Maarki 14

Bi búkú kí kpɔ̀ Yeesu

(Kpèè Maat 26.1-5, Luuki 22.1-2, Yoow 11.45-53)

1 An nìn kíǹ iwiin ili, bí jī Dilákatil jiŋaaliu nì jiŋaal un bi ŋmóò kpɔnɔb bin kaa cáá ŋkpɔnɔnyɔkɔee^a. Bisaraaŋakpilib nì bimaradakaliibi nìn nyàab̀ nì nciin poon kisàmbiki kin pu bi làá dī kí cúú Yeesu kí kpɔ̀-uee. 2 Ní bi lī yii: «Án taa nín̄ sá jiŋaal poon, fìkil fikil ń taa kɔ́ samaa kansikin.»

Unimpu ubɔ yāaǹ Yeesu pu talaalu

(Kpèè Maat 26.6-13, Yoow 12.1-8)

3 Yeesu nìn bí Beetanii, Siimɔn un nìn sá unyaŋgbantee dumpu. Ŋyunti ŋun u kā ki jīǹ tijinee, unimpu ubɔ kóoń ki ŋúbiń talaalumɔnti un bi yíì náaree. U nìn pɔ̄ɔ̄ kudaau tikpil ki kā ditaŋkpal kpalbanyaaŋwun^b. Ní unimpuee fáá ki wīī kpalbee nyɔkɔ ki kpáatì talaaluee ki sītì Yeesu yil pu. 4 Ní biba fōō diŋuul ki bí yii: «Ba pu ní bi fá talaalumɔnti nee míǹ? 5 Bi bàà ŋūǹ kí nyāfì-u animbikpaan kí dūú yàkatī biwɔfib.» Ní bi yíkìi bíi wòoǹ unimpuee. 6 Ní Yeesu bíi lìǹ-bi yii: «Yàntīmaan-u! Ba pu ní ni páb́-u míǹ? Unimpu nee ŋá ditummɔntiil ní ki tīī-mi. 7 Ni nì biwɔfib di làá nīn pée bí baabadal^c. Ni ŋūǹ kí nīn ŋáań-bi tiŋan ŋyunti ŋun ni yaa lèe. An yaa kíǹ man, maa làá nīn bí ni-cee baabadal. 8 Min u ŋúńee ní u ŋée: u péé ki dɔ́miń ki yāaǹ-mi talaalu kí bɔ́ntí m-wunti kí cīití ŋu-síbitam dal dee. 9 Ibaamɔn ní m tùkù-ni, duulinya kɔkɔwoooo laakin kamaa ní bi yaa láa sòon̄ m-bɔmɔntiitee, bi dāa téetí unimpu nee pu ki máafí min u ŋée.»

Juudasi kíí kí dū Yeesu kí ŋúbíǹ u-nannanliibi

(Kpèè Maat 26.17-25, Luuki 22.7-14, 21-23, Yoow 13.21-30)

10 Ŋyunti gbantee ní akpambal saalaa nì alee kansikin un bi yíì Juudasi Isikaariyɔtee cūtì ki ká bisaraaŋakpilibee kí sòoǹ nì bi min ní u làá ŋá kí dū Yeesu kí ŋúbíǹ-bee. 11 Bi nín gbìl̄ mimmee, an mɔ́ɔkiǹ-bi, ní bi pōoǹ-u yii bi làá tīī-u animbil. Juudasi nìn kíĺ ki bíi nyàab̀ ŋyunti ŋun di kítì ú dū Yeesu kí ŋúbíǹ-bee.

Yeesu nì u-boonnooliibi bíi jīǹ Dilákatil jiŋaaliu

(Kpèè Maat 26.17-29, Luuki 22.7-23, Yoow 13.21-30, 1 Kɔra 11.23-26)

12 Jiŋaal un bi ŋmóò kpɔnɔb bin kaa cáá ŋkpɔnɔnyɔkɔee wimpeekaaŋu dal ŋun bi làntī apibil kí jī Dilákatil jiŋaaliuee, ní Yeesu boonnooliibi bí-u yii: «La ní a là tí cù kí bɔ́ntí-si Dilákatil jiŋaaliu jinti?» 13 Ní u tú u-boonnooliibi bili, ní ki tùkū-bi yii: «Nín̄ cámaan kitiŋin, ni làá tū uninja ubɔ tú dinyimbool. Ní nīn táá-u. 14 Laakin u yaa tin kɔ́ee, ni mun ń kɔ́ niin kí bàlifì kudiidaan yii: <Ukpil bàlifī-si yii, m-diiku kun poon man nì m-boonnooliibi làá jī Dilákatil jiŋaaliu jintee bí la?> 15 Niinee, u làá dàkà-ni diditɔntɔkɔl yilpu, kudii kun poon wāā, bi bɔ́ntì tikɔkɔ sée. Niin ní ni làá bɔ́ntí-ti tijin.» 16 U-boonnooliibi búntì ki bàn̄ kitiŋinee, ki ká an jítì kii u nín bàà tùkū-bi pu ki síiǹee deedee, ní bi bɔ́ntì Dilákatil jiŋaaliu jinti.

