Luuki 5

Yeesu yíiń u-boonnooliibi bipeepeekaabi

(Kpèè Maat 4.18-22, Maar 1.16-20)

1 Ŋwiin ŋubɔee, Yeesu cūtì ki yú Geeneesareeti^a mɔɔgbandi, ní binib dɔ́miń ki múkúǹ u-pu kí pīlifì Unimbɔti bɔti. 2 Ní u ká iŋaliŋfi ili yú dimɔɔgbandi, bilaantɔliibi kpákatì ki bíi fíntí bi-laanti. 3 Iŋaliŋfee kansikinee, Siimɔn yì bubɔ, ní Yeesu cūtìi kɔ́ bu-ni ní ki gbāam̀-u ki lī yii, ú sútí buŋalimbu kí wàatī digbándi kí kɔ́ǹ dimɔɔlin fiii ú sòoǹ nì binib bí ŋmā kí gbìl̄. Ní Yeesu kāl̀ buŋalimbun, ki bíi dàkà kunipaauee Unimbɔti bɔti. 4 U sòon̄ ki dóòyee, ní ki bí Siimɔn yii: «Sútí buŋalimbu kí cùnnì laakin nnyim nyóòyee, sii nì a-bɔɔbi ń tɔ̄ ni-laanti kí cúú ijɔm.» 5 Ní Siimɔn bí yii: «Ukpil, ti dū kunyamɔŋu ní ki tɔ́ tilaandi, kaa cúú báà tiba, ama a nín lēe puee, m làá tɔ̄ kulaaŋŋu.» 6 Ní bi dūu tɔ́, ní ki cúú ijɔm tikpil, áli bi-laanti bíi tìfī^b. 7 Ní bi kábitì bi-bɔɔbi bin bí buŋalimbu bun béeyee nee bí dāan̄ kí tūtuǹ-bi bí dáaĺ ijɔm kí nyāntí. Ní bi dɔ́miń ki dáaĺ ki nyántìń ijɔm ki gbéeǹ iŋaliŋfi liitil, ní iŋaliŋfee bíi múl̀ nnyimin. 8 Siimɔn Peetroo nín ká mimmee, ní u dɔ́miń ki gbāaǹ Yeesu nimbiin ní ki bí-u yii: «M-Dindaan, sútí kí wàatī-mi, kun puee man sá unikpiti ní.» 9 Di sá yii ijɔm in bi nìn cúúyee wíiŋŋu yāntì tifaandi nìn kɔ́ Siimɔn nì u-bɔɔbi, 10 ní ki kɔ́ Seebeedee jipɔmbi Yakubu nì Yoowaneesi, bin sá u-jɔncuujutiibee mun. Ama ní Yeesu bí Siimɔn yii: «Taa fàŋkì! Di sá yii, kí yòon̄ díǹ kí nīn cée, a làá nīn kíǹ ki sá un cāabìń binib m-ceeyee ní.» 11 Niinee ní bi cáań bi-ŋaliŋfii ki yóoǹ dimɔɔgbandi, ní ki yāntì tikɔkɔ ní ki kíǹ ki nóó Yeesu.

Yeesu cáaǹ unyaŋgbanti ubɔ

(Kpèè Maat 8.1-4, Maar 1.40-45)

12 Yeesu nìn bí kitiŋ kiban, ní uninja ubɔ dɔ́miń dinyaŋgbandi píń u-pu. U ká Yeesuee ní ki tātìi dōoǹ dicincibil u-nimbiin u-yigbeel tūū kitiŋ ní ki gbāam̀-u yii: «Ukpil, cáaǹ-mi kun puee m nyí yii a yaa là, a ŋūǹ kí cáaǹ-mi m-wunti ń ŋāŋkì.» 13 Ní Yeesu tāntì u-ŋal ki gbēē-u, ní ki bí-u yii: «M là, Pɔ̄ɔkìm̄!» Niin niin ní dinyaŋgbandi kpáàa wáŋkì uninjee pu. 14 Ní Yeesu kpáafì-u yii ú taa pée tùkù báà ubɔ, ama ní ki bí-u yii: «Cáá a-ba kí dàkà usaraaŋakpil ú béé yii a-wunti ŋáŋkì ní kí cùú ŋá saraa kii Mooyiisi nín yóoǹ mara uŋyee ní usaraaŋalee ń tùkù báà ŋma yii a pɔ́ɔkì^c.» 15 Niinee, Yeesu yindi mɔ̀tīi gbìtī ki cá, ní kunipaau dòoń ki pílifí u-bɔti kí kpáàa ká bi-weeŋyi cáaǹtam. 16 Ama Yeesu nìn cá u-baba laakin binib kpée ki mèé ŋwimmeem.

