Malakii i

Kugbɔŋu kun sòoǹ

Malakii

puee

Tibɔkilkaal

Bi ŋmàn̄ Malakii gbɔŋku abin 450 nyɔkɔm ní Yeesu nín dɔ́miń duulinyan. Juuda yab bin bi nìn cúú kuyuŋu ki cūnnì Babiloon tiŋkinee fātìi gítìń bi-tiŋki pu abin dilaataal boon dee. Isirayeel samaau nín nyánní kuyuŋu ki fātìńee, bi nìn kíĺ ki bíi féeń nnimbɔtisan fiii fiii, ki kɔ́ diwuŋyɔtilin. Abin mmuŋku nì saalaa àá imuŋku ili nì saalaa kí wàatī Unimbɔti bɔnaatiliu Malakii ń sòoǹ Unimbɔti bɔtee, Isirayeel yab nìn fōō Agaayi nì Sakari nyɔkɔ ki fātìi máń kunimbɔtidii Jeerusaleem. Kí yòon̄ ŋyunti gbantee, dimákal din gɔmina Sooroobabeel nìn líì-bi yii bi-tiŋki làá cù nyɔkɔpuee, an kaa ŋá míǹ. Ŋyuntee, Eesiraasi nín nìn bɔ́ntì dinimbɔtinool puee kaa láá kíĺ. Dinimbɔtinool nì nlandɔkɔmɔnti bíil̀: bi fātì bi-boon ki tīī dinimbɔtinool (1.6-14), saraabi yuntiŋuee bi kíiĺ Unimbɔti (3.6-11). Bisaraaŋaliibi kaa ti ŋūǹ kí tɔ̄ bi-tundi, ní baa ti tɔ́ mara un Unimbɔti tīī u-nibulee (2.1-16).

Unimbɔti bɔnaatiliu ceeyee, tin bí nee pu ní u làá dī kí tīī bisaraaŋaliibi nì samaa kunyannyaau bí kpántí bi-ba kɔkɔ, kí téetí-bi Unimbɔti neendi (1.1-5), cilinjee kí téetí-bi u-bɔsooŋyi nì u-gítintam nín tóobiń puee (2.17–3.5, 3.13-24). U tùkū-bi yii Unimbɔti làá tɔ̄ń u-tuuŋŋu (3.1) nì u-bɔnaatiliu un bí kii Eeliiyee (3.23). Maatiiu nì Luuki gbɔnti poonee, Malakii poondi nee sá ki tīī Yoowaneesi un fùul̀ binib Unimbɔti nyimee ní. Úǹ ní Unimbɔti nìn túnní ú dāá bɔ́ntí Yeesu dāantam (Maat 17.11-13, Luuki 1.17).

Malakii nín yíkìi tāā ki bíikì u-yuntiŋu yab pu bi nín bíil̀ dinimbɔtinool nì nlandɔkɔmɔnti puee, u nìn bíi bɔ́ntí samaa un nóó Unimbɔtee ń ŋá ubaanti nì Unimbɔti dee. Míǹ mbaantiim ní u tí bíi yíì ti mun díǹ yii ti nì Unimbɔti ń ŋá ubaanti.