17 Kujoou jóotèe, Yeesu nì u-kpambaliŋ saalaa nì alee bāań niin. 18 Ŋyunti ŋun bi kāl̀ ki bíi jīǹ tijinee, ní Yeesu bí yii: «Ibaamɔn ní m tùkù-ni, man nì nimbi bin kā ki jīǹee kansikin ubɔ làá dū-mi kí ŋúbíǹ m-nannanliibi^d.» 19 Niinee, kunimbaau kɔ́-bi, ní bi kíĺ ki bíi bàlifī-u ubɔ ubɔ yii: «Kéè an kaa sá mamaa!» «Kéè an kaa sá mamaa!» 20 Ní Yeesu kíí-bi yii: «An sá nimbi saalaa nì bili nee kansikin ubɔ man nì un sèetī disambibaantiilinee^e. 21 Man Kinibiki cá kí kpú ní nee, kii an nín ŋmàn̄ ki síiǹ m-pu miŋyee^f. Ama mbusu dɔ̄ ki cí un làá dū-mi kí ŋúbíǹ m-nannanliibee. Bi yaa kaa bàà màl̄ udaan, an bàà sɔ́.»

Ti-Dindaan jikaati

(Kpèè Maat 26.26-30, Luuki 22.14-20, 1 Kɔra 11.23-25)

22 Ŋyunti ŋun bi bíi jīǹee, ní Yeesu yōoǹ kpɔnɔ ki pàkā Unimbɔti, ki cúu gífì gífì, ki yākatì ki tīī u-boonnooliibi kɔkɔ, ní ki bí yii: «Fōōmaan! Doo di sá m-wunti.» 23 Ní ki yōoǹ ndaam, ki jáam̀ Unimbɔti ki dóòyee, ní ki dūu tīī-bi, ní bi-kɔkɔ nyùn̄. 24 Ní u tùkū-bi yii: «M-fatikuu dee, fatiku un cāabìń mpèé binib nì Unimbɔti kansikinee dee^g. Fatikuee di nyáń kí fīī binib kupaau. 25 Ibaamɔn ní m tùkù-ni, maa ti bí kí nyɔ̀ ndamam nee kí nīn cí daliŋkin m làá gíti nyɔ̀-mì mpɔm Unimbɔti Beelinee.» 26 Ŋyunti ŋun bi gāā jiŋaal laŋyi^h ki dóòyee, ní bi nyáń ki búntì Ɔliifi sufii jool pu.

Peetroo làá néé yii waa nyí Yeesu

(Kpèè Maat 26.30-35, Luuki 22.31-34, Yoow 13.36-38)

27 Yeesu bí u-boonnooliibi yii: «Ni-kɔkɔ làá fá-mi, kii an nín ŋmàn̄ Unimbɔti gbɔŋkun puee yii: <M làá dāá fáá kí kpɔ̀ upikpaal, ní ipii ń yàl̄ⁱ.>» 28 Yeesu gíti lī yii: «Ama m yaa láa fīkitèe, m làá lìntī kí cīití-ni Galiilee.» 29 Ní Peetroo lī-u yii: «Bi-kɔkɔ yaa féeń-saaa, man kpá kí fá-si.» 30 Ní Yeesu bí-u yii: «Ibaamɔn ní m tùkù-si, díǹ nyeeku gba, kí wàatī ukooja ń bāakì milee, a làá néé diba dibee mita pu yii saa nyí-mi!» 31 Ní Peetroo kíí-u yii: «Báà an yaa sá-mi ŋkúm, man nì si làá kpú, man kpá kí néé yii maa nyí-si!» Ní u-boonnooliibi bin kɔkɔ kíǹee mun lī míǹ mbaantiim!

