Luuki 23

Bi cáá Yeesu Piilati cee

(Kpèè Maat 27.1-2, 11-14, Maar 15.1-5, Yoow 18.28-38)

1 Ní bikpilibee kɔkɔ yíkì ki yōoǹ Yeesu ki cáa cūnnì gɔmina Piilati cee, 2 ní ki bíi mɔ́ntí ki tūntí u-pu yii: «Ti ká kijapaai nee bíi gáatí ti-nib yiliŋ yii bí taa pà lampoo kí tīī gɔminakpaan Seesaar, ní ki bí yii úǹ u-ba sá Meesiya, ubɔti.» 3 Ní Piilati bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Sii di lī^a.» 4 Niinee ní Piilati bí bisaraaŋakpilib nì binib kɔkɔ yii: «Maa ká kijapaai nee pu tikpitil báà tiba.» 5 Ní bi yíì, ki mɔ̀tīi sòoǹ mpɔn yii: «U yìiǹ ní ki dàkà ki gáatí binib ń taa nín̄ tɔ́ gɔmina. U kíliń Galiilee ní ki dɔ́miń ki jítì Juudee tiŋki kɔkɔ poon ní ki dāa bāań timbi cee doo.»

Bi cáá Yeesu Eeroodi cee

6 Ŋyunti ŋun Piilati gbìl̄ mimmee, ní u bālifì yii: «Kijapaai nee sá ugaliileeja níii?» 7 Bi nín kíí-u yii Yeesu lafun nyánní Galiilee kitiŋ kin ni Eeroodi sá ubɔtee, ní u dū Yeesu ki tīī Eeroodi un nìn dɔ́miń Jeerusaleem ŋyunti gbantee. 8 Eeroodi nín ká Yeesuee, an mɔ́ɔkiǹ-u tikpil, di sá yii u nìn gbìl̄ bi sòoǹ Yeesu pu an yúntì, u bàà pée nyàab̀ kí ká-u ú ŋá maamaaci ubɔ ú ká. 9 Ní u bālifì-u anyɔɔbun tikpil, ama Yeesu kaa kíí-u báà dinyɔɔbumbaantiil. 10 Bisaraaŋakpilib nì bimaradakaliibi nìn bí niin ki sòoǹ mpɔn ki mɔ́ntí ki tūntí u-pu. 11 Ní Eeroodi nì u-soojab kíĺ ki bíi bèel̄-u ki kpèé-u fám, ní ki dū dibɔkutinyaandi diba ki pēeǹ-u mbɔtiyaamin ní ki fātìi gíiǹ-u ki tīī Piilati. 12 Ŋwiin gbantee ní Piilati nì Eeroodi kansikin mɔ́ɔkì ní bi kpántì bibɔɔtiibi, dooooyee baa nìn kpí.

Bi sòon̄ kí kpɔ̀ Yeesu dulim

(Kpèè Maat 27.15-26, Maar 15.6-15, Yoow 18.39-19.16)

