Sakari i

Kugbɔŋu kun sòoǹ

Sakari

puee

Tibɔkilkaal

Bi bàà ŋūǹ kí nīn yíì Sakari gbɔŋku dimákal gbɔŋku. Ku dàkà cilinjee Isirayeel nibul mákal nín nìn sá pu iyunti poonee ní.

Tiŋman kugbɔŋu nee yākatì ajan ali.

- Dijampeepeekaal (ayil 1–8) poonee, ti kāntí tibɔnaatikaal nì ŋyunti ŋun ní bi nāatì-tèe. Unimbɔti bɔnaatiliu Agaayi yuntiŋu yab ubɔ di nāatì tibɔti gbanti. Sakari nìn sòoǹ kii tibɔti tin bi ká dileedakal poonee ní. Aleedaka gbanti dàkà-ti yii kí fàtīí mā kunimbɔtidii nì kí bɔ́ntí Jeerusaleem tiŋki ń fàtīí gítí ki-paaŋŋu puee di làá pìitī nsan bí kɔ́ ŋyuntipɔɔn poon. Kí kɔ́ ŋyuntipɔɔn gbantinee, Unimbɔti nìn lēē gɔmina Sooroobabeel nì usaraaŋakpil Joosuwa ní.

- Isirayeel yab mákal làá cúntí nsan ŋyunti ŋun ní Unimbɔti làá dāá jī dibeel kitiŋ kɔkɔ puee. An kpáàa nóó nì ditundi din Unimbɔti lēē unil ubɔ ú tɔ̄ee.

Sakari gbɔŋku janliliitiil (ayil 9–14) bɔti tin bi ŋmàn̄ boonee cɔ́ tibɔti tili nee pu ní. Tì dàkà un làá cáań Unimbɔti beelee daanti. Udaan làá nīn sá kii ubɔti un sīntì u-ba taapuee, ki sá ujajil, ki sá kii upikpaalee àá ntuun ŋun bi kūūyee. Maatiiu nì Maarki nì Luuki nì Yoowaneesi gbɔnti poonee, bi dàkā yii Yeesu nì u-tundi pu ní tidaandi gbanti sòoǹ, cilinjee laakin an sòoǹ u-kúm puee (kpèè Maat 21.4-5, 26.31, Maar 14.27 nì Yoow 19.37).