Maatiiu 4

Sitaan cɔ́ŋkì Yeesu

1 Boonee ní Unimbɔti Fam cáá Yeesu ki cūnnì kuteeun Sitaan ń cɔ̄ŋkì-u. 2 Ní u bóob́ kinyɔkɔ iwiin imuŋku ili, ŋwiimpu nì kunyeeu, ní ŋkùm kíǹ ki cáá-u. 3 Ní Sitaan sútì ki pìl̄-u, ní ki bí-u yii: «A yaa lafun sá Unimbɔti Jipɔɔn, tīī ditaŋkpal nee mara dí kpántí kpɔnɔ.» 4 Ní Yeesu fātìi kíí-u yii: «Unimbɔti gbɔŋku lī yii: <An kaa sá tijin dijil ŋmaniŋma di yì unil maŋfal, ama, unil ń nīn tɔ́ Unimbɔti bɔtee di yì u-maŋfal.^a>»

5 Ní Sitaan cáá-u ki cūnnì Jeerusaleem ki tɔ́kɔǹ kunimbɔtidii yilpu kúnti kunti, 6 ní ki bí-u yii: «A yaa sá Unimbɔti Jipɔɔn, yùkū kí tìin̄ taapu tiba kaa làá ŋá-si, kun puee an ŋmàn̄ Unimbɔti gbɔŋkun yii:

<Unimbɔti làá yàntī u-tuuŋyi

ń nīn tíkí-si i-ŋaaŋyin

a-taal ń taa gbéetí ditaŋkpal^b.>»

7 Ní Yeesu kíí-u yii: «An lī Unimbɔti gbɔŋku poon yii: <Á taa cɔ̄ŋkì ti-Dindaan a-Nimbɔtiu.^c>»

8 Ní Sitaan tí cáá-u ki jɔ́m̀ dijoofɔŋfɔkɔl diba pu, ní ki yāntì u ká abee ŋin bí duulinyanee kɔkɔ nì ŋi-nyooti, 9 ní ki bí-u yii: «A yaa gbāaǹ ki jáam̀-mi, m làá dū an kɔkɔ kí tīī-si.»

10 Niinee Yeesu bí-u yii: «Sitaan, sútí niin kí wàatī-mi! Kun puee an ŋmàn̄ Unimbɔti gbɔŋku poon yii: <Ti-Dindaan a-Nimbɔtiu baba ní an sá á jāam̀, kí nīn bí úǹ baba tundin^d.>» 11 Ní Sitaan cāntì-u ní Unimbɔti tuuŋyi dɔ́miń u-cee ki bíi kèetī-u.

Yeesu kíĺ u-tundi Galiilee tiŋkin

(Maar 1.14-15, Luuki 4.14-15)

12 Yeesu nín gbìl̄ yii bi cúú Yoowaneesi ki pīiǹ sarkee ní u yíkì ki nín cá Galiilee. 13 U bàn̄ee kaa kóò Naasaareeti ní ki tin kóòń Kapeernayum Galiilee mɔɔl caŋin, laakin sá Sabulɔn nì Neefitalii^e tiŋkinee. 14 An ŋá kii Unimbɔti bɔnaatiliu Yeesaya nín nìn sòon̄ ki síiǹ puee dee, yii:

15 «Sabulɔn nì Neefitalii timmu yab,

tiŋku watil pú,

Jɔɔdan buŋgbandi lapu,

Galiilee tiŋki, laakin bin kaa sá Juuda yabee kóòyee!

16 Niin ní inifunaan in kɔkɔ nìn kóò dibɔmbɔndinee

ká ŋwalifikpaan! Bin nìn kā ŋkúm bɔmbɔndinee,

ŋwalifi ŋmíntì bi-pu^f!»

17 Kí yòon̄ ŋyunti gbantee ní Yeesu kíĺ ki bíi sòoǹ Unimbɔti bɔti, yii: «Kpántímaan ni-bimbim, kun puee Unimbɔti beel sútì ki pìlīń-ni!»

Yeesu yíiń bijɔncuuliibi binaa

(Kpèè Maar 1.16-20, Luuki 5.1-11)

18 Yeesu nín bíi kpàkaǹ Galiilee mɔɔlee, ní u ká nnabiyaamu muli: an nìn sá Siimɔn un bi yíì Peetrooyee nì u-naal Andree. Bi nìn sá bijɔncuuliibi ní ki bíi tòó kulaaŋŋu. 19 Ní Yeesu bí yii: «Dāan̄ kí nīn nóómaan-mi, ḿ dū-ni kí kpántí bin cāabìń binib m-ceeyee.» 20 Dicilpu niin ní bi yāntì bi-laanti ki kíǹ ki táá-u.

21 U gíti cūtì nyɔkɔpuee, ní ki ká binib bili, bi mun tí sá unil nì u-naal. An sá Yakubu nì Yoowaneesi, Seebeedee jipɔmbi. Bi nìn kā buŋalimbun bi nì bi-baa ki ŋáŋkí bi-laanti. Ní Yeesu yíiń-bi, 22 ní bi yāntì bi-baa nì bi-ŋalimbu niin, ní ki táá Yeesu.

Yeesu bíi dàkà binib ki cāantí-bi

23 Yeesu nìn yìiǹ Galiilee timmu kɔkɔn ki dàkà akpafidiinni ki sòoǹ tibɔmɔntiil tin sá Unimbɔti Beel bɔtee, ki cāantí bideembi nì bibunliibi kɔkɔ samaa kansikin. 24 Siirii yab kɔkɔ nín gbìl̄ tin Yeesu ŋáańee ní bi cáań bin kɔkɔ būǹ igbaŋween nín pée bí pu iba ibee nì bin bí iyaliŋkin tikpilee, nì bin pu arasiniibi kēe nì bibimbidambi nì bifaliŋfaambi. Yeesu nìn cáaǹ bi-kɔkɔ. 25 Dinikitikpaandi nìn kíǹ ki nóó-u, ki nìn nyánní Galiilee nì ntimu saalaa watil, nì Jeerusaleem nì Juudee tiŋkin nì kitiŋ kin bí Jɔɔdan buŋgbandi lapu puee.