Maarki 15

Bi cáá Yeesu gɔmina Piilati cee

(Kpèè Maat 27.1-2, 11-14, Luuki 23.1-5, Yoow 18.28-38)

1 Kutaafaau pɔ̀lpɔlee, bisaraaŋakpilib péé ki kpáfì, bi nì bitindaŋkpilib nì bimaradakaliibi, bíǹ bibɔsoonliibi kitilee kɔkɔ, kí sòoǹ Yeesu bɔti, ní ki bóob́-u ŋŋmii ki cáa ŋúbiǹ gɔmina Piilati. 2 Ní Piilati bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee^a.» 3 Bisaraaŋakpilibee dɔ́miń ki sòon̄ tibɔti tikpil ki túǹ u-pu. 4 Míǹ puee, ní Piilati fātìi gíti bālifì-u yii: «A ŋmí níii? Aa gbìl̀ tin kɔkɔ bi sòoǹ ki tūntí a-pueeee?» 5 Yeesu kaa ti pée gātì tiba, ní Piilati bākatì sèeee.

Piilati kíí bí kpɔ̀ Yeesu

(Kpèè Maat 27.15-31, Luuki 23.13-25, Yoow 18.38-19.16)

6 Dilákatil jiŋaaliu kamaayee, gɔmina Piilati nìn gīintí usarkadaan ubɔ, un samaa yaa mēē-uee ní kí líí. 7 Kijapaai kiba nìn bí, bi yíì-kì Baaraabaasi. Bi nìn cúú u nì u-jutiibi biba ki tɔ́ sarkan, kun puee bi nìn kūū unil daliŋkin kunipaau kubɔ nìn yíì yii baa là kí pīlifiǹ gɔminee. 8 Ní kunipaau jɔ́m̀ ki bālifī Piilati ń gíiǹ un bi lèe kí líí, kii u nín kpààa ŋáań-bi puee. 9 Ní u bālifì-bi yii: «Ni là ḿ gíiǹ Juuda yab bɔtiu kí líí-naaa?» 10 Di sá yii u nìn béè yii kináŋ kin kin bisaraaŋakpilib nìn cáá Yeesu puee di yāntì bi cáań-u ki ŋúbíǹ-u. 11 Niinee, bisaraaŋakpilibee téé kunipaau ń lì yii bi là gɔmina ń gíiǹ Baaraabaasi ní kí líí. 12 Ní Piilati fātìi bālifì-bi yii: «Kin, m làá ŋá un ní ni yíì Juuda yab bɔtiuee mana?» 13 Ní bi fātìi kíí-u ki téeń mpɔn yii: «Bí kpáá-u ndɔpuntikaa pu!» 14 Ní gɔmina Piilati fātìi bālifì-bi yii: «Tikpitil tin u ŋée di sá tilati?» Niinee ní bi mɔ̄tìi kúuǹ mpɔn yii: «Bí kpáá-u ndɔpuntikaa pu!» 15 Piilati là kí sɔ̀ŋkì bi-pɔbiliŋee, ní ki gíiǹ Baaraabaasi ki líì-bi, ní ki yāntì bi gbáń Yeesu anaalab, ní ki dū-u ki tīī-bi bí cáá-u kí kpáá ndɔpuntikaa pu.

Soojab bíi bèel̄ Yeesu

(Kpèè Maat 27.27-31, Yoow 19.2-3)

16 Niinee, soojab cáá Yeesu ki kɔ́ǹ gɔmina cindi poon ní ki yíiń disoojakitil din kíǹee kɔkɔ. 17 Ní bi dū dibɔkutimandi cínciŋ ki pēeǹ Yeesu, ní ki dū ikuŋkum ki lùn̄ kibeefuulii ki cíkiǹ-u. 18 Bi nìn kíĺ ki jáaḿ-u yii: «Ti jáaḿ-si Juuda yab bɔtiu!» 19 Bi cáá ŋkpandɔ ki fátí u-yil ki tíiĺ timɔtan ki làbitī-u, ní ki dòoń ki gbàantí u-nimbiin. 20 Bi bēel̀-u míǹ ki dóòyee, ní ki cúú dibɔkutimandee ki pēetì-u ní ki gíiǹ úǹ u-ba wampeeŋkaati ki pēeǹ-u, ki nyántì-u kí cáá tin kpáá ndɔpuntikaa pu.

Bi kpáá Yeesu ndɔpuntikaa pu

(Kpèè Maat 27.32-44, Luuki 23.26-43, Yoow 19.17-27)

21 Bi cée, ki ká usanjitil ubɔ nyánní kusaau, bi yíì-u Siimɔn, u sá Siireen tiŋki, Aleekisandir nì Rufusi baa dee^b. Bi nìn páb́-u yii ú fōō Yeesu dɔpuntikaaŋu kí bùkun̄, 22 ní ki cáá Yeesu ki cūnnì laakin bi yíì Gɔlgɔtee (an taapu sá yii Kuyikpabiku laŋki). 23 Bi tīī-u ndamam min ni nnyɔkɔ ŋun bi yíì miiree ŋmàl̄ee ú nyɔ̀, ama u yíì, kaa nyùn̄. 24 Ní bi dū-u ki kpáá ndɔpuntikaa pu, ní ki yākatì u-wampeeŋkaati, ki tɔ́ kasi kí kpèè báà ŋma nín làá jī kuŋyee^c. 25 An nìn sá ntaafaawìiń tikúti tiwa ní bi kpáá-u ndɔpuntikaa pu ki dūu cóoǹ. 26 Bi nìn ŋmàn̄ tiŋmaŋmabiti ki nákáǹ u-yilpu kí dàkà kun pu ní bi kūū-uee, yii: «Juuda yab bɔtiu sèé.» 27 Bi nìn kpáá digaŋgandambi bili mun idɔpuntikaa pu ki dūu cóoǹ ki ŋàl̄-u, ubɔ u-ŋaŋgiil pú, un kíǹee u-ŋaŋgan pú. [ 28 An ŋá kii an nín nìn ŋmàn̄ puee dee yii: «Bi dū-u ki ŋàl̄ binikpitib^d.»]