Yeesu cáaǹ ufaliŋfaan ubɔ

(Kpèè Maat 9.1-8, Maar 2.1-12)

17 Ŋwiin ŋubɔee, Yeesu bíi dàkà binib Unimbɔti bɔti. Fariisab nì bimaradakaliibi nìn kā niin. Bi nìn nyánní Galiilee nì Juudee nì Jeerusaleem timbilimmu kɔkɔn ní. Ti-Dindaan pɔŋŋu nìn bí Yeesu pu ki yàntī u cāantí bibunliibi. 18 U bíi sòoǹee, ní binib biba ŋúbiń uninja ubɔ u sá ufaliŋfaan nlún pu, ki nyàab̀ kí kɔ́ǹ-u Yeesu cee kudiin. 19 Nniwíin puee, baa béè bi nín làá ŋá pu kí bà Yeesuee. Míǹ puee bi jɔ́m̀ kudii yilpu ki cíl̀, ní ki dū ufaliŋfaanee nì u-lúŋŋu ki dūu dīń dibùndee ni ki kpákatì-u ki bíl̀ Yeesu nimbiin kunipaauee kansikin. 20 Yeesu nín ká binib gbanti fōō ki kíí yii u ŋūǹ kí cáaǹ ubunlee, ní u bí ufaliŋfaanee yii: «M-bɔɔ, m dū a-kpitii ki pú-si.» 21 Niinee ní bimaradakaliibi nì Fariisabee kíǹ ki bíi dàkafī bi-pɔbiliŋin yii: «Uninja nee sá ŋma ní ki ŋèeǹ nì Unimbɔti míǹ? Ŋma di ŋūǹ kí dū ikpiti kí pɔ̄? See Unimbɔti baba^d.» 22 Yeesu béè bi nín bíi dàkafī puee, ní ki bí-bi yii: «Ba pu ní ni bíi dàkafī míǹ ni-pɔbiliŋin? 23 Ba di kaa pɔ̄ɔ̄ dilil ní: <A ká a-kpitii pɔ̄tam> di kaa pɔ̄ɔ̄ dilil naaa, <Yīkì kí yūĺ kí nīn còom̄> di kaa pɔ̄ɔ̄ ní? 24 Ama ní béé yii man Kinibiki cáá mpɔn kitiŋ pu kí dū unil kpitii kí pɔ̄. Niinee ní u bí ufaliŋfaanee yii: <Sii yīkìm̄ kí yòon̄ a-lúŋŋu kí nīn kùǹ a-dumpu.>» 25 Kpalaayee ní u nyīī ki yíkì samaa nimbiin, ki yōoǹ u-lúŋŋu ŋun pu u bàà dɔ̄ee, ki pàkà Unimbɔti ki kùǹ u-dumpu. 26 An yāntì báà ŋma fāŋkì ki bākatì sèeee ki pàkà Unimbɔti, ki lì yii: «Ti ká tibɔcan díǹ!»

Yeesu yíiń Leefii ú nóó-u

(Kpèè Maat 9.9-13, Maar 2.13-17)

27 Míǹ boonee, Yeesu nyáń ki búntì, ní ki ká ufɔtil ubɔ, bi yíì-u Leefii u kā fɔtiku diikun. Ní Yeesu bí-u yii: «Dāan̄ kí nīn nóó-mi!» 28 Ní u yíkì ki yāntì u-wanti kɔkɔ, ní ki lafun táá-u. 29 Ní Leefii ŋá Yeesu tican u-dumpu, ní bifɔtiliibi nì binib biba mun tikpil dɔ́miń ki kútì bi-pu ki kpáfì ki bíi jīǹ tijin. 30 Fariisab nì bimaradakaliibi nín ká mimmee, an kaa mɔ́ɔkiǹ-bi, ní bi bālifì Yeesu boonnooliibi yii: «Ba pu ní ni nì bifɔtiliibi nì binikpitib nee kpáfì ki kā ki jīǹ ki nyù míǹ?» 31 Ní Yeesu kíí-bi yii: «Bin pɔ̄ɔ̄yee kaa nyàab̀ unyɔɔdaan, bin būǹee di nyàab̀ unyɔɔdaan. 32 Maa dɔ́miń kí yíiń deedeedambi, m dɔ́miń kí yíiń binikpitib bí kpántí bi-bimbim ní.»

Yeesu sòon̄ dinyɔɔboobil pu

(Kpèè Maat 9.14-17, Maar 2.18-22)

33 Ní bi lī Yeesu yii: «Yoowaneesi boonnooliibi bōob̀ kinyɔkɔ múlmul ki mèé ŋwimmeem, ní Fariisab boonnooliibi mun ŋáań míǹ, ama ní sii boonnooliibi jīǹ ki nyù.» 34 Ní Yeesu bí-bi yii: «Ni ŋūǹ kí yàntī unimpucaan cal bɔɔbi ń bóob́ kinyɔkɔ ŋyunti ŋun u dáá bí bi-ceeyeeee? 35 Ama ŋwiin ŋubɔ bí ki dòoń, bi làá dāá yòon̄ unimpucaan cal bi-kansikin. An yuntiŋu ní bi dāa bōob̀ nnyɔmu.»

36 Ní Yeesu gíti dū tibɔti nee ki ŋmāntì-bi yii: «Baa gífí dibɔkutipɔndi ŋaakatil kí dūú lìb̄ dikpikil. Bi yaa ŋá mimmee bi gíí ki bíil̀ dibɔkutipɔndee fám dee, ní dijandi din bi gííyee kaa làá ŋmā kí lìb̄ kí kàl̄ dikpikil pu. 37 Baa tí dù ndapɔm kí fúuń tilɔkpikilin. Bi yaa ŋá mimmee, see tilɔtee^e ń pōō ní ndaam ń kpáatíí fá, ní tilɔti ń bīil̀. 38 Ama bi dù ndapɔm kí sìtī tilɔpɔnni ní. 39 Bi yaa nyùn̄ ndakpikim ŋmaniŋmee, ní bi lì yii ndakpikim di ŋān̄, baa ti là ndapɔm.»