Maarki 13

Yeesu sòon̄ kunimbɔtidii wīitam bɔti

(Kpèè Maat 24.1-2, Luuki 21.5-6)

1 Ŋyunti ŋun Yeesu nyēeń kunimbɔtidiinee, ní u-boonnooliibi kansikin ubɔ bí-u yii: «Ukpil, kpèè bi nín dū ataŋkpakpaan ŋin ki máń adikpaan an ŋān̄ miŋyee!» 2 Ní Yeesu kíí-u yii: «Kéè a ká adikpaan neeyaa! Dalbee, ditaŋkpal diba kaa dāa gíti tɔ́kɔ́ di-juti pu. An kɔkɔ làá dāá wīī ní.»

Falaa un làá bàń kitiŋ kúntitamee

(Kpèè Maat 24.3-28, Luuki 21.7-24)

3 Yeesu bàn̄ ki kāl̀ Ɔliifi sufii jool pu, u-nimbiin túliń kunimbɔtidiiyee watil, ní Peetroo nì Yakubu nì Yoowaneesi nì Andree bālifì-u tibɔti nee bi-ŋmaniŋma yii: 4 «Tùkù-ti ŋyunti ŋun ní tin kɔkɔ a bàà lēe làá dāá bàńee, nì kudaaŋŋu kun ti làá dū kí béé yii ŋyunti bāańee.»

5 Niinee, Yeesu kíĺ ki bíi sòoǹ nì bi yii: «Ní nīn nyíǹ ni-ba ubɔ ń taa ŋmàtiǹ-ni, 6 kun puee binib tikpil làá dāá dū man yindi kí kpántí bi-yaŋ ní kí lì yii bíǹ di sá Meesiya ní kí ŋmàtiǹ binib tikpil. 7 Ni làá dāá gbìl̄ bi sòoǹ tijáti tin pìlīǹ-nee nì tin dátiǹ-nee bɔti. Ama ni-pɔbiliŋ ń taa bīil̀. An máaǹ tíǹ kɔkɔ ń bàń kí wàatī, ama duulinya kúntitam kaa dá láá yá. 8 Ditimbundi diba dāa yíkí kí jáǹ diba, ní dibeel diba mun ń jáǹ diba. Kitiŋ làá dāá cìŋkì ajan kupaau pu, ŋkùm làá dāá nyā. Tíǹ kɔkɔee dāa sá kii imatiŋween nín kífí puee ní. 9 «Ní nīn nyíǹ ni-ba! Man puee bi làá dāá cùnnì-ni ibɔsoon, kí gbá-ni anaalab akpafidiinni, kí cáá-ni gɔminab nì bibɔtiibi nimbiin, mimmee ni làá ká mpaan kí sòoǹ nì bi man pu. 10 Ama an máaǹ yii inibool kɔkɔ ń gbìl̄ m-bɔmɔntiiti kí wàatī ní duulinya ń nín kúntí. 11 Ŋyunti ŋun bi yaa láa cúú-ni ki cáǹ ibɔsoonee, ní taa nín̄ yáliŋkí tin ni làá tin sòoǹee pu. Ni yaa láa bàn̄ee, ní sòoǹ tin Unimbɔti yaa tīī-ni niinee. Di sá yii, an kaa sá nimbi di làá sòoǹ, an sá Unimbɔti Fam di làá tīī-ni tin ni làá sòoǹee. 12 Unil làá dāá cúú u-nabiki ní kí tīī bí kpɔ̀, ní ubaati ń dū u-biki kí tīī bí kpɔ̀, ní kibiki ń jáǹ ki-baa nì ki-na ní kí yàntī bí kpɔ̀-bi^a. 13 Báà ŋma dāa ná-ni kun puee ni nóó-mi. Ama un yaa pɔ́ɔǹ u-ba ki tin kátì-kuee di làá dāá ŋmátí.»

