Luuki 4

Sitaan cɔ́ŋkì Yeesu

(Kpèè Maat 4.1-11, Maar 1.12-13)

1 Yeesu gbí Unimbɔti Fam ki nyánní Jɔɔdan, ní Ŋfamee cáá-u ki cūnnì kuteeun. 2 Ní Sitaan cɔ́ŋkì-u iwiin imuŋku ili. Waa nìn jíń tiba iwiin imuŋku ilee, ní ŋkùm cúú-u. 3 Ní Sitaan bí-u yii: «A yaa lafun sá Unimbɔti Jipɔɔn, tīī ditaŋkpal nee mara dí kpántí kpɔnɔ.» 4 Ní Yeesu yíì ní ki kíí-u yii: «Unimbɔti gbɔŋku poon lī yii: <An kaa sá tijin dijil ŋmaniŋma di yì unil maŋfal^a.>»

5 Niinee ní Sitaan yōoǹ Yeesu ki jɔ́m̀ yilpu, ní ki yāntì u kpēē duulinya beeŋi kɔkɔ dicilpu, 6 ní ki bí-u yii: «M làá dū mpɔn gbanti kɔkɔ nì abee gbanti nyooti kí tīī-si, kun puee ma ní bi dū an wanti kɔkɔ ki tīī, ní ma mun yaa là uŋyee ní ḿ tīī. 7 Míǹ puee, a yaa gbāaǹ ki jáam̀ man, sii di làá nīn kíǹ ki yì an kɔkɔ.» 8 Ní Yeesu kíí-u yii: «An ŋmàn̄ Unimbɔti gbɔŋku poon yii: <Ti-Dindaan a-Nimbɔtiu baba ní án sá á jāam̀, ní kí nīn bí úǹ baba tundin^b.>»

9 Míǹ boonee ní Sitaan yōoǹ-u ki cáa cūnnì Jeerusaleem, ní ki cáá-u ki tɔ́kɔ́ǹ kunimbɔtidii yilpu kúnti kunti, ní ki bí-u yii: «A yaa sá Unimbɔti Jipɔɔn, á yùkū kí tìin̄ní tiba kaa làá ŋá-si, 10 kun puee an ŋmàn̄ Unimbɔti gbɔŋku poon yii, <Unimbɔti làá yàntī u-tuuŋyi ń nīn cí-si.> 11 Ní ki gíti bí yii: <I làá nīn tíkí-si i-ŋaan a-taal ń taa gbéetí ditaŋkpal^c.>» 12 Ní Yeesu yíì ní ki bí-u yii: «Unimbɔti gbɔŋku lī yii: <Á taa cɔ̄ŋkì ti-Dindaan a-Nimbɔtiu^d.>» 13 Sitaan cɔ́ŋkì Yeesu isan kɔkɔ pu ki dóòyee, ní ki búntì kí nīn tí cí ŋyunti ŋubɔ.

Yeesu kíĺ u-tundi Galiilee tiŋkin

(Kpèè Maat 4.12-17, Maar 1.14-15)

14 Ní Yeesu fātìi nín gítí Galiilee tiŋkin ki gbí Unimbɔti Fam pɔŋŋu tiŋan, ní u-yindi gbītì niin pú kɔkɔ. 15 U nìn dàkà binib Unimbɔti bɔti akpafidiinni ní báà ŋma pàkà-u.

Naasaareeti yab kaa fōō Yeesu ki kíí

(Kpèè Maat 13.53-58, Maar 6.1-6)

16 Ní Yeesu búntì Naasaareeti, laakin u nìn kāl̀ ki wíiǹee. Ŋwiŋŋuŋfikaa bāańee, ní u kɔ́ kukpafidiin, kii u nín pée kpààa ŋáań puee, ní ki yíkì kí kàaǹ Unimbɔti gbɔŋku, 17 ní bi dū kugbɔŋu kun sòoǹ Unimbɔti bɔnaatiliu Yeesaya puee ki tīī-u, ní u fōō ki cúu kpátì ní ki ká laakin lī yii:

18 «Ti-Dindaan Fam bí m-pu,

u lēē-mi ḿ sòoǹ tibɔmɔntiil kí tīī biwɔfib.

U túnní-mi ḿ bāakì kí tùkù bisarkadambi yii

Unimbɔti làá líí-bi,

kí tùkù bijɔfub mun yii bi làá wāl̀,

kí tùkù bin bi sàantée yii bi làá ká dibatɔl,

19 kí tùkù binib yii ŋyunti nee ní ti-Dindaan

làá sɔ̄ bi-saai^e.»

