Yeesu bɔti tin
Maatiiu
ŋmàn̄ee
Tibɔkilkaal
Ti kāntí Maatiiu gbɔŋku poonee abɔjal ŋin Maarki dūu ŋmàn̄ u-gbɔŋkunee:
- Yoowaneesi un fùul̀ binib Unimbɔti nyimee (Maatiiu 3.1-12).
- Bi nín fùl̄ Yeesu Unimbɔti nyim nì Sitaan nín cɔ́ŋkì-u puee (3.13–4.11).
- Yeesu tuuŋŋi ŋin u túń Galiileeyee. U sòon̄ niin Unimbɔti bɔti ki dàkā aniwul, ki cáaǹ bibunliibi (4.12–18.35).
- Míǹ boonee ní u cōom̀ ki cūtì Jeerusaleem (ayil 19–20).
- Yeesu kaa nìn kāl̀ niin ki yúntì, an dàkà yii u pée kāl̀ niin kinyɔŋ kiba ja ní. Kinyɔŋ gbanti kúntitamee, bi nìn cúú-u ki sòon̄ ki kūū u-bɔti, ní ki kūū-u. Ama kun nìn ŋá binib bitiiyee di sá yii u nìn fīkitì ní ki nyántì u-ba ki dàkā u-boonnooliibi (ayil 21–21).
Ama Maatiiu kíĺ u-gbɔŋku ki sòon̄ tikpil (1–2) Yeesu nyeeŋu nì u-màaltam nì u-biyati pu. Kí dūú dī tibɔkilkaal gbanti poonee, u lēē ki dàkā un di sá Yeesu un u làá nóó u-gbɔŋku nee kɔkɔ poonee: u sá Ubɔti nì ufiil un Unimbɔti pōoǹee, ama ní ki sá Eemanuyeel, an dàkà yii Unimbɔti bí ti-cee. U gíti sá un pu Unimbɔti làá dī kí ŋá tin u pōoǹ Dipooŋkpikil poon yii u làá ŋée.
Yeesu bɔti tin Maatiiu ŋmàn̄ee gíti nyáń ti-ba, di sá u kpáfì Yeesu dakaŋ akitikpaan aŋmoo pu ní:
- 1) «Yeesu nín dàkā u-boonnooliibi dijool pu puee» (5–7). Didàkal gbanti poonee, u sòon̄ «Yilpu beel tindambiyaamu nín máaǹ kí yūĺ nì Unimbɔti deedee puee.»
2) Tibɔkpaafikaal tin u tīī bin máaǹ kí sòoǹ Dibeel gbanti dāantamee (ayil 10).
3) U sòon̄ Dibeel gbanti bɔɔŋŋi bɔti tibɔŋmantikaal tiluli poon ní: Dibeel gbanti dáá bí dibalin, ama di-jajil làá dāá nīn sá dikpaandi ní ki cáá tinyool.
4) Min ní unil nì u-nabiyaamu máaǹ kí nīn bí duulinyapɔɔn un di sá Dibeel gbantinee (ayil 18).
5) Min ní unil máaǹ kí kàl̄ kí cīití Dibeel gbanti jajiluŋkikaalee (ayil 24–25).
Yeesu bɔti tin Maatiiu ŋmàn̄ee poonee, Yeesu lēē u-ba ki dàkā yii u sá Ukpil un di dɔ́miń ki pīitì Dibeel gbanti duulinyauee. U gíti tìì bin di kóò Dibeel gbantinee didàkal din bi máaǹ kí nīn nyí ní kí nīn sá biseeradambi binib bin kíǹee ceeyee.