Luuki 24

Yeesu fīkitì

(Kpèè mun Maat 28.1-10, Maar 16.1-8, Yoow 20.1-10)

1 Kinyɔŋ poon wimpeekaaŋu dal ntaafaabɔmbɔminee, ní binimpoobee búntì dikaakul laŋki ki ŋúb́ ikpafi nì talaalub bin bi bɔ́ntèe. 2 Bi bàn̄ee, ki ká ditaŋkpal din bi nìn dūu pīiǹ dikaakul nyɔkɔee bíntì ki tin dɔ̄ ŋkpaanceeti, 3 ní bi kɔ́ dikaakul poon kaa ká ti-Dindaan Yeesu wunti. 4 Bi bākatì ki kíǹ ki yú ki dàkafēe ní bininjab bili cílìń bi-pu ki pēē tiwampin káŋkaŋ. 5 Bi fāŋkì ki tīntì, ní binibee bí yii: «Ba pu ní ni nyàab̀ unil un wāĺee bitaŋkpiibi kansikin ní? 6 Úǹ fīkitì, waa bí doo, téetímaan u nín nìn bí Galiilee ki tùkū-ni puee, 7 yii: <An sá bí dū man Kinibiki kí ŋúbíǹ binikpitib ní bí kpáá-mi ndɔpuntikaa pu ḿ kpú, ní winta dalee ḿ fìkitī.>»

8 Niinee ní bi fātìi téetì Yeesu bɔti gbanti pu. 9 Ní bi búntì ki cūtìi máafì an bɔti kɔkɔ akpambal saalaa nì dibee nì biboonnooliibi bin kíǹee kɔkɔ. 10 An nimpoobee di sá Maarii Magidalaa yɔu, nì Jaani, nì Maarii Yakubu na. Binimpoobi biba mun nìn céeǹ-bi, ki tùkū akpambal tibɔbaantiil. 11 Ama binimpoobee nín dɔ́miń ki tùkū akpambalee, baa nìn fōō ki kíí, bi nìn dūu yíiń mmaam ní. 12 Ama ní Peetroo yíkìi sáǹ ki nín cá dikaakul laŋki. U bàn̄ ki gbóońee ŋŋaabu ŋun bi nìn dūu fìn̄-uee baba di dɔ̄. Ní u fātìi nín gítiń, ki bākatì nì an bɔti sèeee.

Biboonnooliibi bili ká Yeesu Eemaayusi saŋŋu pu

(Kpèè mun Maar 16.12-13)

13 Ŋwimbaanti gbanti ní u-boonnooliibi bili yíkì ki nín cá kitimbilii kiba bi yíì-kì Eemaayusi. Kí yīkì Jeerusaleem kí cù kitiŋ gbantinee, an sá ataŋkpee saalaa nì diba ní. 14 Ní bi còom̄ ki sòoǹ tin kɔkɔ jítì Yeesu puee. 15 Bi nìn bíi sòoǹ míǹ ki kpákèe, ní Yeesu u-ba bāań bi-cee ní u nì bi táá ki nín cá. 16 Bi wál̀-u ní tiba yāntì baa béè-u. 17 Ní Yeesu bālifì-bi yii: «Tilati ní ni còom̄ ki kpákà ní?» Ní bi sāā ki síl̀ nì kunimbaau. 18 Ní bi-kansikin ubɔ, bi yíì-u Kileewoopasi, bí-u yii: «M pàkā sii baba di pée kíǹ Jeerusaleem tiŋkin doo, kaa gbìl̄ tin jítì iwiin nee poonee.» 19 Ní u bālifì-bi yii: «Ba bɔti di jítì ní?» Ní bi kíí-u yii: «Tin bāań Yeesu Naasaareeti yɔu, un nìn sá Unimbɔti bɔnaatiliu ki ŋáań maamaaci tuuŋŋi, u-nyɔɔbuŋŋi mun cáá mpɔn Unimbɔti nì binib kɔkɔ nyée. 20 Ti-saraaŋakpilib nì ti-yidambi dū-u ki tīī bi sòon̄ ki kūū u-bɔti, ní bi dū-u ki kpáá ndɔpuntikaa pu. 21 Úǹ pu ní ti bàà máká yii u làá fīī Isirayeel yab. Nì míǹ kɔkɔee, an bɔti nín jítèe díǹ iwiin ita sèé nee. 22 Ama ti-kansikin binimpoobi biba cáań-ti maamaaci bɔti díǹ nee. Di sá yii bi péé kutaafaau ní ki cūtì u-kaakul laŋki. 23 Bi bàn̄ee, kaa ká u-wunti, ní ki fātìi gítìń ti-cee ki máafì-ti yii Unimbɔti tuuŋyi cílìń bi-pu ki tùkū-bi yii u fīkitì. 24 Ti-yab biba mun cūtì u-kaakul laŋki ki mun ká kii binimpoobee nín bàà lī puee, ama baa ká úǹ u-ba.» 25 Niinee ní Yeesu bí yii: «Óooo binib nee kaa cáá iciin, kaa yáb̀ kí fōō Unimbɔti bɔnaatiliibi nín sòon̄ tiŋyee kí kíí. 26 Mimmee an kaa máaǹ Meesiya ń jī falaa míǹ kí nín kɔ́ u-nyootinaaa?» 27 Ní u kíĺ ki bíi sòoǹ ki cántí-bi Unimbɔti gbɔŋku poon tibɔti tin kɔkɔ Mooyiisi nì Unimbɔti bɔnaatiliibi nìn ŋmàn̄ ki síiǹ u-puee.

