Maatiiu 26

Yeesu nannanliibi nín kpáfì kinyɔkɔ u-pu kí kpɔ̀-u puee

(Kpèè Maar 14.1-2, Luuki 22.1-2, Yoow 11.45-53)

1 Yeesu sòon̄ an bɔti ki dóòyee, ní ki bí u-boonnooliibi yii: 2 «Kéè ni nyí yii an kíǹ iwiin ili dee tí jī Dilákatil jiŋaaliuaa^a! Niin ní bi làá dū man Kinibiki kí ŋúbiǹ m-nannanliibi bí kpáá-mi ndɔpuntikaa pu.»

3 Ní bisaraaŋakpilib nì Juuda yab tindaŋkpilib kpáfì usaraaŋakpil un bi yíì Kaayiifee naakookun, 4 ki sòon̄ ki bɔ́ntì kí cúú Yeesu dibalin kí kpɔ̀-u. 5 Ama ní ki lī yii: «Án taa nín̄ sá jiŋaalin, án nín làá ŋá pu samaa ń taa láa yīkì kí jáǹ-tee.»

Unimpu ubɔ yāaǹ Yeesu pu talaalu

(Kpèè Maar 14.3-9, Yoow 12.1-8)

6 Yeesu nín nìn bí Beetanii, Siimɔn un nìn sá unyaŋgbantee dumpuee, 7 ní unimpu ubɔ sútìń ki pìl̄-u ki ŋúbiń talaalumɔnti un pɔ̄ɔ̄ kudaau tikpilee, an kā ditaŋkpal kpalbanyaaŋwun^b. Ŋyunti ŋun Yeesu kā ki jīǹ tijinee, ní u kpáatì talaaluee ki sītì Yeesu yil pu. 8 Yeesu boonnooliibi nín ká mimmee, an kaa mɔ́ɔkiǹ-bi, ní bi bí yii: «Ba pu ní bi bíil̀ talaalumɔnti nee míǹ? 9 Bi bàà ŋūǹ kí nyāfì-u animbikpaan kí dūú yàkatī biwɔfibaa!»

10 Yeesu gbìl̄ bi nín bí ki sòoǹ tiŋyee, ní u bíi lìǹ-bi yii: «Ba pu ní ni páb́ unimpu nee míǹ? An sá ditummɔntiil ní u ŋá ki tīī-mi. 11 Kun puee ni nì biwɔfib di làá nīn pée bí baabadal^c, ama man kaa làá nīn bí ni-cee baabadal. 12 U nín yāaǹ m-wunti pu talaalu nee, u bɔ́ntì-tì ki síiǹ m-síbitam dee^d. 13 Ibaamɔn ní m tùkù-ni, duulinya jaŋŋi kɔkɔ, laakin ní bi dāa sòoǹ tibɔmɔntiil neeyee, bi làá dāá sòoǹ unimpu nee nín ŋá min nee kí nīn téetí u-pu.»

Juudasi dū Yeesu ki nyáfiǹ u-nannanliibi

(Kpèè Maar 14.10-11, Luuki 22.3-6)

14 Ní akpambal saalaa nì alee kansikin un bi yíì Juudasi Isikaariyɔtee cūtì ki ká bisaraaŋakpilib, 15 ní ki bí-bi yii: «Ni làá tīī-mi ba ní ḿ nyàab̀ nsan ŋun ni làá dī kí cúú Yeesuee?» Ní bi kàan̄ animbil jitɔmbi mmuŋku nì saalaa ki tīī-u^e. 16 Ŋyunti gbantee ní Juudasi kíĺ ki nyàab̀ nsan kí dū Yeesu kí ŋúbíǹ-bi.

Yeesu nì u-boonnooliibi jíń Dilákatil jiŋaaliu

(Kpèè Maar 14.12-25, Luuki 22.7-23, Yoow 13.21-30, 1 Kɔra 11.23-26)

17 Jiŋaal un bi ŋmóò kpɔnɔb bin baa ŋá ŋkpɔnɔnyɔkɔee wimpeepeekaaŋuee, Yeesu boonnooliibi dɔ́miń ki bālifì-u yii: «La ní a là tí bɔ́ntí-si Dilákatil jiŋaaliu jinti ní?» 18 Niinee ní u bí-bi yii, cùmaan kitiŋin ŋmɔŋŋmɔkɔ dumpu kí tùkù-u yii: «Ukpil bí yii: <M-yuntiŋu bāań ní nee, ní sii cee ní man nì m-boonnooliibi làá jī Dilákatil jiŋaaliu.>» 19 Ní bi ŋá kíí Yeesu nín tùkū-bi puee, ki bɔ́ntì jiŋaalee.

