Maarki 16

Yeesu fīkitì ditaŋkpiilin

(Kpèè Maat 28.1-10, Luuki 24.1-12, Yoow 20.1-10)

1 Ŋwiŋŋuŋfikaa jítèe, Maarii un nyánní Magidalaa tiŋkinee, nì Maarii Yakubu na, nì Saloomee cūtì ki dáń talaalub bin bi cáa ŋáŋkí bitaŋkpiibi wuntee, kí cáá ŋmìtī Yeesu wunti. 2 Ku wúntì ŋwimpeekaa dal kutaafaau pɔ̀lpɔlee ní bi búntì dikaakul laŋki. 3 Bi cée ní ki bàlifī tɔb yii: «Ŋma di làá tin bìkitī-ti ditaŋkpal kí wàatī dikaakul nyɔkɔ dee?» 4 Bi wáaǹ ki kpēēyee, ki ká ditaŋkpakpaandee bíntì ki wāatì dikaakul nyɔkɔ. 5 Binimpoobee bāań ki kɔ́ dikaakulinee, ní ki wál̀ unaacimpɔɔn ubɔ kā bi-ŋaŋgiil pú ki pēē jibapiin, ní tifaandi kɔ́-bi. 6 Ama ní unaacimpɔɔnee bí-bi yii: «Taa fàŋkìmaan! M nyí ni nín nyàab̀ Yeesu Naasaareeti yɔu un bi kpáá ndɔpuntikaa puee. U fīkitì, waa bí doo. Kpèèmaan, laakin bi nìn bíl̀-uee sèé, 7 kí nín̄ cámaan kí tùkù u-boonnooliibi nì Peetroo yii u làá lìntī, ni tin kāntí-u Galiilee. Niin ní ni làá tin ká-u, kii u nín nìn pée tùkū-ni puee.» 8 Bi nyáń dikaakulinee bi-pɔbiliŋ bíil̀ ní bi sáń bi-wunti gbáà. Bi nín fàŋkée puee, baa pée máafì báà ubɔ tiba.

Yeesu lēē u-ba ki dàkā Maarii Magidalaa yɔu

(Kpèè Maat 28.9-10, Yoow 20.11-18)

[ 9 ^a Yeesu nín fīkitì kinyɔŋ wimpeepeekaaŋuee, Maarii un nyánní Magidalaa tiŋkin, un ni u nìn jìn̄ arasiniibi bilulee ní u yāntì u péé ki ká-u. 10 Unimpuee cūtì ki máafì bin nì Yeesu nìn tāatée. U bàn̄ee bíǹ kā nì dinimbinaamandi ki sūǹ. 11 Ama bi nín gbìl̄ unimpuee cee yii Yeesu bí dimaŋfalin u ká-u muee, baa fōō ki kíí.

Yeesu lēē u-ba ki dàkā u-boonnooliibi bili

(Kpèè Luuki 24.13-35)

12 Míǹ boonee, Yeesu gíti tí lēē u-ba mbamin nsanni ki dàkā u-boonnooliibi kansikin bili bin nìn yíkì ki cá kitimbilii kibanee. 13 Bi nìn fātìi gítìń ki máafì bin kíǹee, ní baa tí fōō bi mun bɔti ki kíí.

Yeesu lēē u-ba ki dàkā u-kpambaliŋ

(Kpèè Maat 28.16-20, Luuki 24.36-49, Yoow 20.19-23, Atuun 1.6-8)

14 Boonee ní u nyántì u-ba ki dàkā u-kpambaliŋ saalaa nì dibee ŋyunti ŋun bi kā ki jīǹ tijinee. Yeesu wòon̄-bi bi-pɔbiliŋ nín gbìfì baa fōō-u ki kííyee pu, kun puee baa nìn fōō bin ká u nín fīkitèe bɔti ki kíí. 15 Ní u tùkū-bi yii: «Cùmaan kitiŋ jaŋŋi kɔkɔwoooo kí sòoǹ tibɔmɔntiil nee kí tīī kunibuluu kamaa^b! 16 Un yaa fōō ki kíí ní bi fùl̄-u Unimbɔti nyimee kāntí difiil. Ama un yaa kaa fōō ki kííyee dāa kóò ditafadaaldin ní. 17 Maamaaci tuuŋŋi ŋin bin yaa fōō-mi ki kííyee làá nīn ŋáańee sɔ̀. M-yindi puee bi làá jà arasiniibi, ki làá sòoǹ isooncaan. 18 Bi làá cūtì ikoobu, kí nyɔ̀ ndabiim, tiba kaa làá ŋá-bi. Bi dāa pāantí bi-ŋalii bibunliibi pu ní bí ká dicáaǹdi.»

Yeesu cāntì-bi ki nín jɔ́ḿ yilpu

(Kpèè Luuki 24.50-53, Atuun 1.9-11)

19 Ti-Dindaan Yeesu sòon̄ nì bi míǹ ki dóòyee, ní ki yíkìi nín jɔ́ḿ yilpu ki tin kāl̀ Unimbɔti ŋaŋgiil pú^c. 20 Ní u-boonnooliibi búntì ki sòoǹ tibɔmɔntiilee ajan kɔkɔ, ní ti-Dindaan bí bi-cee ki tūǹ maamaaci tuuŋŋi ki dàkà yii tibɔti tin bi sòoǹee sá ibaamɔn.]