Maatiiu 2

Biciŋfitiibi dɔ́miń kí kpèè Yeesu

1 Bi màl̄ Yeesu Beetileem ní^a, Juudee tiŋki kiban. Ŋyunti gbantee Eeroodi di nìn sá ubɔti, ní bin nyí iŋmalbijaa bɔtee biba nyánní ŋwìiń nyalaŋki pú ki bāań Jeerusaleem, 2 ní ki bālifì yii: «Juuda yab bɔtiu un bi dáá màl̄ nee bí la? Ti ká u-ŋmalbijau^b nyáń ŋwìiń nyalaŋki pú ní ti dɔ́miń kí gbàan̄ kí jāam̀-u.» 3 Ubɔti Eeroodi nín gbìl̄ mimmee, ní u-pɔbil bíil̀, ki kpáaǹ Jeerusaleem nib kɔkɔ. 4 U nìn yíiń Juuda yab saraaŋaliibi nì bimaradakaliibi ki kpáfì ní ki bālifì-bi yii: «La ní an lī yii bi làá màal̀ Meesiya ní?» 5 Ní bi kíí-u yii: «Beetileem, kitiŋ kin bí Juudeeyee, kun puee Unimbɔti bɔnaatiliu nìn ŋmàn̄ yii:

6 <Sii Beetileem, kitiŋ kin bí Juudeeyee,

tiŋmanee, aa sá kitiŋwaai Juudee tiŋkpaammu kansikin,

kun puee sii poon ní ubɔti un làá kpàà

Isirayeel^c yab man nibulee làá nyānní.>»

7 Niinee ní Eeroodi yíiń bin nyí iŋmalbijaa bɔtee dibalin ki bālifì-bi ŋyunti ŋun páaa ní bi ká uŋmalbijee, 8 ní ki bí yii bí nīn cá Beetileem, kí nyàab̀ mmɔntiimin kí béé laakin kibikee bée. U nìn bí-bi yii: «Ni yaa ká-kèe, ní dāan̄ kí tùkù ma mun ń cù kí gbàan̄ kí jāam̀-kì.»

9 Ubɔti tùkū-bi mimmee, ní bi búntì, ní ki ká uŋmalbijee līntì bi-nyɔkɔpu ki bàn̄ laakin bi màl̄ kibikee, ní ki yúl̀ kutaa pu ki bíitì niin. 10 Bi nín ká uŋmalbijee yúl̀ee ní an mɔ́ɔkiǹ-bi tikpil 11 ní bi kɔ́ kudiin ki ká kibiwaayee nì ki-na Maarii ní ki gbāaǹ ki jáam̀-kì, ní ki pīitì bi-gaajawanti ki lēē sindaariya nì talaalutuukaa nì talaalu un bi yíì miiree ki dūu pú-kì. 12 Boonee ní Unimbɔti sòon̄ nì bi kudamintiiu poon yii bí taa fàtīí dī Eeroodi cee, ní bi páaǹ nsan ŋubɔ ki nín kùǹ bi-dumpu.

Bi kpáaǹ Yeesu ki búntì Eejipiti

13 Bin nyí iŋmalbijaa bɔtee nín kùǹee, ní Unimbɔti tuuŋŋu dɔ́miń ki tùkū Jooseefi kudamintiiun yii: «Yīkì kí yòon̄ kibiki nì ki-na kí sāǹ kí nīn cá Eejipiti tiŋkin kí kàl̄ niin kí nīn cí ŋyunti ŋun m làá tùkù-si á fàtīí gítińee, kun puee Eeroodi làá nyàab̀ kí kpɔ̀ kibiki nee.» 14 Ní Jooseefi yíkì ki yōoǹ kibiki nì ki-na kunyeeu ki búntì Eejipiti, 15 ní ki kāl̀ niin áli Eeroodi dāa kpíì. Mimmee an ŋá min ti-Dindaan nìn yāntì u-bɔnaatiliu sòon̄ee dee yii: «M yíiń m-jipɔɔn ń nyānní Eejipiti^d.»

Eeroodi kūū mbiyaawaamu

16 Eeroodi nín dāa béè yii bin nyí iŋmalbijaa bɔtee ŋmātiǹ-u kaa ti gítìń u-ceeyee, ní u fōō diŋuul tikpil ní ki pú kinyɔkɔ yii bí cù Beetileem tiŋkin nì ntimu mun māntìi tú-kèe kí kpɔ̀ mbininjabiyaamu mun cáá abin alee nì mun kaa láá bàn̄ alee, ki táá nì ŋyunti ŋun bin nyí iŋmalbijaa bɔtee nìn tùkū-uee. 17 An ŋá míǹ kí dàkà Unimbɔti bɔnaatiliu Yeereemii nín nìn lī puee dee, yii:

18 «Bi gbìl̄ Raama tiŋkin dituweel,

nsiim, nì iyaliŋki tikpil,

an sá Raseel di bíi sūǹ u-biyaamu pu,

kaa là bí ŋméeǹ-u,

kun puee mu kpíì^e.»

Yeesu gítìń Isirayeel tiŋkin

19 Ubɔti Eeroodi nín kpíìyee, ní ti-Dindaan tuuŋŋu dɔ́miń Jooseefi cee kudamintiiun Eejipiti, 20 ní ki bí-u yii: «Yīkìm̄ kí yòon̄ kibiki nì ki-na ní gítí Isirayeel tiŋkin, kun puee bin bàà nìn nyàab̀ kí kpɔ̀-kèe kpíì, baa ti bí.»

21 Ní Jooseefi yíkì ki yōoǹ kibiki nì ki-na ki nín gítí Isirayeel tiŋkin. 22 Ama u fāŋkì kí cùú kàl̄ Juudee tiŋkin kun puee u gbìl̄ yii Arkeelayusi di fōō u-baa Eeroodi beel Juudee. Kudamintiiun ní Unimbɔti dàkā-u, ní u túĺ Galiilee watil pú, 23 ní ki cūtìi kāl̀ Galiilee tiŋki kin bi yíì Naasaareetee. An ŋá kii Unimbɔti bɔnaatiliibi nín nìn sòon̄ ki síiǹ puee dee, yii: «Bi làá dāá nīn yíì-u unaasaareetija ní.»