20 Ní Yeesu kpáb́ kugbɔŋuee ní ki gíiǹ ki tīī un kpèé kukpafidiiyee, ní ki kāl̀ kí nīn dàkà-bi. Bin kɔkɔ nìn bí niinee nìn kíǹ ki kā ki kpèé-u ní címmm. 21 Ní u kíĺ ki bíi tùkù-bi yii: «Kí yòon̄ díǹ kí nīn cée, tibɔti tin m kàan̄ ni gbìl̄ nee bàan̄ dee.» 22 Ní báà ŋma kíǹ ki sòoǹ min ŋān̄ee u-pu, ní an ŋá-bi bitii tibɔmɔntiil tin u sòoǹee pu. Ní bi bíi lì yii: «Jooseefi jipɔɔn kaa yáaa?» 23 Ní u bí-bi yii: «M nyí yii ni làá gāā-mi dilaŋkpandi nee yii: <Unyɔɔdaan, cáaǹ a-ba> ní ki làá gíti lì-mi yii: <Ti gbìl̄ a nín ŋá min Kapeernayumee, ŋá a-tuuŋŋi gbanti abaanti a-tiŋki poon doo.>» 24 Ní u gíti lī yii: «Ibaamɔn ní m sòoǹ nì ni, baa fòol̄ Unimbɔti bɔnaatiliu u-dumpu mmɔntiimin. 25 Ibaamɔn ní m sòoǹ, Unimbɔti bɔnaatiliu Eelii yuntiŋuee, utaa kaa nìn gíti nìn̄ abin ata nì dijandi ní ŋkùm nìn jéetì kitiŋ kɔkɔ pu. Bikpiipoobi nìn wīikí Isirayeel tiŋkin ŋyunti gbanti^f. 26 Ama Unimbɔti kaa nìn gíti tú Eelii Isirayeel kpiipuu báà ubɔ cee, asee unicaŋkpiipu un nìn kóò Sareepita tiŋki kin bí Siidɔn tiŋkinee baba cee ní u nìn tú-u^g. 27 Unimbɔti bɔnaatiliu Eeliisee yuntiŋuee, binyaŋgbantiibi mun tikpil nìn tí bí Isirayeel tiŋkin. Ama bi-kansikin báà ubɔ kaa nìn ká dicáaǹdi, asee Naaman Usiiriija baba^h.»

28 Niinee ní bin kɔkɔ nìn bí kukpafidiin ki gbìl̄ an bɔtee fōō aŋuu. 29 Bi nìn yíkì ki cúú Yeesu ki dáaĺ ki nyántì kitiŋ kpaanceetiŋu, ní ki cáá-u ki nín jɔ́ḿ dijool din pu bi-diiŋŋi nìn tɔ́kɔ́ee yilpu, kí bàà téé-u kí tɔ̄ń taapu. 30 Ama ní u dī bi-kansikin ki búntì.

Yeesu jìn̄ arasinii unil ubɔ pu

(Kpèè Maar 1.21-28)

31 Yeesu cūtì Kapeernayum, Galiilee tiŋkpaaŋki kiban, ní ŋwiŋŋuŋfikaa dalee, u kɔ́ kukpafidiin ki bíi dàkà binib Unimbɔti bɔti. 32 U-dàkatamee nìn ŋá binib bitii, kun puee mpɔn nìn bí u-bɔti tin u dàkèe ni. 33 Kijapaai kiba nìn bí kukpafidiiyee ni, arasinii kā u-pu, ní ki téeń yii: 34 «Yeesu Naasaareeti yɔu, a nyàab̀-ti nì tilati ní? A dɔ́miń kí kúntí-ti níii? M nyí un a sée, a sá circirdaan un Unimbɔti túnnée ní!» 35 Ní Yeesu kpātì arasiniiyee pu yii: «Á ŋmīĺ niin kí nyā uninja nee ni!» Ní arasiniiyee fíiǹ uninjee ki lúkú kitiŋ binib nimbiin, ní ki nyáń, kaa ŋá-u tiba. 36 Ní báà ŋma bākatì sèeee, ní ki bàlifī tɔb yii: «Batii nyɔɔbundi ní u nín sòon̄ ní dì cáá mpɔn ki jì arasiniibi nan dee?» 37 Ní Yeesu bɔti gbītì Kapeernayum tiŋgbammu kɔkɔn.

Yeesu cáaǹ bibunliibi tikpil

(Kpèè Maat 8.14-15, Maar 1.29-31)

38 Yeesu nyáń kukpafidiinee, ní ki búntì Siimɔn dumpu. Siimɔn nimpuu na nìn būǹ ki dɔ̄ u-wunti píĺ kpaŋkpam, an páb́-u, ní bi mēē Yeesu ú cáaǹ-u. 39 Ní Yeesu sútì ki pìl̄-u ní ki kpātì ŋweenee pu. Dicilpu niin ní u pɔ́ɔkì ki yíkì ki ŋá-bi tijin.

40 Kujoou ŋwìiń bíi jēetéeⁱ, bin bin cáá bibunliibee nìn cáań-bi Yeesu cee, báà ŋma nì u-weeŋŋu u-weeŋŋu, ní u cáá u-ŋalii ki pāantí bi-kɔkɔ pu ní bi pɔ́ɔkí. 41 Arasiniibi nìn nyēē binib tikpil pu ní ki gbáà ibiil yii: «A sá Unimbɔti Jipɔɔn ní!» Ama ní Yeesu kpàtī bi-pu, kaa pūǹ-bi kinyɔkɔ bí sòoǹ, kun puee bíǹ nìn nyí u nín sá Meesiyayee.

Yeesu sòon̄ Unimbɔti bɔti Juudee tiŋkin

(Maar 1.35-39)

42 Yeesu péé ntaafaabɔmbɔmin ki nyáń kitiŋin ki búntì ŋkpaanceeti, laakin binib kpée. Ní kunipaau bíi nyàab̀-u. Bi ká-uee, ní ki bàà là ú gbíntí bi-cee kí taa ti cù laaba. 43 Ní u bí-bi yii: «An máaǹ ḿ cù kí sòoǹ tibɔmɔntiil tin sá Unimbɔti Beel bɔtee ntimu mun kíǹee poon: kun pu Unimbɔti túnní-mee dee.» 44 U nìn yìiǹ ki sòoǹ Unimbɔti bɔti Juudee kpafidiiŋŋin.