Luuki 2

Yeesu màaltam

(Kpèè Maat 1.18-25)

1 Ŋyuntee ní gɔminakpaan Oogusti yóoǹ mara yii bí kàaǹ ntimu kɔkɔ nib. 2 Dikaampeepeekaalee nìn sá ŋyunti ŋun Kriniyusi nìn sá gɔmina Siirii tiŋkinee ní. 3 Báà ŋma nìn cá u-naanja tiŋkin bí kàaǹ-u. 4 Míǹ puee ní Jooseefi mun yíkì Naasaareeti Galiilee tiŋkin ki nín cá ubɔti Daafiidi dumpu Beetileem, Juudee tiŋkin, kun puee u nìn sá Daafiidi naantitɔntɔkɔl ní. 5 U nì u-bɔɔn Maarii un nìn sá upɔdaanee di nìn cūtì dikàandi gbanti. 6 Bi bí Beetileem niinee, ní ŋwiin ŋun Maarii làá màal̀ee dūu bāań. 7 U nìn màl̄ u-biseemal kibininjabiki ní ki dū iŋaabu ki fìn̄-kì. U nìn dū-kì ki bíl̀ laakin bi ŋáań tiwaŋkuti timool tì ŋmóòyee, kun puee binib nìn gbí kunicandii poon, baa nìn ŋūǹ kí kɔ́ niin.

Unimbɔti tuuŋŋu dɔ́miń bipikpaaliibi cee

8 Kitiŋ gbanti poonee, bipikpaaliibi biba nìn dɔ̄ tisatin ki kpàá bi-piii. 9 Unimbɔti tuuŋŋu ŋubɔ nìn cílìń bi-pu, ní ti-Dindaan walifiŋu ŋmíntì ki māntì ki tú-bi ní bi fāŋkì tikpil. 10 Ní ntuunee bí-bi yii: «Taa fàŋkìmaan! Dinyɔɔbummɔɔndi din làá mɔ̄ɔkiǹ báà ŋma tikpilee ní m cáań-ni. 11 Dinyɔɔbundi gbanti di sá yii díǹ nyeeku nee, bi màl̄-ni Ufiil ubɔ Daafiidi dumpu Beetileem. Úǹ di sá Kriisitoo, ti-Dindaan. 12 Min ni làá dūu béé an bikee di sá, ni yaa bàn̄ee, ni làá ká ki dɔ̄ laakin bi ŋáań tiwaŋkuti timoolee, bi dū iŋaabu ki fìn̄-kì.»

13 Kpalaayee, ní Unimbɔti tuuŋyi dikitikpaandi diba nyánní yilpu ki dɔ́miń ki kútì ŋun béeyee pu. I nìn kíĺ ki bíi nyɔ́ŋkí Unimbɔti yii:

14 «Inyɔŋki sá ki tīī Unimbɔti un bí yilpu fɔ́ŋŋŋee,

ní u-gbansɔŋfiŋu sá ki tīī taapu doo nib bin fáatì-uee.»

Bipikpaaliibi búntì Beetileem

15 Ituunee yíkì ki nín gítí yilpuee, ní bipikpaaliibee sòon̄ yii: «Tí cùmaan Beetileem! See tí ká tin di bāań ní ti-Dindaan yāntì bi dɔ́miń ki tùkū-tee.» 16 Niinee ní bi yíkì malaa malaa ki búntì. Bi bàn̄ee, ki ká Maarii nì Jooseefi nì kibiki, kíǹ dɔ̄ laakin bi ŋáań tiwaŋkuti timool tì ŋmóòyee poon. 17 Bi ká kibikee, ní ki máafì Unimbɔti tuuŋŋu nín dɔ́miń ki tùkū-bi kibiki gbanti bɔti puee. 18 Binib bin kɔkɔ nìn gbìl̄ tin bipikpaaliibee sòoǹee nìn bākatì ní sèeee. 19 Ama Maarii úǹ dū an bɔti kɔkɔ ki kpáafì u-pɔbilin ki dàkafī ti-pu. 20 Ní bipikpaaliibi fātìi nín gítí bi-pikpaaku laŋki ki nyɔ́ŋkí Unimbɔti ki pàkà-u bi nín gbìl̄ tiŋyee nì tin bi kée pu. Di sá yii ntuunee nín pée tùkū-bi puee, míǹ deedee ní bi ká.

Bi pú kibiki diyindi

21 An tú winniiyee, bi gíí kibiki dikpancandi ní ki pú-kì diyindi yii Yeesu, kii Unimbɔti tuuŋŋu nín nìn pée tùkū u-na pu kí wàatī ú nín cáá dipoolee^a.

Bi cáá Yeesu kunimbɔtidiin

22 Ŋyunti ŋun sá bí ŋá Maarii akoobil kii Unimbɔti nín yāntì Mooyiisi ŋmàn̄ marab puee bàn̄ee^b, ní bi yōoǹ kibiki ki cáa cūnnì Jeerusaleem tiŋkin kí cáá-kì kí ŋá ti-Dindaan ŋaan. 23 An ŋmàn̄ ti-Dindaan marau poon yii: «Kibiseebiki yaa sá kininjabikee, an sá bí gàntī kíǹ ki-ba kí yóoń ti-Dindaan^c 24 ní kí cáá abeenanjipɔmbil ali àá nnanjilimu muli kí ŋá saraa, kii ti-Dindaan nín síiǹ mara puee^d.»

