋaapiin mpɔɔn ki dūu fìn̄-u, 60 ní ki cáa ŋá u-kaakupɔndi din u nìn lùkū ditaŋkpalinee poon, ní ki bíntì ditaŋkpakpaandi diba ki pīiǹ dikaakul nyɔkɔpu, ní ki búntì. 61 Maarii un sá Magidalaa tiŋkinee nì Maarii un kíǹee mun nìn cūtì ki kā ki pìl̄ dikaakulee nyɔkɔpu.

Bi cíitì Yeesu kaakul

62 Bi bɔ́ntì ŋwiŋŋuŋfikaa kutaa wúntèe, ní bisaraaŋakpilib nì Fariisab nóó dicilpu ki cūtìi ká Piilati, 63 ní ki bí-u yii: «Ukpil, ti téetí yii unyimɔndaan nee nín nìn dáá bí dimaŋfalinee u nìn bí yii, u yaa kpíìyee, winta dalee u làá fìkitī^l. 64 Míǹ puee, yàntī soojab ń cù kí cīití u-kaakul áli iwiin ita, án nín làá ŋá pu u-boonnooliibi ń taa dāan̄ kí yɔ̀ u-wunti kí tùkù samaa yii u fīkitèe: mimmee, nnyimɔn gbanti ŋúǹ dāa pɔ́ɔkí kí jītíǹ mpeepeekaa.» 65 Ní Piilati kíí-bi yii «Ni cáá soojabaa! Cáámaan-bi bí cīití u-kaakul ni nín là puee.» 66 Ní bi dū kudaaŋŋu ki nákáǹ ditaŋkpalee pu ubɔ yaa gbēēyee bí bée, ní ki cáá soojab ki cíitì.