13 Niinee ní Piilati kóoǹ bisaraaŋakpilib nì biyidambi nì samaa kɔkɔ ki kpáfì, 14 ní ki bí-bi yii: «Ni cáań-mi unil nee yii u bíi gáatí binib, ní m bālifì-u ni-kɔkɔ nimbiin tibɔkpitil tin ni bí yii u ŋée, ama man kaa ká báà tiba u-pu. 15 Eeroodi mun kaa ká u-bɔkpil, an pu ní u gíiǹní-u ki tīiń-ti. Kijapaai nee kaa ŋá tiba tin máaǹ ŋkúmee. 16 Míǹ puee m làá yàntī bí gbá-u anaalab ní kí gíiǹ-u kí líí.» [ 17 Dilákatil jiŋaaliu kamaayee an nìn sá Piilati ń líí-bi usarkadaan ubɔ^b.] 18 Ní bi-kɔkɔ kíĺ ki bíi tátí dicilpu yii: «Bí kpɔ̀ kijapaai nee kí gíiǹ Baaraabaasi kí líí.» 19 - Bi nìn cúú Baaraabaasi gbanti ki tɔ́ sarkan kun puee u nìn yíkì kí já nì gɔmina ní ki kūū unil mun. - 20 Piilati nìn nyàab̀ kí líí Yeesuee, an pu ní u nìn gíti būsì ki sòon̄ nì samaa. 21 Ama ní bi bíi kūuntí yii: «Bí kpáá-u ndɔpuntikaa pu, bí pée kpáá-u ndɔpuntikaa pu.» 22 Ní Piilati fātìi tí lī ntataatiim yii: «Tibɔkpitil tilati ní u baasii ŋá ní? Man kaa ká diyìntil diba u-pu din pu ní u máaǹ ŋkúmee. Míǹ puee m làá yàntī bí gbá-u anaalab kí gíiǹ-u kí líí.» 23-24 Ama ní bi yíì, ki mɔ̀tīi pée tátí mpɔn yii bí kpáá-u ndɔpuntikaa pu. Bi-tantatii nìn yāntì Piilati gīī ní ki fōō bi-nyɔkɔ. 25 Ní u gíiǹ uninja, un nìn yíkì ki jáà nì gɔmina ki kūū unil muee ki líì, ní ki dū Yeesu ki tīī-bi bí ŋá-u bi nín là puee.

Bi kpáá Yeesu ndɔpuntikaa pu

(Kpèè Maat 27.32-44, Maar 15.21-32, Yoow 19.17-27)

26 Bi yōoǹ Yeesu ki cáǹ kí kpááyee, ní ki dūu tú Siimɔn un sá Siireen tiŋkinee, u nìn nyánní kusaau. Ní bi cúú-u ní ki dū ndɔpuntikaa ki būkuǹ-u ú nīn bùkū ki pá Yeesu boon. 27 Dinikitikpaandi nìn dī Yeesu, ní binimpoobi mun nìn sūǹ ki yáliŋkí u-pu. 28 Ní Yeesu fātìi bí-bi yii: «Jeerusaleem nimpoobi, taa nín̄ sūm̀maan man pu, nín̄ sūm̀maan nimbi ni-ba nì ni-biyaamu pu. 29 Kun puee ŋyunti bí ki dòoń ŋun ni bi dāa lì yii: <Biŋmaŋŋmantiibi bin kaa pée màl̄ ki kée, bin mbiyaamu kaa ŋáam̀ bi-biiŋee bí mmɔnneeee!> 30 Ní binib dāa lì ajoon yii: <Lítímaan ti-pu!> Ní kí lì ŋgbantamu yii: <Nyìkim̄maan ti-pu!> 31 Bi yaa ŋá man un sá bususɔmbuee mimmee, kin nimbi bin sá isukulimee fáà?»

32 Soojab cáań bininjab bili, bi sá digaŋgam dambi ki kútì Yeesu pu kí kpɔ̀ bi mun. 33 Bi bàn̄ laakin bi yíì kuyikpabikuee, ní ki dū-u ki kpáá ndɔpuntikaa pu úǹ nì digaŋgam dambi bilee, ubɔ u-ŋaŋgiil pú, un kíǹee u-ŋaŋgan pú. 34 Ní Yeesu bí yii: «M-Baa, dūú pɔ̄-bi, kun puee baa nyí tin bi bíi ŋáań nee taapu.» Ní bi tɔ́ kasi bi-kansikin ki yākatì u-bɔkutiŋ^c. 35 Ní kunipaau yú ki kpèé, ní Juuda yab yidambi bí ki bèel̄-u^d yii: «U fīī bin kíǹee, u yaa lafun sá Meesiya, un Unimbɔti lēēyee, ú fīī u-ba mun.» 36 Ní soojab mun bí ki bèel̄-u, ní ki cáań ndaam min gàm̀ee ki tīī-u ú nyɔ̀^e, 37 ní ki bí-u yii: «A yaa sá Juuda yab bɔtiu, á fīī a-ba.» 38 Ní bi ŋmàn̄ u-yilpu yii: «Un bí nee di sá Juuda yab bɔtiu.»