20 Kujoou jóotèe, bi nì u kāl̀ ki bíi jīǹ tijin. 21 Bi bíi jīǹee, ní u bí-bi yii: «Ibaamɔn ní m sòoǹ, ni-kansikin ubɔ làá dū-mi kí tīī m-nannanliibi.» 22 Niinee kunimbaau kɔ́-bi ní bi kíĺ ki bíi bàlifī-u ubɔ ubɔ yii: «Ukpil, kéè an kaa sá mamaa!» 23 Ní Yeesu kíí-bi yii: «An sá man nì un jīǹ disambibaantiilinee^f di làá dū-mi kí ŋúbíǹ m-nannanliibi. 24 Man Kinibiki cá kí kpú ní nee, kii an nín ŋmàn̄ m-pu ki yóoǹ miŋyee^g, ama mbusu dɔ̄ ki cí un làá dū-mi kí nyāfiǹ m-nannanliibee! Bi yaa kaa bàà màl̄ udaan, an bàà sɔ́.» 25 Ní Juudasi un bíi cáá-u ki nyáfée bālifì-u yii: «Ukpil, man di làá dū-si kí tīīii?» Ní Yeesu kíí-u yii: «Iiin.»

Ti-Dindaan jikaati

(Kpèè Maar 14.22-26, Luuki 22.14-20, 1 Kɔra 11.23-25)

26 Ŋyunti ŋun bi bí ki jīǹee, ní Yeesu yōoǹ kpɔnɔ ki pàkā Unimbɔti, ní ki cúu gífì ki yākatì ki tīī u-boonnooliibi, ní ki bí-bi yii: «Fōō kí ŋmɔ́maan! An di sá m-wunti.» 27 Ní ki tí yōoǹ ndamam ní ki jáam̀ Unimbɔti mi-pu, ní ki dūu tīī-bi, ní ki bí-bi yii: «Ni-kɔkɔ fōō kí nyɔ̀maan! 28 An di sá m-fatikuu un nyáń ki cáań mpèé Unimbɔti nì binib tikpil kansikin bí ká bi-kpitii pɔ̄tamee^h. 29 Ibaamɔn ní m tùkù-ni, m pée gíti kpá kí nyɔ̀ ndaam nee kí nīn cí daliŋkin man nì ni làá dāá gíti kpāfì kí nyɔ̀ ndaam min sá mpɔmee m-Baa Beelinee.» 30 Ŋyunti ŋun bi gāā jiŋaal laŋyi ki dóòyeeⁱ, ní bi nyáń ki búntì Ɔliifi sufii jool pu.

Peetroo làá dāá néé yii waa nyí Yeesu

(Maar 14.26-31, Luuki 22.31-34, Yoow 13.36-38)

31 Niinee, Yeesu bí u-boonnooliibi yii: «Bi nín làá ŋá-mi puee làá yàntī ni-kɔkɔ ń fá-mi kunyeeu nee gba, kii Unimbɔti gbɔŋku nín sòon̄ ki síiǹ puee yii: <M làá kpɔ̀ upikpaal ní ipii ń yàl̄^j.> 32 Ama m yaa láa fīkitèe, m làá lìntī kí cùú cīití-ni Galiilee». 33 Ní Peetroo kíí-u yii: «Báà bi-kɔkɔ yaa féeń-si, man kpá kí fá-si jaanjaan!» 34 Ní Yeesu bí-u yii: «Ibaamɔn ní m tùkù-si, díǹ nyeeku gba, kí wàatī ukooja ń bāakèe, a làá néé mita ní yii saa nyí-mi.» 35 Ní Peetroo kíí-u yii: «Báà an yaa sá-mi ŋkúm, man nì si làá kpú, man kpá kí néé yii maa nyí-si!» Ní u-boonnooliibi bin kɔkɔ kíǹee mun lī míǹ mbaantiim.

Yeesu bí Geetiseemanee ki mèé Unimbɔti

(Kpèè Maar 14.32-42, Luuki 22.39-46)

36 Niinee ní Yeesu nì u-boonnooliibi bàn̄ laakin bi yíì Geetiseemaneeyee^k, ní u bí-bi yii: «Kàl̄maan doo, man làá cù nyɔkɔpu doo kí mèè.» 37 Ní u kpáaǹ Peetroo nì Seebeedee jipɔmbi liitil. Niinee, u kíĺ ki kpáàa bíi gbìl̀ dinimbinaamandi nì kunimbaau pu, 38 ní ki bí-bi yii: «Kunimbaau kɔ́-mi tikpil, ki cáǹ-mi ŋkúmin! Nín̄ kāmaan doo kí nīn wāĺ kí taa gèeǹ!» 39 Ní Yeesu sútì nyɔkɔpu fiii ní ki tātìi dōoǹ dicincibil ní ki bíi mèé yii: «M-Baa, falaanyɔkaa nee yaan ŋūǹ kí kàkatī kí wàatī-mi! Ama, min sii lèe nín ŋá, án taa ŋá min man lèe.»