25 Uninja ubɔ nìn bí Jeerusaleem, bi yíì-u Simeeyɔn. U nìn yú deedee ki tɔ́ Unimbɔti ní ki nìn kā ki cí un làá dāan̄ kí fīī Isirayeel yabee. Unimbɔti Fam nìn bí u-cee, 26 ní ki nìn tùkū-u yii u làá ká Meesiya ní kí nín kpú. 27 Unimbɔti Fam kpōotì Simeeyɔn ki kɔ́ǹ kunimbɔtidiin ŋyunti ŋun Yeesu na nì u-baa cáá-u niin kí ŋá mara nín bālifì miŋyee. 28 Simeeyɔn nìn fōō-kì u-ŋaan ki jáam̀ Unimbɔti ki lī yii:

29 «M-Dindaan, a nín nìn pōoǹ puee, an ŋá míǹ!

Kɔŋkɔnnee, yàntī a-tɔntɔnliu ń kpú nì ŋgbansɔŋfi,

30 kun puee m-nimbil ká Ufiil

31 un a bɔ́ntì ki yóoǹ inibool kɔkɔee.

32 Úǹ di sá ŋwalifi ŋun làá yàntī atimbul kɔkɔ ń béé-see.

Úǹ di làá tīī a-nibul Isirayeel yab tinyool^e.»

33 Niinee, ní Yeesu baa nì u-na bākatì nì tibɔti tin Simeeyɔn bíi sòoǹ bi-biki puee. 34 Ní Simeeyɔn mēē Unimbɔti ń bìin̄ bi-pu. U mēē ki dóòyee, ní ki bí Maarii yii: «Kpèè, Unimbɔti lēē kibiki nee. Ki-puee Isirayeel yab tikpil làá lítí ní tikpil mun ń yīkì. Úǹ di làá dāá nīn sá Unimbɔti daaŋku kun binib làá dāá kpákaǹee, 35 ki làá dāá bìitī binib tikpil landɔkɔi in bál̀ bi-pɔbiliŋ poonee. Ama sii ubinaati, bi nín làá dāá ŋá-u puee làá dāá kɔ́ kí dóó-si, kii kitàataajiki ní bi dūu sāā a-pɔbilee.»

Unimbɔti bɔnaatiliu Ana

36 Unimpu ubɔ mun nìn bí, bi yíì-u Ana. U nìn sá Unimbɔti bɔnaatiliu. Fanuyeel un sá Aseer naantitɔntɔkɔlee bisal dee. U nín mɔ́ǹ ticatee, u ŋá abin aluli ní u-cal kpíì, 37 ní u gbíntì míǹ ki sá ukpiipu, kaa ti mɔ́ǹ, ní ki púĺ tikpil ki tin bàn̄ abin imuŋku inaa nì abin anaa. U nìn tūǹ Unimbɔti tundi ŋwiimpu nì kunyeeu ki bōob̀ kinyɔkɔ ki mèé Unimbɔti, kaa sútí kí wàatī kunimbɔtidii. 38 Ŋyunti gbanti ní unimpuee bàn̄ ki ŋmāntiǹ-bi kunimbɔtidiin ní ki bíi pàkā Unimbɔti, ní ki sòoǹ kibikee bɔti ki tùkù bin kɔkɔ kā ki cí Unimbɔti ń dāá fīī Jeerusaleem yabee.

Jooseefi nì Maarii nín kùǹ Naasaareeti

39 Yeesu baa nì u-na ŋá ti-Dindaan nín yóoǹ mara bí ŋá puee ki dóòyee, ní bi fātìi nín gítí bi-dumpu Naasaareeti, Galiilee tiŋkin. 40 Kibikee nìn wīintí ki cíkití ki cáá iciin tikpil, ní Unimbɔti bīī ki-boon.

Yeesu ŋá abin saalaa nì ali ki kɔ́ kunimbɔtidiin

41 Dibindi sá kamaayee, Yeesu baa nì u-na cá Jeerusaleem ní ki jīǹ Dilákatil jiŋaaliu. 42 Yeesu bàn̄ abin saalaa nì alee, u-baa nì u-na tí cá Jeerusaleem jiŋaal kii mara nín bālifì puee^f, ní ki kpáaǹ-u. 43 Bi jíń jiŋaal ki dóòyee, ní Yeesu úǹ gbíntì niin, ní u-baa nì u-na nín kùnní, kaa nyí yii Yeesu gbíntìń. 44 Bi nìn cōom̀ ŋwimmɔn ki dàkafī yii u bí bi-saŋkinjutiibi bin kíǹee cee. Boonee ní bi kíǹ ki bíi nyàab̀-u bi-nabiyaamu nì bi-bɔɔbi cee. 45 Baa ká-uee, ní ki nín gítí Jeerusaleem kí nyàab̀-u. 46 Winta dalee, ní bi dāa ká-u kunimbɔtidiin, u kā bimaradakaliibi kansikin ki pílifí bi nín sòoǹ puee, ní ki bàlifī-bi tibɔti. 47 Bin kɔkɔ nìn bí niin ki pílifée nìn bākatì u nín cáá iciin ki kíikí tibɔti miŋyee. 48 U-baa nì u-na bāań ki ká-u niinee, ní bi bākatì, ní u-na bí yii: «M-biki, ba ŋá ní a ŋá-ti mimmee! Man nì a-baa nyàab̄-si, ti-nimbiliŋ mántì.» 49 Ní u bí-bi yii: «Ba ŋá ní ni nyàab̄-mi? Naa nyí yii m máaǹ kí nīn bí m-Baa diikunaaa?» 50 Ama baa nìn gbìl̄ u nín sòon̄ puee taapu.

51 Niinee ní u yíkìi nóó-bi ki nín gítí Naasaareeti, ní ki sīntiǹ u-ba ki tīī-bi. Ní u-na cúú tin kɔkɔ jítì kunimbɔtidiinee ki kpáafì u-pɔbilin. 52 Yeesu nìn wīintí ní u-ciiŋyi mun wīintí, ní u nìn mɔ̀tīi fáatíǹ Unimbɔti nì binib^g.