Agaayi 2

Kunimbɔtidii kun bi fātìi máńee nyaaŋku

1 Daariyusi nín kāl̀ dibeel abin ali uŋmaluluúti iwiin mmuŋku nì ŋubɔ dal ní ti-Dindaan sòon̄ nì u-bɔnaatiliu Agaayi. 2 U nìn bí ú tùkù Seeyaltiyeel jipɔɔn Sooroobabeel, Juuda yab gɔminau nì Yoosadaaki jipɔɔn Joosuwa usaraaŋakpil, nì samaa un kɔkɔ kíǹee yii: 3 «Ubɔ bí ni-kansikin ki nìn ká kunimbɔtidii kukpikuuee nyaaŋkuɔɔɔ? Ni wāĺ kupɔŋu nee kúǹ mana? Naa ká yii kúǹ kaa bí tibanaaa? 4 Kɔŋkɔnnee, Sooroobabeel, ká kunyannyaau! Man ni-Dindaan di lī míǹ. Yoosadaaki jipɔɔn Yoosuwa usaraaŋakpil, ká kunyannyaau. Nimbi kitiŋ nee kɔkɔ nib, kámaan kunyannyaau. Kíĺmaan ditundi, man bí ni-cee. Man ni-Dindaan Mpɔŋkɔdaan di lī míǹ. 5 M nín nìn nyántìń-ni Eejipiti tiŋkinee, m nìn lēē kí ŋá míǹ kí tīī-ni. M-Fam làá nīn bí ni-kansikin, ní taa fàŋkì tiba. 6 Tiŋman, man ni-Dindaan Mpɔŋkɔdaan nín lī puee sɔ̀. Án kaa làá ti yúntí m làá cìŋkì yilpu nì taapu nì tiŋku nì kitiŋ^a. 7 M làá cìŋkì atimbun kɔkɔ ní ŋi-gaajati ń kpìntīí dāan̄ doo. M làá yàntī tinyool ń gbí kudii nee. Man ni-Dindaan Mpɔŋkɔdaan di lī míǹ. 8 Di sá yii, man di yì sindaariya, man di tí yì animbil. 9 Míǹ puee kunimbɔtidii kun ni fātìi máń nee nyooti làá nīn jítiǹ kukpikuu. Man ni-Dindaan di lī yii niinee, m làá tīī-ni ŋgbansɔŋfi. Man ni-Dindaan Mpɔŋkɔdaan di lī míǹ.»

Dinibul bí tijɔkɔndin

10 Daariyusi nín kāl̀ dibeel dibinliliitiil ŋmawawatiu iwiin mmuŋku nì inaa dalee ní ti-Dindaan sòon̄ nì u-bɔnaatiliu Agaayi. 11 U bí-u yii ú bàlifì bisaraaŋaliibi tibɔti nee taapu: 12 «Tí lì yii ubɔ dū saraa nanti ki ŋá dibɔkutil lookun. Boonee, dibɔkutilee gbēē kpɔnɔ àá tikuŋfaal àá ndamam àá ŋkpam àá tijin tin kamaa an yaa pée sée. Mimmee tijin gbanti làá kpántí circir jintaaa?» Ní bisaraaŋaliibi kíí-u yii: «Aayee». 13 Ní Agaayi gíti bālifì yii: «Ubɔ yaa gbēē dinikpil ki kɔ́ tijɔkɔndin ní ki gbēē tiwan gbanti kɔkɔee, tì làá kpántí tijɔkɔŋwanaaa?» Ní bisaraaŋaliibi kíí-u yii: «Iiin, tì làá kpántí tijɔkɔŋwan.» 14 Ní Agaayi fātìi bí-bi yii: «Too, ti-Dindaan nín lī puee sèé: <Míǹ ní kitiŋ nee nib nì atuun ŋin bi tūǹee bí. Míǹ ní tin kɔkɔ bi cāabìń ki ŋáań-mi saraayee kɔ́ tijɔkɔndi>».

Ŋyunti nee ní an sá tí dàkafì

15 Ti-Dindaan gíti bí yii: «Kɔŋkɔnnee, ní dàkafì kí yòon̄ díǹ kí nīn cée, tin làá jītée. Kí wàatī ní kíĺ kí dū ataŋkpee kí tɔ́kɔń tɔb pu kí mā man ni-Dindaan diikuee, 16 ba di nìn jītí ni-pu ní? Ubɔ yaa nìn bíi gbáà ndibɔɔ ki dàkafī yii u làá ká asambil mmuŋkuee, saalaa ní u dāa kāntí. Ubɔ yaa nìn cūtì u-dalɔŋkun kí kpíĺ ndaam liitirib imuŋku ili nì saalaayee ní ú dūú ká liitirib mmuŋku. 17 M kɔ́ǹ-ni agìń ni-tuuŋŋi kɔkɔ poon. M yāntì ni-kpaajinti tiba kūń, tiba bùkū ní ataanyiŋkumbil lítì ki bíil̀ tiba, ama naa fātìi gítìń m-cee. Man ni-Dindaan di lī míǹ. 18 Kí yòon̄ díǹ kí nīn cée, ní dáań tin làá jītée kí yóoń. Díǹ wiiŋŋu ŋun ni bíl̀ man ni-Dindaan diiku nyeel nee sá uŋmawawati iwiin mmuŋku nì inaa ní. Ní cúú kí yóoń! 19 Kéè tijimpin kaa kíǹ cakalaabinaa! Ki kpáaǹ isufi in bi yíì fiinyi nì fiigi nì greenaadi nì ɔliifee kaa lòon̄aa! Ama kí yòon̄ díǹ kí nīn cée, m làá bìin̄ ni-pu.»

Ti-Dindaan pōoǹ Sooroobabeel dipoondi

20 Iwiin mmuŋku nì inaa dal gbanti mbaantee, ti-Dindaan gíti sòon̄ nì Agaayi nliliitiim. 21 U nìn bí ú tùkù Sooroobabeel, Juuda yab gɔminau yii: «M làá cìŋkì kutagbɔŋu nì kitiŋ. 22 M làá lábití bibɔtiibi beejaliŋ kí cìb̄, ní kí kúntí atimbun beeŋi pɔŋyi. M làá lábití janjatɔrɔkub nì bin kā bi-puee kí cìb̄. Bi làá dāá kpɔ̀ itaamu ní bitanjakaliibi ń kpɔ̀ tɔb. 23 Ama ŋwiin gbantee, sii Seeyaltiyeel jipɔɔn Sooroobabeel un sá man tɔntɔnliuee, m làá ŋúbíǹ-si ditundi diba, ti-Dindaan nyɔɔbundi dee. M làá dū-si kí ŋá m-jaliiki kin m cáa nyìitī ki dāantí m-wantee, kun puee sii ní man lēē. Man ni-Dindaan Mpɔŋkɔdaan di lī míǹ.»