40 Ní u fātìi gítìń u-boonnooliibi bitee cee ki ká bi dɔ̄ ki gèeǹ, ní u bí Peetroo yii: «Naa kpáàa ŋūǹ man nì ni ń kàl̄ kukúbambaantiiu kpaŋkpam ní taa gèeǹaaa? 41 Fìntīmaan kí nīn mèé, án nín làá ŋá pu ni yaa kɔ́ icɔŋkinee ní taa lítée. Unil bàà cáá nlandɔkɔmɔnti, ama ní ki bí iwɔfin.» 42 Ní Yeesu fātìi tí nín gítí nliliitiim ki tí mēē yii: «M-Baa, an yaa sá yii m yaa kaa nyùn̄ falaa nee waa ŋūǹ kí jītée, a nín là puee ní ń ŋá!» 43 Ní u fātìi tí nín gítiń ki bāańee, bi tí dɔ̄ ki gèeǹ, kun puee ŋgeem nìn cáá-bi tikpil. 44 Ní u gíti tí yāntì-bi ki fātìi nín gítí ntataatiim, ki tí mēē ki būsì tibɔbaantiil. 45 Míǹ boonee u fātìi nín gítiń u-boonnooliibi cee, ní ki bí-bi yii: «Ni dɔ̄ ki gèeǹ ki ŋùŋfāa! Kpèè, kukúluu kun bi làá dū man Kinibiki kí nyāfiǹ binikpitibee bāań ní nee. 46 Yīkì, tí nīn cámaan! Un làá dū-mi kí nyāfèe di bāań nee!»

Bi cúú Yeesu

(Kpèè Maar 14.43-50, Luuki 22.47-53, Yoow 18.2-11)

47 Yeesu kaa láá sòon̄ ki ŋmíl̀, ní u-kpambaliŋ saalaa nì alee kansikin un bi yíì Juudasee bāań u nì kunipaau nóoń ki ŋúbiń njimu nì atambɔn. Bisaraaŋakpilib nì Juuda yab tindaŋkpilib di nìn túnní-bi. 48 Úǹ un làá dū Yeesu kí nyāfèe nìn tīiń-bi kudaaŋŋu yii: «Un m yaa tin jáam̀ ki kpàl̄ee, un ni nyàab̀ee dee, ní cúú-u!» 49 Dicilpu niinee, u sútì ki pìl̄ Yeesu, ki bí-u yii: «Ukpil, a-jooku!» ní ki kpàl̄-u. 50 Ní Yeesu bí-u yii: «M-bɔɔ, ŋá tin pú a dɔ́mińee!» Niinee ní binibee dɔ́miń ki cúú Yeesu. 51 Bin nìn bí Yeesu ceeyee kansikin ubɔ fɔ́fì u-tàataajiki ní ki gāā ki wúkutì usaraaŋakpil tɔntɔnliu tafal^l. 52 Ní Yeesu bí-u yii: «Gíiǹ a-tàataajiki kí fúuń kujitooun, kun puee bin kɔkɔ yaa yōoǹ njimuee, njimu di làá dāá kpɔ̀ bidambi. 53 A nyí yii maan ŋūǹ kí yíiń m-Baa ń jòoń-mi, ní ú tīiń-mi niin niin ituun kutukub kutukubaaa? 54 Ama, m yaa ŋá mimmee, mana ní Unimbɔti gbɔŋku nín sòon̄ ki síiǹ m-pu miŋyee làá ŋmā kí ŋá?»

55 Niinee ní u fātìi bí kunipaauee yii: «M sá unikpiti naaa? Ba pu ní ni ŋúbiń ntàataajimu nì atambɔn kí dāá cúú-mi! Baabadal m kàal̀ kunimbɔtidiin ki dàkà, ba pu ní naa cúú-mi niin? 56 Ama tin bí nee kɔkɔ bāań, án ŋá kii Unimbɔti bɔnaatiliibi nín ŋmàn̄ ki síiǹ m-pu miŋyee^m.» Niinee ní u-boonnooliibi kɔkɔ sáǹ ki fá-u.