Nnaabukpaan ŋun dòońee bɔti

14 «Ni làá ká <kuwaŋkpitiu kun cāabìń ntimbiilee> kɔ́ ki kíǹ ki bí laakin kuaa bàà máaǹ kí kɔ́ee^b. - Un kàaǹ tibɔti nee máaǹ kí ŋá ŋká! - Ŋyunti gbantee, bin yaa láa bí Juudee tiŋkinee ń sāǹ kí dàb̄ ajoon. 15 Un yaa láa bí dicindee ń taa lì yii u làá kpákatí kí kɔ́ kudiin kí yòon̄ tiba^c, 16 ní un yaa láa bí kusaauee ń taa lì yii u là kí fàtī mmɔŋki kí yòon̄ u-bɔkutil. 17 Ama falaa dɔ̄ ki cí bipɔdambi nì bimatib yaadal wiiŋyi! 18 Mèèmaan Unimbɔti an bɔti ń taa bàń kuseeun. 19 Doooo, Unimbɔti nín náań kitiŋ ki dāa sāā díǹ nee, an falaau juti kaa láá jéetì nnibiyaamu pu, míǹ ní falaa gbanti juti mun kaa ti bí kí dāan̄^d. 20 Ti-Dindaan yaa kaa bàà bātì falaayee wiiŋyi pu, báà unibaanti kaa bàà ŋmátí. Ama bin u lútì bí nīn sá u-yabee pu ní u bātì an wiiŋyi. 21 «Ŋyunti gbantee, ubɔ yaa tùkū-ni yii, Meesiya bí doo, àá u bíń lapu, ní taa fōō kí kíí. 22 Di sá yii bin làá mɔ̄ntì yii bíǹ di sá meesiyabee nì Unimbɔti bɔnaatiliibee làá dāá nyā ki ŋáań tikpaŋkpantiil nì maamaaci tuuŋŋi, kí bàà dūú ŋmàtiǹ bin Unimbɔti lútèe gba. 23 Míǹ puee, ní nīn nyíǹ ni-ba. M tùkū-ni tikɔkɔ ní nīn nyí ki yóoǹ ní án nín bàń.»

Kinibiki gítintam

(Kpèè Maat 24.29-31, Luuki 21.25-28)

24 «Falaayee yaa jítì boonee, ŋwìiń dāa kpántí dibɔmbɔndi, uŋmal mun kaa dāa gíti pīiǹ. 25 Iŋmalbijaa dāa kìtīń kutaa pu ki lítiń, ní ipɔn in bí kutaa puee ń cìŋkì^e. 26 Ŋyunti gbantee ní bi làá ká man Kinibiki dòoń atagbanni ki cáá mpɔn tikpil nì tinyool^f. 27 M làá dāá tɔ̄ń Unimbɔti tuuŋyi ń cù duulinya kɔkɔn, kí tin sāā kutagbɔŋu nì kitiŋkuntinyɔkɔ, kí kóoǹní bin bin Unimbɔti lútèe^g.»

Tin fiigi subu dàkà-tee

28 «Ní pīlifìmaan fiigi subu nín dàkà-ti tibɔti tiŋyee. Di sá yii ni yaa ká fiigi subu tɔ́ apan ki bíi túkù tifaapɔnee, ni béetí yii kuseeu tóobiń dee. 29 Míǹ mbaantiim, ni yaa ká tin kɔkɔ m máafì-ni nee bíi jītée, béémaan yii m-dāantam tóobiń dee. 30 Ibaamɔn ní m tùkù-ni, waanee nib kaa làá kpú kí kúntí ní an bɔti kɔkɔ ń bàń. 31 Kutagbɔŋu nì kitiŋ dāa bí kí kúntí, ama man bɔti kaa bí kí kúntí jaanjaan.

Unimbɔti baba di nyí ŋwiin

(Kpèè Maat 24.36-44)

32 Ubɔ kaa nyí ŋwiin nì kukúluu kun ní an bɔtee làá bàńee. Unimbɔti tuuŋyi in bí yilpuee kaa nyí, man u-Jipɔɔn gba kaa nyí, asee ti-Baa Unimbɔti baba di nyí. 33 Ní nīn nyíǹ ni-ba kí taa gèeǹ. Di sá yii naa nyí an yuntiŋu. 34 An dāa bí kii unil ubɔ nín cá nsan pu ki yāntì u-tɔntɔnliibi u-cindee ní. U yākatì báà ŋma nì u-tundi, ní ki kpáafì un cí kipunyɔkɔee ń taa nín̄ gèeǹ, ní ki búntì. 35 Taa gèem̀maan! Di sá yii naa nyí ŋyunti ŋun kudiidaan làá bàńee, an yaa sá kujooueeee, kunyataasiiueeee, ŋkoosiimeeee, kutaafaaueeee, naa nyí. 36 Ní taa yàntī ú bàń kí túuǹ-ni ni dɔ̄ ki gèeǹ. 37 Tin m lì nee, m lì ki tùkù báà ŋma ní: taa gèem̀maan!»