Yeesu bí Geetiseemanee ki mèé Unimbɔti

(Kpèè Maat 26.36-46, Luuki 22.39-46)

32 Yeesu nì u-boonnooliibi búntì laakin bi yíì Geetiseemaneeyee^j, ní Yeesu tùkū-bi yii: «Kàl̄maan doo, man làá cù kí mèè.» 33 U nìn kpáaǹ Peetroo nì Yakubu nì Yoowaneesi. Tifaandi nì dinimbinaamandi kíĺ ki bíi bàń-uee, ní u tùkū-bi yii: 34 «Kunimbaau kɔ́-mi tikpil ki cáǹ-mi ŋkúmin. Kàl̄maan doo kí nīn cí kí taa gèeǹ!» 35 U lī mimmee, ní ki sútì nyɔkɔpu fiii ní ki tin dōoǹ dicincibil, ní ki mēē yii an yaa bàà kítì, Unimbɔti ń kàkatī falaa yuntiŋu gbanti kí wàatī-u. 36 U nìn lī yii: «M-Baa, tiba kaa pée pɔ̄ɔ̄ a-cee! Kàkatī falaanyɔkaa nee kí wàatī-mi! Ama nì míǹ kɔkɔee, m nyàab̀ a-làtam ní, kaa sá mama m-ba nín là puee.» 37 Yeesu fātìi gítìń u-kpambaliŋ atee cee ki ká bi dɔ̄ ki gèeǹ, ní u fīntì-bi, ní kí bí Peetroo yii: «Siimɔn, a gèeǹ níii? Aa kpáàa ŋúń ki kāl̀ ki cíitì kukúbaantiiu ń jītí kí taa gèeǹaaa? 38 Fìntīmaan kí nīn mèé, án nín làá ŋá pu ni yaa kɔ́ icɔŋkinee ní taa lítée. Unil bàà cáá nlandɔkɔmɔnti, ama ní ki bí iwɔfin.»

39 Yeesu fātìi sútì nyɔkɔpu ki mēē ki sòon̄ tibɔbaantiil, 40 ní ki fātìi tí gítìń ní ki ká bi dɔ̄ ki gèeǹ, kun puee ŋgeem nìn cáá-bi tikpil. Bi fīntèe, baa nyí bi nín làá kíí-u puee. 41 U búntì ki gíti tí gítìń ntataatiim, ní ki lī-bi yii: «Ni dáá gbíntìi dɔ̄ ki gèeǹ ki ŋùŋfāa! Too, an dóò. Kɔŋkɔnnee an ŋmāntì bí dū man Kinibiki kí ŋúbíǹ binikpitib dee. 42 Un làá dū-mi kí nyāfèe di bàan̄ nee. Yīkìmaan tí cù.»

Bi cúú Yeesu

(Kpèè Maat 26.47-56, Luuki 22.47-53, Yoow 18.2-11)

43 Yeesu kaa láá sòon̄ ki ŋmíl̀, kpalaayee ní u-kpambaliŋ saalaa nì alee kansikin un bi yíì Juudasee cílìń, u nì kunipaau kubɔ, kúǹ ŋúbiń ntàataajimu nì atambɔn. Bisaraaŋakpilib nì bimaradakaliibi nì bitindaŋkpilib di nìn túnní-bi. 44 Juudasi un làá nìn dū Yeesu kí ŋúbíǹ-bee nìn tīī-bi kudaaŋŋu yii: «Un m yaa kpàl̄ ki jáam̀ee, un ni nyàab̀ee dee, ní cúúmaan-u tiŋan kí nīn cáá-u ki cá!» 45 Juudasi bāań kpalaayee ki sútì ki pìl̄ Yeesu, ní ki bí yii: «Ukpil,» ní ki kpàl̄-u. 46 Niinee bin táań Juudasee cìb̄ ki cúú Yeesu. 47 Bin nìn bí Yeesu ceeyee kansikin ubɔ fɔ́fì u-tàataajiki ní ki gāā ki wúkutì usaraaŋakpil tɔntɔnliu tafal^k. 48 Ní Yeesu bí-bi yii: «M sá unikpiti naaa? Ba pu ní ni ŋúbiń ntàataajimu nì atambɔn kí dāá cúú-mi?

49 Baabadal m bí kunimbɔtidiin ni-kansikin ki dàkà binib, ba pu ní naa cúú-mi niin? Ama kɔŋkɔnnee, Unimbɔti gbɔŋku nín sòon̄ ki síiǹ m-pu miŋyee ń ŋá!» 50 Niinee, u-boonnooliibi kɔkɔ sáǹ ki wāatì-u^l. 51 Unaacimpɔɔn ubɔ nìn táá Yeesu ki pēē sata. Bi cìb̄ kí cúú-uee, 52 ní u yāntì sata bi-ŋaan ki sáǹ dicancaŋgbeel.