Bi cáá Yeesu ibɔsoon Juuda yab kpilib cee

(Kpèè Maar 14.53-65, Luuki 22.54-55, 63-71, Yoow 18.12-14, 19-24)

57 Bin nìn cúú Yeesuee cáá-u ki cūnnì usaraaŋakpil Kaayiifi dumpu, niin ní bimaradakaliibi nì bitindaŋkpilib nìn kpáfì. 58 Ní Peetroo táá Yeesu aboon aboon ki tin bàn̄ usaraaŋakpil dumpu ki kāl̀ u-tɔntɔnliibi cee kí kpèè án nín làá kúntí miŋyee.

59 Bisaraaŋakpilib nì bibɔsoonliibi bin kɔkɔ kíǹee bíi nyàab̀ un làá ká nnyimɔn ŋubɔ kí sòoǹ u-pu bí ká nnaakpal kí kpɔ̀-uee. 60 Ama, nì min kɔkɔ binib dɔ́miń kupaau ki cáań inyimɔn seerab ki túǹ u-puee, báà ubɔ yɔu kaa kāl̀ⁿ. Boonee ní bili dɔ́miń ki bí yii: 61 «Kijapaai nee bí yii, úǹ ŋūǹ kí wīī kunimbɔtidii kí fàtīí mā-ku iwiin ita^o.»

62 Niinee ní usaraaŋakpil yíkì ki bí Yeesu yii: «Binib nee nín bí ki sòoǹ a-pu miŋyee, ba ŋá ní saa kíikí ní?» 63 Ama ní Yeesu ŋmí-bi fɔ́ŋfɔŋ. Ní usaraaŋakpil gíti bí-u yii: «Nì Unimbɔti un bí dimaŋfalinee ní m pūtì ki tīī-si, á tùkù-ti a yaa sá Meesiya, ki sá Unimbɔti Jipɔɔn!» 64 Ní Yeesu kíí-u yii: «Míǹ ní a lī nee. Ama m tùkù-ni yii, kí yòon̄ kɔŋkɔnnee, ni làá ká man Kinibiki kā Mpɔŋkɔdaan ŋaŋgiil pú, ki làá dāá ká m nyánní yilpu atagbanni ki dòoń^p.» 65 Niinee, usaraaŋakpil dáaĺ ki cátì tiwan tin u pēēyee, ní ki bí yii: «U ŋèeǹ nì Unimbɔti ní! Ti gíti nyàab̀ seeradambi kí ŋá ba? Nimbi ni-ba, ni gbìl̄ u nín ŋèeǹ nì Unimbɔtee. 66 Ni ká yii ba?» Ní bi kíí-u yii: «U máaǹ ŋkúm ní^q!»

67 Niinee ní bi kíĺ ki tíiĺ timɔtan ki làbitī u-nimbiin ní ki gbáà-u aŋaŋkul, ní biba mun fátí-u itampa^r 68 ki lì-u yii: «Sii un bí yii a sá un Unimbɔti lēē ki túnnée, dàkà yii a sá Unimbɔti bɔnaatiliu, tùkù-ti un di fáá-see!»

Peetroo néé yii waa nyí Yeesu

(Maar 14.66-72, Luuki 22.56-62, Yoow 18.15-18, 25-27)

69 Ŋyunti ŋun Peetroo nyáń mmɔŋki ki kā dicindinee, usapɔɔn ubɔ un bí niin ki tūǹ ditundee sútìń ki pìl̄-u, ní ki bí-u yii: «A mun nìn bí Yeesu Galiilee yɔuee cee ní!» 70 Ní Peetroo néé báà ŋma nimbiin yii: «Maa nyí tibɔti tin a sòoǹ nee.» 71 U còom̄ ki cá kipunyɔkɔ watil púee, ní usapɔɔn ubɔ mun gíti ká-u, ní ki tùkū bin bí niinee yii: «Kijapaai nee mun nìn bí Yeesu Naasaareeti yɔuee cee ní.» 72 Ní Peetroo gíti tí néé ki pūtì yii: «Maa nyí uninja gbanti!» 73 An kútì fiiiyee, bin bí niinee mun sútìń u-cee ní ki bí-u yii: «A mun lafun sá binib bin nóó-uee kansikin ubɔ ní, a-sòontam dàkà míǹ.» 74 Niinee ní u kíǹ ki bíi pùtī ki tíntí yii: «Maa pée nyí kijapaai nee!» Kpalaayee, ní ukooja báakì. 75 Niinee ní Peetroo téetì dinyɔɔbundi din Yeesu bàà lī-uee, yii: «Kí wàatī ukooja ń bāakèe, a làá néé ŋfunyɔm mita yii saa nyí-mi^s.» Ní u nyáń ki súń ki yáliŋkì.