Maatiiu 3

Yoowaneesi sòon̄ Unimbɔti bɔti

(Maar 1.1-8, Luuki 3.1-18, Yoow 1.19-28)

1 Ŋyunti gbantee ní Yoowaneesi un fùul̀ binib Unimbɔti nyimee dɔ́miń ki bíi báakí Unimbɔti bɔti Juudee teekun, yii: 2 «Kpántímaan ni-bimbim kun puee Unimbɔti Beel sútì ki pìlīń-ni.»

3 Yoowaneesi pu ní Unimbɔti bɔnaatiliibi Yeesaya nìn sòon̄ ki bí yii:

«Ubɔ báakí kuteeun yii:

Bɔ́ntímaan ti-Dindaan saŋŋu

kí tàntīmaan u-sàmbiyaamu kí cīití-u^a!»

4 Yoowaneesi nìn pēē ugutaamu kuti bɔkutil ní ki gbìn̄ ŋgban dambalau u-caŋin^b, ní ki ŋmóò inaakitoon nì tisiil ŋmaniŋma. 5 Jeerusaleem yab nì Juudee kɔkɔ, nì bin kóò Jɔɔdan buŋŋu caŋinee kɔkɔ yab nìn dòoń Yoowaneesi cee 6 ki bìitī bi-kpitii pu ní Yoowaneesi fùul̀-bi Unimbɔti nyim Jɔɔdan buŋŋun.

7 Yoowaneesi nín ká yii Fariisab nì Sadusab dòoń ú fàl̀-bi Unimbɔti nyimee, ní u bí-bi yii: «Nimbi bin tū kii ikoowaatee! Ŋma tùkū-ni yii ní sāǹ kí nyā Unimbɔti ŋuul din dòońee ni? 8 Nín̄ tūm̀maan atuun ŋin dàkà yii ni fá ni-kpitiiyee 9 kí taa nín̄ kā ki dàkafī ki gà ni-biŋŋi ki lì yii: <Abraam sá ti-naanja^c>. Ibaamɔn ní m tùkū-ni, Unimbɔti ŋūǹ kí dū ataŋkpee nee kí kpántí Abraam naantiibi. 10 Unimbɔti bɔ́ntì kicɔkɔ ki bíl̀ isufi taapu kí kpìkitī-i. Busubu bun kamaa yaa kaa lòoǹ abimɔntee, bi làá gāā-bu kí tɔ̄ ŋŋmin ní. 11 Man cáá nnyim ní ki fùul̀-ni ki dàkà yii ni bíi kpántí ni-bimbim, ama un làá dāan̄ man boonee làá dāá fàl̀-ni nì Unimbɔti Fam nì ŋŋmi ní. Úǹ cáá mpɔn ki jítiǹ man, maa sàafì kí nīn sá u-yumbuu kí yòon̄ u-naatakaŋ gba. 12 Úǹ ŋúb́ u-yubakalkaaku, ní ki làá bàkal̀ kí gàntī tifin nì idi, ní kí dū idi kí ŋá kulɔŋŋun ní kí dū tifinee kí dūú tɔ̄ ŋŋmi ŋun kaa kúù jaanjaanee ni.»

Yoowaneesi fùl̄ Yeesu Unimbɔti nyim

(Maar 1.9-11, Luuki 3.21-22)

13 Niinee ní Yeesu nyánní Galiilee ki dɔ́miń Jɔɔdan buŋŋu caŋin Yoowaneesi cee ú fàl̀-u Unimbɔti nyim. 14 Ní Yoowaneesi yíì, ki bí-u yii: «Man di bàà máaǹ kí dāan̄ sii cee sii ń fàl̀ man, ní sii gíti dòoń man ń fàl̀-saaa?» 15 Ní Yeesu bí-u yii: «Kíí tí ŋá míǹ kɔŋkɔnnee, kun puee an máaǹ tí ŋá míǹ kí nóó min kɔkɔ Unimbɔti bàlifēe.»

Niinee ní Yoowaneesi kaa ti kpákáǹ-u, ní ki fùl̄-u. 16 Ŋyunti ŋun Yoowaneesi fùl̄-u ki dóò, u bíi nyēeń nnyiminee, kpalaayee ní kutagbɔŋu cúu pīitì, ní u wál̀ Unimbɔti Fam kpákatìń u-pu ki bí kii dibeenanjilee. 17 Niinee ní Unimbɔti sòon̄ní kutaa pu yii: «Un bí nee di sá man Jipɔɔn un m néeń tikpilee, úǹ ní m-pɔbil fáatì^d.»