Atuun 1

Yeesu kpambaliŋ

tuuŋŋi

gbɔŋku

Yeesu pōoǹ Unimbɔti Fam

1 Teewoofiil,

M nìn ŋmàn̄ m-gbɔmpeepeekaaku^a poon tin kɔkɔ Yeesu nìn kíĺ ki ŋáań, ki dàkèe, 2 doooo ŋkilkaam áli ki tin sāā ŋwiin ŋun u jɔ́m̀ yilpuee. U-kúm nì u-fìkititam boonee, kí wàatī kí nín jɔ̄m̀ee, u kpáafì akpambal ŋin u nìn lútèe nì Unimbɔti Fam pɔŋŋu. 3 U nín kpíì ki fīkitèe, u nyántì u-ba ki dàkā u-boonnooliibi ŋfunyɔm tikpil áli ki tin sāā iwiin imuŋku ili kí dàkà yii u lafun bí dimaŋfalin. Ní bi-nimbil ká-u, ní u sòon̄ nì bi Unimbɔti Beel bɔti. 4 U nì bi nín nìn dáá bée^b, u nìn kpáafì-bi yii bí taa yīkì Jeerusaleem tiŋkin. U nìn bí-bi yii: «Ní kàl̄ kí cīití ti-Baa Unimbɔti nín nìn pōoǹ dipoondi diŋyee, dipoondi din bɔti m nìn sòon̄ nì nee. 5 Kun puee nì nnyim ní Yoowaneesi nìn fùul̀ binib. Ama nimbee, nì iwiŋkaaŋkaa poonee, Unimbɔti làá fàl̀-ni nì Circir Fam^c.»

Yeesu jɔ́m̀ yilpu

6 Ŋyuntee, akpambal nì Yeesu nìn kpáfì ki kēe, bi bālifì Yeesu yii: «Ti-Dindaan, an sá ŋyunti nee ní a làá fàtīí yàntī Isirayeel yab ń fōō dibeelaaa^d?»

7 Ní u kíí-bi yii: «M-Baa nín dū úǹ u-ba pɔŋŋu ki síiǹ iyunti nì iwiin iŋyee kaa sá ni-yati^e. 8 Ama Circir Fam làá kpákatiń ni-pu kí tīī-ni mpɔn ŋubɔ. Míǹ boonee, ni làá lēē m-pu seera Jeerusaleem tiŋkin nì Juudee nì Samaarii timmun, kí tin sāā kutagbɔŋu nì kitiŋ kúntinyɔkɔ^f.» 9 U lī míǹ ki dóòyee, u-kpambaliŋ bíi kpèé-uee, ní an yōoǹ-u ki cáa nín jɔ́ḿ yilpu, ní ditagbandi diba dɔ́miń ki līkiǹ u nì bi kansikin, ní baa ti wāĺ-u^g. 10 Bi dáá gbíntìi yú ki kpèé yilpu u nín cá puee, kpalaayee, bininjab bili dee bi-nimbiin ki pēē tiwampin^h, 11 ní ki bí-bi yii: «Galiilee yab, ba pu ní ni yú ki kpèé kutaa pu míǹ? Yeesu un ni ká u yíkì ni-kansikin ki jɔ́ḿ yilpu nee, làá dāá fàtīí tí gítiń míǹ mbaantiim kii ni nín ká u jɔ́m̀ pu nee ní.»

Bi lēē Maatiyasi ú fōō Juudasi paaŋŋu

12 Niinee ní Yeesu kpambaliŋ yíkìń Ɔliifi sufii jool pu ki fātìi nín gítiń Jeerusaleem. Dijoolee kaa nìn dátiǹ Jeerusaleem: an dandatiŋu nìn sá ditaŋkpal diba níⁱ. 13 Bi bāań niinee, ki jɔ́m̀ diditɔntɔkɔl din ni bi nìn pée kpààa kpáfée. An nìn sá Peetroo nì Yoowaneesi nì Yakubu nì Andree nì Fiiliipi nì Toomasi nì Baateeleemii nì Maatiiu nì Yakubu Alfee jipɔɔn nì Siimɔn un nìn là kí jáǹ Room yabee, nì Yakubu jipɔɔn Juudi^j. 14 Bíǹ kɔkɔ nìn kpáfì kinyɔɔbaantii ki mɔ̀tīi mèé ŋwimmeem, bi nì binimpoobi biba, nì Yeesu na Maarii, nì Yeesu naalib mun.

15 Iwiin gbanti poonee, Peetroo síl̀ nnabiyaamu mun nìn kpáfì ki bàn̄ kii binib imuŋku iluuyee kansikin, ki bí-bi yii: 16 «Nnabiyaamu, an máaǹ yii Unimbɔti gbɔŋku nín nìn sòon̄ min Juudasi^k pu dooooyee, an ŋá míǹ. Kun puee Unimbɔti Fam dī Daafiidi pu ki sòon̄ Juudasi un nìn līntì nsan bi cúú Yeesuee pu. 17 U nìn ŋmàl̄ ti-kansikin ki mun nìn sá ti-tundi nee poon yɔu ubɔ. - 18 Unil gbanti dū ntoonam nimbiliŋ ki dá kusaau. Niin ní u lítì dicincibil, u-pool pōō, u-nai kɔkɔ yāaǹ. 19 Jeerusaleem yab kɔkɔ nín gbìl̄ an bɔti gbantee, ní bi pú kusaau gbanti diyindi bi-sooŋyin yii: Akeeldama, an taapu sá yii: fatiku saaku^l. - 20 Ilan gbɔŋkun ní ubɔti Daafiidi nìn sòon̄ ki síiǹ yii:

<U-kɔŋkooŋŋu ń kpántí kudigbuŋu,

ubɔ ń taa ti kɔ́ kudii gbantin,>

ní ki gíti ŋmàn̄ yii:

<Ubɔ ń fōō u-tundi^m.>

21 «Binib biba nìn céeǹ-ti ŋyunti ŋun Yeesu nìn bí kitiŋ pu doo ti nì u yìin̄ee, 22 kí yòon̄ daliŋkin Yoowaneesi fùl̄-u Unimbɔti nyim kí tin cáá sāā ŋwiin ŋun u yíkì ki nín jɔ́ḿ yilpuee. An máaǹ yii binib gbanti kansikin ubɔ nín kūtì ti-pu kí kpántí Yeesu fìkititam seeraleeliuⁿ.»

23 Peetroo lī míǹ ki dóòyee, ní bi cáań binib bili, Jooseefi un bi yíì Baarsabaasi ki gítì páaǹ-u diyindi yii Justuusee, nì Maatiyasi. 24 Ní bi mēē yii: «Ti-Dindaan, sii di nyí báà ŋma pɔbil. Dàkà-ti un ní a lēē bi-kansikinee, 25 udaan ń kpántí a-kpambal kí nīn bí mpaan ŋun Juudasi dūu fá ki búntì u-laŋkee.» 26 Bi tɔ́ kasee, Maatiyasi jíń, ní bi dū-u ki ŋàl̄ akpambal saalaa nì dibee pu.