Atuun 2

Circir Fam dāantam

1 Pantikooti^a wiiŋŋu dalee, bi-kɔkɔ nìn kpáfì ki bí dibɔɔbaantiil. 2 Dicilpu kpalaayee, kuwoou kubɔ nyánní yilpu kii kubuŋkpaaŋŋu kubɔee, ní ki dɔ́miń ki gbí kudii kun poon bi nìn kēe. 3 Niinee bi ká alimbil aba kii aŋmilimbilee bāań-bi, ki cúu yākatì tɔbin ní ki tɔ́kɔǹ báà ŋma pu. 4 Ní Circir Fam sīntìń ki kɔ́ bi-kɔkɔn mmɔntiim, ní bi kíǹ ki sòoǹ isooncaan in Ŋfam tīī-bi bí sòoǹee.

5 Iwiin gbantee, Juuda yab bin nóó Unimbɔti deedeeyee nìn dɔ́miń Jeerusaleem, ki nyánní atimbun ŋin kɔkɔ bí duulinyanee. 6 Kuwoou bíi gèe, ní samaa sáǹní ki bāańee, ní ki gíti bākatì, kun puee bi-kɔkɔ nìn gbìl̀ bi-sooŋyin binibee nín sòoǹ puee. 7 Ní bi bākatì sèeee, an ŋá-bi bitii, ní bi kíǹ ki bíi sòoǹ nì tɔb yii: «Bin kɔkɔ sòoǹ nee kaa sá Galiilee yabaaa? 8 Kin, an ŋá mana ní ti-kɔkɔ nee gbìl̀ nì ti-timmu sooŋyi poon tin bi sòoǹ nee? 9 Ti-kansikin biba sá Paati, biba sá Meedi nì Eelam, biba mun sá Meesoopootamii nì Juudee nì Kapadoosi nì Pɔnti nì Asii nì 10 Friijii nì Paŋfilii nì Eejipiti nì Liibii jandi din pìlīǹ Siireenee yab, nì bin kɔkɔ nyánní Roomee. 11 Biba sá Juuda yab, ní biba mun sá binicambi bin fōō Juuda yab marabee, Kreeti yab nì Bilaalibub. Kin an ŋá mana ní ti gbìl̀ bi sòoǹ Unimbɔti tunnyaaŋŋi bɔti timbi kɔkɔ sooŋyin?» 12 Ní bi bākatì, kaa ti nyí tin poon ní bi bée, ní ki kíǹ ki lì tɔb cee yii: «Ba bɔti nín sèé dee?» 13 Ama biba nìn bí ki bèel̄-bi, yii: «Bi nyùn̄ ndaam ní ki gbí!»

Peetroo nyɔɔbundi

14 Niinee ní Peetroo yáatìi yúl̀, u nì akpambal saalaa nì dibee, ní ki yōoǹ dinyɔɔbundi ki téeń mpɔn ki bí-bi yii: «Nimbi Juuda yab, nì nimbi bin kɔkɔ kóò Jeerusaleemee, ŋátímaan ni-tafaliŋ kí pīlifì tibɔti tin m làá sòoǹ nee. 15 Binib nee kaa gbí ndaam, kii nimbi nín dàkafī puee, kun puee an dáá sá ntaafaawìiń ní. 16 Ama tin ni wāĺ nee, Unimbɔti bɔnaatiliu Jooweel nín nìn lī puee dee yii:

17 <Iyuntijoolkaayee, m làá dāá yàntī

m-Fam ń kpákatiń unil sá kamaa pu,

ni-jipɔmbi nì ni-bisalib dāa nàatī m-nyɔɔbuŋŋi,

ni-naacimpɔmbi dāa wālifí tin dòońee,

ní ni-jaŋkpilib mun dāa dámintí tidamintiil.

18 Ibaamɔn, iwiin gbantee, m dāa yàntī m-Fam ń kpákatiń

m-tɔntɔnliibi bininjab nì binimpoobi pu,

ní bí nàatī m-nyɔɔbuŋŋi.

19 M dāa ŋáań maamaacib yilpu,

ní kí dàkà tidaandi taapu.

Ni làá dāá ká fatiku nì ŋŋmi nì ŋŋminyiim.

20 Ŋwìiń dāa kpántí dibɔmbɔndi

ní uŋmal ń kpántí kii fatikuee

kí wàatī ní ti-Dindaan wiŋkpaaŋŋuee nyooti ń nín bàń.

21 Niinee, un sá kamaa yaa láa fōō ki kíí

ki mēē ti-Dindaanee dāa kāntí difiil^b.>

22 «Isirayeel yab, pīlifìmaan tibɔti nee. Unimbɔti yāntì Yeesu Naasaareeti^c yɔu ŋáaǹ maamaaci tuuŋŋi nì tidaandi ni-kansikin, ki dàkā-ni yii úǹ di lafun túnní-u ni-cee, kii nimbi ni-ba nín nyí puee, kun puee tikɔkɔ jítì ni-nimbiin ní. 23 Kii Unimbɔti nín nyí ki là, ki lēē ki yóoǹ puee, ní ni dū-u ki tīī bin kaa nyí Unimbɔtee kpáá-u ndɔpuntikaa pu ki kūū-u^d. 24 Ní Unimbɔti fīkitì-u, ki bútì-u ŋkúm kusakai. Kun puee ŋkúm kaa ŋūǹ kí nīn ŋúb́-u^e. 25 A lì kii Daafiidi nín nìn sòon̄ min u-puee yii:

<M wāĺ ti-Dindaan ŋyunti sá kamaa m-nimbiin,

tiba kaa làá ŋá-mi kun puee u tíkí-mi m-ŋaŋgiil pú.