Bi cáá Yeesu ibɔsoon

(Maat 26.57-68, Luuki 22.54-55, 63-71, Yoow 18.12-14, 19-24)

53 Bi cáá Yeesu ki búntì usaraaŋakpil dumpu, ní bisaraaŋakpilib nì bitindaŋkpilib nì bimaradakaliibi kɔkɔ kóoǹní ki kpáfì niin. 54 Peetroo nìn táá Yeesu aboon aboon ki tin bàn̄ usaraaŋakpil cindi ní ki kāl̀ soojab kansikin ki wùl̀ ŋŋmi.

55 Bisaraaŋakpilib nì bibɔsoonliibi kitil kɔkɔ nyàab̄ bin làá lēē seera Yeesu pu bí ŋmā kí kpɔ̀-uee, ní kaa ká. 56 Di sá yii binib tikpil nìn mɔ́ntì u-nyɔkɔpu, ní bi-nyɔmmu kaa pēē^m. 57 Biba yíkìi mɔ́ntì Yeesu pu ki lī yii: 58 «Ti gbìl̄ u sòon̄ yii: <M làá gbá kí wīī kunimbɔtidii kun binib máń nee, kí dū iwiin ita kí mā kupɔŋu kun binib kaa dū bi-ŋalii ki máńeeⁿ.>» 59 Nì míǹ kɔkɔee, bin lēekì an seerau gbantee nyɔmmu kaa pēē. 60 Niinee, usaraaŋakpil yíkìi síl̀ bi-kɔkɔ nimbiin ki bālifì Yeesu yii: «Binib nee nín bí ki sòoǹ a-pu miŋyee, ba ŋá ní saa kíikí ní?» 61 Ní u ŋmí, kaa gātì tiba. Ní usaraaŋakpil gíti bālifì-u mpɔm yii: «Sii di sá Unimbɔti tinyooldaan Jipɔɔn un u túnní ú nīn sá ubɔteeee?» 62 Ní Yeesu kíí-u yii: «M lafun sá-u. Ni làá dāá ká man Kinibiki kā Unimbɔti Mpɔŋkɔdaan ŋaŋgiil pú, ní ki làá ká m nyánní yilpu atagbanni ki dòoń^o.» 63 Usaraaŋakpil gbìl̄ mimmee, ní ki dáaĺ tiwan tin u pēēyee ki cátì, ní ki bí yii: «Ti gíti nyàab̀ seeradambi kí ŋá ba? 64 Nimbi ni-ba gbìl̄ u nín ŋèeǹ nì Unimbɔtee, ni dàkafī yii ba?» Ní bi-kɔkɔ bí yii u-bɔti kaa ŋān̄, u máaǹ ŋkúm^p. 65 Ní biba kíĺ ki tíiĺ timɔtan ki làbitī Yeesu pu. Bi dū ŋŋaabu ki bīiǹ u-nimbiin ki fátí-u, ní ki bàlifī-u yii: «Sii un wāĺee, tùkù-ti un di fáá-see!» Ní pilisib mun fōō-u ki bíi fátí-u itampa^q.

Peetroo néé yii waa nyí Yeesu

(Kpèè Maat 26.69-75, Luuki 22.56-62, Yoow 18.15-18, 25-29)

66 Ŋyunti ŋun Peetroo nìn dáá bí taapu cindinee, bisapɔmbi bin bí usaraaŋakpil cee ki tūǹ ditundee ubɔ dɔ́miń 67 ki ká Peetroo bíi wùl̀ ŋŋmi. Ní u kpēē u-nimbiin, ní ki bí yii: «Si mun nì Yeesu Naasaareeti yɔuee di nìn tāatí!» 68 Ní Peetroo néè ki bí yii: «Maa nyí tin a sòoǹee, kaa gbìl̀ ti-taapu.» Niinee, Peetroo nyáń ki nín kóò kunaakooun ní ukooja súń. 69 Ní usapɔɔnee gíti tí ká-u niin, ní ki bíi tùkù bin bí niinee yii: «Binibee kansikin ubɔ sèé!» 70 Ní u gíti néé. An kútì fiiiyee, bin nìn bí niinee bí Peetroo yii: «Tiŋman, si mun ŋmàl̄ binibee ni. Ti wāĺ yii a sá Galiilee watil pú niliu ní.» 71 Niinee, Peetroo kíĺ ki bíi pùtī ki tíntí yii: «Maa nyí uninja un bɔti ni sòoǹee!» 72 Kpalaayee, ukooja báakì nliliitiim, ní Peetroo téetì dinyɔɔbundi din Yeesu bàà lī-uee, yii: «Kí wàatī ukooja ń bāakì milee, a làá néé diba dibee mita pu yii saa nyí-mi.» Niinee ní u kíĺ ki bíi sūǹ ki yáliŋkí.