Maatiiu 1

Yeesu bɔti tin

Maatiiu

ŋmàn̄ee

Yeesu naanjab yiŋŋi

1 Yeesu Kriisitoo naanjab yiŋŋi sɔ̀. U nìn sá Daafiidi naantiiu, ní Daafiidi nìn sá Abraam naantiiu.

2 Abraam màl̄ Isaaki, ní Isaaki màl̄ Jaakɔb, ní Jaakɔb màl̄ Juuda nì u-nabiyaamu. 3 Juuda màl̄ Fareesi nì Saara, (bi-na di nìn sá Taamaar). Fareesi màl̄ Eesiroom, ní Eesiroom màl̄ Aram, 4 ní Aram màl̄ Amiinadaab, ní Amiinadaab màl̄ Naasɔn, ní Naasɔn mun màl̄ Salmɔn 5 ní Salmɔn màl̄ Boowaasi, - Boowaasi na di nìn sá Raab, ní Boowaasi mun màl̄ Oobeedi. Oobeedi na di sá Ruuti, ní Oobeedi màl̄ Jeesee, 6 ní Jeesee màl̄ ubɔti Daafiidi.

Daafiidi màl̄ Saloomɔn. Saloomɔn na di nìn sá Uurii nimpuu. 7 Saloomɔn màl̄ Rooboowaam, ní Rooboowaam màl̄ Abiiya, ní Abiiya màl̄ Asaa, 8 ní Asaa màl̄ Joosafaati, ní Joosafaati màl̄ Jooram, ní Jooram màl̄ Oosiyasi, 9 ní Oosiyasi màl̄ Joowatam, ní Joowatam màl̄ Akaasi, ní Akaasi màl̄ Eeseekiyaasi, 10 ní Eeseekiyaasi màl̄ Manasee, ní Manasee màl̄ Amɔn, ní Amɔn màl̄ Joosiyaasi. 11 Joosiyaasi màl̄ Jeekooniyaasi nì u-nabiyaamu ŋyunti ŋun bi cúú Isirayeel yab ki cūnnì Babiloonee^a.

12 Bi nín cáá Isirayeel yab ki cūnnì Babiloonee, boonee ní Jeekooniyaasi màl̄ Salatiyeel, ní Salatiyeel màl̄ Sooroobabeel, 13 ní Sooroobabeel màl̄ Abiyuudi, ní Abiyuudi màl̄ Eeliyaakiim, ní Eeliyaakiim màl̄ Asɔɔr, 14 ní Asɔɔr màl̄ Sadooki, ní Sadooki màl̄ Akim, ní Akim màl̄ Eeliyuudi 15 ní Eeliyuudi màl̄ Eeleeyasaar, ní Eeleeyasaar màl̄ Maatan, ní Maatan màl̄ Jaakɔb, 16 ní Jaakɔb màl̄ Jooseefi un cáá Maarii un màl̄ Yeesu un bi yíì Kriisitooyee.

17 Kí yòon̄ Abraam yuntiŋu kí dāá sāā Daafiidi yuntiŋuee, anaantitɔntɔkɔ nìn sá diba kpá saalku ní, ní kí tí yòon̄ Daafiidi yuntiŋu kí dāá sāā ŋyunti ŋun bi cúú Isirayeel yab ki cūnnì Babiloonee muee, anaantitɔntɔkɔ nìn sá diba kpá saalku, ní kí yòon̄ ŋyunti gbanti kí dāá sāā Kriisitoo màaltam muee, anaantitɔntɔkɔ mun sá diba kpá saalku.

Yeesu Kriisitoo màaltam

(Kpèè Luuki 2.1-7)

18 Bi nín màl̄ Yeesu Kriisitoo puee sɔ̀. U-na Maarii nìn sá Jooseefi bɔɔn ní. Kí wàatī bí nín cáá tɔbee, Unimbɔti Fam pɔŋŋu yāntì Maarii cáá dipool. 19 U-bɔɔn Jooseefi nìn là kí nóó mara nín lī puee, ama ní kaa là kí bìitī Maarii mun pu, ní ki là kí yàntī-u dibalin. 20 U bíi dàkafī mimmee, ní ti-Dindaan tuuŋŋu dɔ́miń ki sòon̄ nì u kudamintiiun yii: «Jooseefi, Daafiidi naantiiu, taa fàŋkì kí cáá Maarii, kun puee Unimbɔti Fam di yāntì u cáá kibiki kin u làá màal̀ nee pool. 21 U làá màal̀ kibininjabiki ní á dāá pɔ̄-kì diyindi yii Yeesu, kun puee úǹ di làá dāá fīī u-niboolii bi-kpitiin^b.»

22 Tin bí nee kɔkɔ bāań ki ŋá kii ti-Dindaan nín yāntì u-bɔnaatiliu sòon̄ miŋyee ní yii:

23 «Usapɔɔn un kaa nyí uninjee làá cáá dipool

kí màal̀ kibininjabiki,

bi làá pɔ̄-kì diyindi yii Eemanuyeel^c.»

- Eemanuyeel taapu di sá yii «Unimbɔti bí ti-cee.»

24 Jooseefi fīntì ŋgeem puee, ní ki cūtì ki cáá Maarii kii ti-Dindaan tuuŋŋu nín bí yii ú ŋá puee. 25 Ama waa gbēē-u áli ki dāa sāā ŋyunti ŋun u màl̄ kibininjabikee ní Jooseefi pú kibikee diyindi yii Yeesu.