Agaayi 1

Kugbɔŋu kun sòoǹ

Agaayi

puee

Ŋyunti ŋun sá bí fàtīí mā kunimbɔtidiiyee bāań

1 Daariyusi nín kāl̀ dibeel abin ali iŋmal iluu wimpeepeekaaŋu dalee ní ti-Dindaan sòon̄ nì u-bɔnaatiliu Agaayi. U nìn bí ú tùkù Seeyaltiyeel jipɔɔn Sooroobabeel un sá Juuda yab gɔminauee, nì Yoosadaaki jipɔɔn Joosuwa un sá usaraaŋakpilee yii: 2 Man ni-Dindaan Mpɔŋkɔdaan nín sòon̄ puee sèé: «Binib nee lì yii: <Ŋyunti ŋun ti máaǹ kí fàtīí mā kunimbɔtidiiyee kaa láá bāań.>» 3 Ŋyunti gbanti ní ti-Dindaan dī u-bɔnaatiliu Agaayi pu ki sòon̄ nì bi yii: 4 «Mimmee ŋyunti ŋmāntì nimbi ń nīn kóò adinyaan poon ní man diiku ń lítí kí kpántí kudigbuŋuɔɔɔ? 5 Kɔŋkɔnnee, man ni-Dindaan Mpɔŋkɔdaan nín sòon̄ puee sɔ̀. Dàkafìmaan tin poon ni bí nee pu tiŋan! 6 Ni búĺ tikpil ama ní ki cáń fiii, ni jīǹ ama ní kaa díkì, ni nyù ndaam ama ní an kaa nyàatī-ni, ni pèentí abɔkuti ama ní tiwool gbíntìi cáá-ni, ní utɔntɔnli ń fōō tipaal ní án kɔ́ kuloou kun cíl̀ee poon. 7 An puee man ni-Dindaan Mpɔŋkɔdaan nín sòon̄ puee sɔ̀. Dàkafìmaan tin poon ni bí nee pu tiŋan! 8 Jɔ̄m̀maan dijool pu kí cáań idɔ kí fàtīí mā m-Diiku. Án làá mɔ̄ɔkiǹ-mi ní ḿ nyāntí m-nyooti kí dàkà, man ni-Dindaan di lī míǹ. 9 Ni bàà cɔ́tí kí cā tikpil ní ki dūu cáń fiii. M tɔ́ tin ni yōoǹ ki cáań mmɔŋkee pu kubuŋu. Ba pu ní m ŋá míǹ? Man ni-Dindaan Mpɔŋkɔdaan di bālifì míǹ. Di sá yii m-diiku lítì ki kpántì kudigbuŋu, ama ní báà ŋma nimbiliŋ máǹ u-diiku pu. 10 An pu ní utaa kaa jōō, ní kitiŋ mun kaa lòon̄ báà tiba. 11 An pu ní m cáań ŋweel ki tɔ́ kitiŋ nee nì ajoon nì fiinyi nì ɔliifi sufii sati pu, nì tin kɔkɔ kitiŋ pée lòoǹee pu. M cáań ki tɔ́ binib nì ipeel pu, nì tin kɔkɔ ni kùn̄ee pu.»

12 Ní Seeyaltiyeel jipɔɔn Sooroobabeel nì Yoosadaaki jipɔɔn Joosuwa un sá usaraaŋakpilee, nì samaa un kɔkɔ kíǹee pílifì tibɔti tin bi-Dindaan bi-Nimbɔtiu dī u-bɔnaatiliu Agaayi pu ki sòon̄ nì bee. Min Agaayi túń ditundi din ti-Dindaan dūu ŋúbíǹ-uee dee, ní tifaandi kɔ́ samaa kɔkɔ ti-Dindaan nimbiin. 13 Ní Agaayi, ti-Dindaan tuuŋŋu dū tibɔti tin u fōōyee ki nāatì samaa yii: «M bí ni-cee, man ni-Dindaan di lī míǹ.» 14 Ní ti-Dindaan fīntì Seeyaltiyeel jipɔɔn Sooroobabeel, Juuda yab gɔminau landɔkɔŋu, nì Yoosadaaki jipɔɔn Joosuwa, usaraaŋakpil landɔkɔŋu nì samaa un kɔkɔ kíǹee landɔkɔi. Bi nìn dɔ́miń ki fātìi kíĺ ki bíi māā ti-Dindaan Mpɔŋkɔdaan un sá bi-Nimbɔtiuee diiku. 15 An nìn sá dibindi gbanti dibaantiil poon uŋmaluluuti, iwiin mmuŋku nì inaa dal ní.