29 Bisanjitiliibi nìn bèel̄-u ní ki gàatī diyil ki lì yii: «Iiin, sii un lī yii a làá gbá kí wīī kunimbɔtidii kí fàtīí mā-ku iwiin ita dalee^e, 30 fīī a-ba kí kpákatiń ndɔpuntikaa pu!» 31 Bisaraaŋakpilib nì bimaradakaliibi mun nìn bí ki bèel̄-u ki lì tɔb cee yii: «U fīī bin kíǹee ní kaa ŋūǹ kí fīī u-ba! 32 Isirayeel yab bɔtiu Meesiya ń kpákatiń kɔŋkɔnnee, tí kpèè kí nín fōō-u kí kíí!» Bin bi nìn kpáá idɔpuntikaa pu ki cóoǹ ki ŋàl̄-uee mun nìn bí ki sìí-u.

Yeesu kúm

(Kpèè Maat 27.45-56, Luuki 23.44-49, Yoow 19.28-30)

33 Kuwiŋkuluu gbáńee dibɔmbɔndi jéetì kitiŋ kɔkɔ pu ki tin sāā tikúti tita. 34 Tikúti titee, Yeesu fáá mbiil mpɔn, yii: «Eelooi, Eelooi, lama sabakitanii?» - An taapu sá yii «M-Nimbɔtiu, m-Nimbɔtiu, ba ŋá ní a dū-mi ki fá^f?» - 35 Bin bí niinee biba nín gbìl̄ u fáá mbiil mimmee, ní bi bí yii: «Pīlifìmaan! U yíì Eelii dee!» 36 Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ní ki dūu túuń ŋkpandɔ pu ki tīī Yeesu ń nyɔ̀^g, ní ki lī yii: «Tí yàntīmaan kí kpèè Eelii yaa làá dāan̄ kí kpákatiń-u!» 37 Yeesu gíti fáá mbiil mpɔnee, ní ki sīntì.

38 Sata un nìn pītì kunimbɔtidii poon ki gāntì laakin bi yíì circir páaa laŋkee nì laan kíǹee cúu cátì abuku ali ki kíliń yilpu ki dāa kátì taapu. 39 Room yab soojakpiliu un nìn sí ki bíitìń Yeesuee wál̀ u nín sīntì puee, ní ki lī yii: «Tiŋman kijapaai nee lafun sá Unimbɔti Jipɔɔn ní.»

40 Binimpoobi biba mun nìn sí kudandaŋu ki kpèé. Maarii un nyánní Magidalaa tiŋkinee, nì Saloomee nì Maarii un sá Yakubuwaai nì Joosee nee, mun nìn bí bi-kansikin. 41 Bíǹ di nìn táá Yeesu ki tútúǹ-u ŋyunti ŋun u nìn bí Galiileeyee. Binimpoobi biba mun tikpil nìn céeǹní-u ki jɔ́m̀ Jeerusaleem.

Bi síb́ Yeesu

(Kpèè Maat 27.57-61, Luuki 23.50-56, Yoow 19.38-42)

42-43 Bibɔsoonliibi kitil kansikin ukpil ubɔ nìn bí, binib nìn tɔ́-u tiŋan pu, bi yíì-u Jooseefi u sá Arimatee^h tiŋkin, u mun nìn bɔ́ntì u-ba ki cí Unimbɔti Beel. Ŋwìiń nín tóob́ kí jēetí ŋwiŋŋuŋfikaa ń kíĺee, ní u ká dipɔbil ki cūtì Gɔmina Piilati cee ki mēē-u nsan kí yòon̄ Yeesu wunti. 44 Gɔmina Piilati nín gbìl̄ yii Yeesu pūtì kpáàa kpíìyee, ní u bākatì, ní ki yíiń usoojakpil ki bālifì-u yii Yeesu nín kpíìyee an yúntàaa. 45 Usoojakpilee nín tùkū-u yii Yeesu lafun kpíì an yúntèe, ní Piilati pú Jooseefi kinyɔkɔ yii ú cùú yòon̄ Yeesu wunti. 46 Ní Jooseefi cūtì ki dá ŋŋaapiin ki dɔ́miń ki kpáatì Yeesu wunti, ki dūu tākaǹ ŋŋaapiinee ni, ní ki cáá-u ki bíl̀ dikaakul din bi nìn lùkū ditaŋkpalinee. U dū-u ki ŋá dikaakulee ni ki dóòyee, ní ki bíntì ditaŋkpakpaandi diba ki dūu pīiǹ dikaakul nyɔkɔ. 47 Maarii un nyánní Magidalaa tiŋkinee nì Maarii Joosee na mun nìn sí ki kpèé laakin bi dū-u ki bíl̀ee.