26 Míǹ puee m bí dipɔɔpindin ní ki sòoǹ an mɔ̄ǹ-mi.

Nì min kɔkɔ m-wunti bí iwɔfinee,

m máká yii m làá dāá fàtī kí ká dimaŋfal,

27 kun puee aa làá dāá fá-mi ditaŋkpiilin,

kaa làá yàntī a-tɔntɔmmɔntiu un a lēēyee

wunti ń sūū.

28 A yāntì m béè dimaŋfal sàmbiyaamu,

a-nimbiin ní a làá dāá gbéeǹ-mi dipɔɔpindi^f.>

29 «Nnabiyaamu, càntī ḿ mɔ̀tīí tùkùmaan-ni ti-naanja Daafiidi bɔti. U kpíì ní bi síb́-u. U-kaakul gbíntìi dáá bí ti-kansikin áli nìn díǹ. 30 Daafiidi nìn sá Unimbɔti bɔnaatiliu ní. U nìn nyí Unimbɔti nín pūtì ki pōoǹ-u yii u làá dū úǹ Daafiidi naantiiu ubɔ kí kàan̄ u-beejal puee^g. 31 An nìn sá Meesiya fìkititam pu ní u nìn sòon̄ ki yóoǹ yii:

<Waa làá dāá gbíntí ditaŋkpiilin,

u-wunti mun kaa làá dāá sūū.>

32 «Yeesu gbanti ní Unimbɔti fīkitì, timbi kɔkɔ ká ki sá seeradambi. 33 Ti-Baa Unimbɔti kāaǹ-u yilpu u-ŋaŋgiil pú, ní ki tīī-u u-Fam, kii u nín nìn pée pōoǹ puee. Tin tin ni wāĺ ki gbìl̄ kɔŋkɔnneeyee, Circir Fam min Yeesu tīiń-tee tuuŋŋi dee. 34 Di sá Daafiidi u-ba kaa nìn jɔ́m̀ yilpu, ama ki mun lī ki síiǹ yii:

<Ti-Dindaan tùkū m-Dindaan yii:

Kàl̄ m-ŋaŋgiil pú

35 kí nīn cí ŋyunti ŋun m làá dāá yàntī

á nīn kíǹ ki tɔ́kɔ́ a-nannanliibi puee^h.>

36 «Isirayeel maaliŋun yab kɔkɔ, béémaan nì ibaamɔn poon yii, Yeesu un ni kpáá ndɔpuntikaa puee, Unimbɔti dū-u ki ŋá ti-Dindaan ki lēē yii ú nīn sá Meesiya.»

37 Bi nín gbìl̄ tibɔti gbantee, ní bi-pɔbiliŋ máĺ tiŋan, ní bi fātìi bālifì Peetroo nì akpambal ŋin kíǹee yii: «Ti-nabiyaamu, mimmee, ti làá ŋá mana?» 38 Ní Peetroo kíí-bi yii: «Kpántímaan ni-bimbim, báà ŋma ń yàntī bí fàl̀-u Unimbɔti nyim Yeesu Kriisitoo yindi pu, ní Unimbɔti ń dū ni-kpitii kí pɔ̄-ni. Ní ní fōō Circir Fam min Unimbɔti nìn pōoǹee. 39 Kun puee u-poondi gbanti sá ki tīī nimbi, nì ni-biyaamu, ki kpáaǹ bin bí ndanee, nì dinikitikpaandi din kɔkɔwoooo ti-Dindaan ti-Nimbɔtiu làá dāá yíińee.»

40 Peetroo gíti yōoǹ anyɔɔbun tikpil ki sòoǹ ki sáŋkí-bi yii: «Nyāmaan waanee nib bin nóó isaŋkpitee kansikin, kí kámaan difiil!» 41 Bin fōō Peetroo bɔti ki kííyee yāntì bi fùl̄-bi Unimbɔti nyim. Yaadal wiiŋŋuee, binib bin kútì Yeesu boonnooliibi puee wíiŋŋu nìn bàn̄ kutukub bita nyɔkɔm.

Kriisitoo nikitil dipeepeekaal

42 Bi nìn pɔ̄ɔntí bi-ba ki bífí tin akpambal dàkà-bee, ki kpáfí kinyɔɔbaantii nì kunabitiiun, ki jīǹ ti-Dindaan jikaati, ki kpáfí dicilpu ki mèé Unimbɔti. 43 Tifaandi nìn kɔ́ báà ŋma maamaacib nì tidaandi tin akpambal nìn ŋáańee pu. 44 Bin nìn fōō ki kííyee nìn kpáfí dibɔbibaantiil, ní báà ŋma wanti nìn sá ki tīī bi-kɔkɔ. 45 Bi nìn nyáfí bi-sati nì bi-wammɔntiiti, ní ki yàkatī ki tìì báà ŋma nín máaǹ puee. 46 Kutaa kamaayee, bi nìn dòoń múlmul kunimbɔtidiin dicilpu ki nyɔ́ŋkí Unimbɔti, ki kpáfí akiti akiti adiinni ki jīǹ ti-Dindaan jikaati, ki jīǹ tijikaal nì dipɔɔbaantiil nì dipɔɔpindi poon, 47 ki nyɔ́ŋkí Unimbɔti. Samaa kɔkɔ nìn néeń bi-bɔti. Ní kutaa sá kamaayee, ti-Dindaan gbēentí bin kāntí difiilee wíiŋŋu.