28 Bi nín bāań kitimbilii kin ni bi cée, ní Yeesu ŋá kii u là kí càatī nyɔkɔpuee. 29 Ní bi bí yii: «Aayee, gbíntí ti-cee, ŋwìiń làá jēetí kunyeeu ń mɔ́ dee.» Ní u kɔ́ bi-cee. 30 Ŋyunti ŋun bi kāl̀ ki làá nīn jīǹee, ní Yeesu yōoǹ kpɔnɔ ní ki jáam̀ Unimbɔti ní ki gífì ki tīī-bi. 31 Niinee ní bi-nimbiliŋ cúu ŋāatì ní bi béè-u, ní u wáŋkì bi-kansikin niin. 32 Ní bi bíi lì tɔb cee yii: «U nín bíi sòoǹ nì ti ki lèekī Unimbɔti gbɔŋku taapu ki dàkà-ti nsannee, saa bàà ká an nín kɔ́ ti-pɔbiliŋin fíŋfiŋeeee?»

33 Ní bi yíkì niin niin ki nín gítí Jeerusaleem. Bi bàn̄ee ki ká akpambal saalaa nì dibee nì bi-jutiibi bin kíǹee kpáfì, 34 ki bíi lì yii: «Tiŋman, ti-Dindaan lafun fīkitì! Di sá yii Siimɔn ká-u.» 35 Ní bi mun dū tin bi ká nsannee, nì Yeesu nín gíí kpɔnɔ bi béè-u puee ki máafì-bi.

Yeesu boonnooliibi ká-u

(Kpèè Maat 28.16-20, Maar 16.14-18, Yoow 20.19-23)

36 Bi bíi sòoǹ mimmee, Yeesu bāań bi-kansikin ki jáam̀-bi yii: «Unimbɔti ń tīī-ni ŋgbansɔŋfi.» 37 Ní bi fāŋkì tikpil bi-wunti kpíì, kun puee bi dàkafī yii an sá ufaŋfanti ní. 38 Ní Yeesu bālifì-bi yii: «Ba pu ní ni-pɔbiliŋ máfí míǹ? Ba pu ní ni cáá ilandɔkɔ ili ili míǹ? 39 Man dee, kpèèmaan m-ŋalii poon nì m-tafati tibuŋwati. Gbēēmaan-mi kí kpèè! Ufaŋfanti kaa cáá tiwunaaa, kaa cáá akpab kii ni nín wāĺ man cáá pu nee.» 40 U lī mimmee, ní ki dàkā-bi u-ŋalii nì u-taaŋi. 41 Baa nìn dáá baasii fōō ki kíí mbaamɔmin, kun puee an nìn sá-bi mmɔnnaaa, ki ŋá-bi bitii mun, an puee ní Yeesu bālifì-bi yii: «Ni cáá tiba doo kí jāaa?» 42 Ní bi dū dijɔŋgindi din ŋɔ́fèe ki tīī-u, 43 ní u fōō ki ŋmɔ́ bi-nimbiin niin. 44 Ní u bí-bi yii: «Naa téetí m nín nìn dáá bí ni-cee, ki tùkū-ni yii tin kɔkɔ bi ŋmàn̄ m-pu Mooyiisi marab nì Unimbɔti bɔnaatiliibi gbɔnti nì Inyɔŋki laŋyi gbɔŋku poonee máaǹ kí ŋá mimmaaa?» 45 Niinee, ní u pīitì bi-landɔkɔi bí ŋmā kí gbìl̄ Unimbɔti gbɔŋku poon bɔti taapu, 46 ní ki bí-bi yii: «An nín ŋmàn̄ puee sèé, yii: Meesiya làá jī falaa kí kpú ní winta dalee ú fàtīí fìkitī^a. 47 An máaǹ yii ní sòoǹ u-pu atimbun kɔkɔ nib cee, kí kíliń Jeerusaleem, yii binib ń kpántí bi-bimbim kí ká bi-kpitii pɔ̄tam. 48 Nimbi di sá seeradambi yii m kpíì, ki fīkitì. 49 M làá yàntī Circir Fam min m-Baa nìn pōoǹee ń dāan̄ ni-pu. Ama ní nīn kā Jeerusaleem kitiŋ poon kí nīn cí ŋyunti ŋun Unimbɔti pɔŋŋuee làá kpákatiń ni-puee^b.»

Yeesu jɔ́m̀ yilpu

(Kpèè Maar 16.19-20)

50 Ní Yeesu yōoǹ-bi ki nyántì kitiŋ kpaanceetiŋu ki cá Beetanii^c watil pú. Niinee ní u yōoǹ u-ŋalii yilpu ki mēē ki bīiǹ bi-pu. 51 Ŋyunti ŋun u bíi mèé ki bìintí bi-puee, ní u yíkì bi-cee ki nín jɔ́ḿ yilpu^d. 52 Ní bíǹ gbāaǹ ki nyɔ́ŋkì-u, ní ki fātìi nín gítiń Jeerusaleem nì dipɔɔpiŋkpaandi. 53 Bi nìn bí baabadal kunimbɔtidiin ki pàkà Unimbɔti ki jáaḿ-u.