39 Ní digaŋgam dambi bin bi kpáá ki kútì u-puee ubɔ mun bí ki sìí-u yii: «Sii di kaa sá Meesiyaaa? Fīī a-ba kí fīī kí kpáaǹ ti-muaa!» 40 Ní u-juti bíi wòoǹ-u yii: «Sii nì úǹ kɔkɔ bí ditafadaabaantiilin ní, aa fàŋkí Unimbɔtaaa? 41 Timbi nín máaǹ puee di sá ditafadaaldi din poon ti bí nee, kun puee digaŋgam tuuŋŋi ŋin ti ŋáańee paati dee. Ama un bí nee, úǹ kaa ŋá digaŋgam ubɔ.» 42 Ní u bí Yeesu yii: «A yaa láa gítìń kí jī dibeelee, á dāá téetí m-pu.» 43 Ní Yeesu kíí-u yii: «Ibaamɔn ní m tùkù-si, díǹ gba man nì si di làá nīn bí Unimbɔti Beelin.»

Yeesu kúm

(Kpèè Maat 27.45-56, Maar 15.33-41, Yoow 19.28-30)

44 Kuwiŋkuluu nyɔkɔmee, ní ŋwìiń wáŋkì ní dibɔmbɔndi jéetì kitiŋ kɔkɔ pu ki tin sāā tikúti tita. 45 Ní sata un bi nìn dūu pītì kunimbɔtidii^f poon ki gāntì laakin bi yíì circir páaa laŋkee nì laan kíǹee cúu cátì kansikin nì kansikin. 46 Ní Yeesu fáá mbiil mpɔn yii: «M-Baa, m dū m-Fam ki ŋá a-ŋaan^g.» U lī mimmee, ní ki kpíì. 47 Room soojakpiliu ká mimmee ní ki bíi pàkà Unimbɔti, ní ki bí yii: «Ibaamɔn, kijapaai nee sá unimɔnti ní.» 48 Kunipaau kun nìn dɔ́miń kí kpèè bi nín kpáá Yeesu puee nín ká mimmee, ní bi fàtīi kùǹ ki fátí bi-biŋŋi nì kunimbaakpaaŋŋu. 49 Yeesu bɔɔbi kɔkɔ nì binimpoobi bin nìn céeǹní-u doooo Galiileeyee nìn yú kudandaŋu^h ní ki kpèé tin kɔkɔ bíi jītée.

Bi nín síb́ Yeesu puee

(Kpèè Maat 27.57-61, Maar 15.42-47, Yoow 19.38-42)

50 Uninja ubɔ nìn bí, bi yíì-u Jooseefi. U nìn sá bibɔsoonliibee kansikin ubɔ ní ki sá unimɔnti ki yú deedee. 51 Uninjee nìn sá Juuda yab tiŋki kin bi yíì Arimateeyeeⁱ ní ki nìn kā ki cí Unimbɔti Beel. Waa nìn yú bibɔsoonliibi bin kíǹee boon, ní kaa nìn bí tin bi bɔ́ntì kí ŋée poon. 52 Úǹ di cūtì Piilati cee ki mēē-u nsan kí yòon̄ Yeesu wunti. 53 U pú-u nsanee, ní u cūtì ki kpáatì Yeesu wunti ndɔpuntikaa pu, ní ki dū ŋŋaapiin ki fìn̄-u ki cáá-u ki bíl̀ dikaakul din bi nìn lùkū ditaŋkpalinee. Baa nìn dáá síb́ báà ubɔ dikaakul gbanti poon. 54 An nìn sá ŋwiin ŋun jooku ŋwiŋŋuŋfikaa kífée, ní ŋwìiń tóob́ kí jēetí. 55 Binimpoobi bin nìn céeǹní Yeesu doooo Galiileeyee táá Jooseefi ki cūtì ki ká dikaakul nì bi nín bíl̀ u-wunti puee. 56 Bi nìn fātìi nín kùǹ, ki dɔ́miń ki bɔ́ntì ikpafi nì talaalub kí dāá cáań kí yàaǹ utaŋkpiil pu, ní ki kāl̀ ŋwiŋŋuŋfikaa, kii bi-marau nín sá puee^j.