Maarki 12

Bipaadaŋkpitib bɔŋmantikaati

(Kpèè Maat 21.33-46, Luuki 20.9-19)

1 Niinee, Yeesu kíĺ ki cáá tibɔŋmantikaal ki sòoǹ, ní ki lī yii: «Uninja ubɔ di kùn̄ fiinyi sufii kpaabu. U cóoǹ kunaabakau ki māntì ki tú-bu, ní ki gbìn̄ mbòó^a ŋun ni u làá nīn cùkutī abil ki lèekī ndamamee, ní ki gāā isupaa, ki dū bukpaayee ki kpāaǹ bipaadambi, ní ki búntì nsan. 2 Isufee biliŋ kìtitam bāańee, ní u túnní u-tɔntɔnliu ubɔ bipaadambee cee ú dāá fōō u-jandi. 3 Ní bi cúú utɔntɔnlee ki gbáń ní ki jìn̄-u ki gíiǹ nì iŋaŋkulim. 4 Ní bukpaadaanee gíti tí nyàab̄ u-tɔntɔnliu upɔɔn ubɔ ki tú bi-cee. Ní bi gíti cúú u mun ki gbáń ki cíl̀ diyil ki sāaǹ-u. 5 Ní bukpaadaan gíti tí lēē unitataati ki túnní ní bi kūū úǹ. Míǹ mbaantiim ní bi nìn ŋáaǹ bitɔntɔnliibi kupaau, bi nìn gbáń biba ní ki kūū biba. 6 Báà ubɔ kaa ti bí ú tɔ̄, see u-jipɔmbaabil un u néeńee. Ní u dū-u ki túnní bi-cee njoolkaam, ki dākafì yii: <Bi làá fàŋkì m-jipɔɔn.> 7 Ama bipaadambee nín wál̀ u dòońee, ní bi lī tɔb cee yii: <Kpèè, un làá dāá jī u-baa gaajawantee di dòońee! Tí kpɔ̀maan-u kí jī bukpaa.> 8 U bāańee ní bi cìb̄ ki cúú-u ki kūū, ní ki dū-u ki lúkú ŋkpaabuku.»

9 Yeesu lī míǹ ki dóòyee, ní ki bālifì-bi yii: «Kɔŋkɔnnee, bukpaadaanee làá ŋá mana? Asee ú dāan̄ kí kpɔ̀ bipaadambee, ní kí dū bukpaayee kí ŋúbíǹ bipɔmbi. 10 Ni pée máaǹ ki kàan̄ Unimbɔti gbɔŋkun dinyɔɔbundi din lì yii:

<Ditaŋkpal din bidimaliibi nìn dūu fée,

díǹ di dāa kpántì ditaŋkpal din yì kudii pɔŋŋuee.

11 Ti-Dindaan nín ŋá tiŋyee

kaa gbí mmaam ti-ceeee^b?>»

12 Ŋyuntee, Yeesu nannanliibi bíi nyàab̀ kí cúú-u, ní ki gíti fàŋkí kunipaau. Di sá yii u-nannanliibee nìn béè yii bíǹ pu ní u nìn sòon̄ tibɔŋmantikaal gbanti. Ní bi yāntì-u ki búntì.

Bi bālifì Yeesu yii bí pà lampoooo?

(Kpèè Maat 22.15-22, Luuki 20.20-26)

13 Bi túnní Yeesu cee Fariisab nì Eeroodi naacimbi kansikin biba bí dāan̄ kí píĺ-u tibɔti. 14 Bi bāańee, ní ki bí-u yii: «Ukpil, ti nyí yii a sòoǹ ibaamɔn, kaa fàŋkí báà ubɔ, kaa fàtīi tɔ̄ báà udaan yaa bí puee, ki dàkà nnimbɔtisan nì ibaamɔn. Mimmee, ti-marau pú nsan yii tí pà lampoo kí tīī Room gɔminau Seesaaraaa, an kaa pú?» 15 Yeesu béè bi-poonnyooŋŋu puee, ní ki bālifì-bi yii: «Ba pu ní ni píĺ-mi tibɔti míǹ kí kpèè m-nyɔkɔn? Cáaḿmaan-mi animbil ḿ kpèè!» 16 Bi cáańee, ní u bālifì-bi yii: «Ŋma yindi nì u-yil di náká animbil pu na?» Ní bi kíí-u yii: «An sá Seesaar.» 17 Niinee ní Yeesu fātìi kíí-bi yii: «Dūmaan tin Seesaar yèe kí tīī Seesaar kí dū tin Unimbɔti yèe kí tīī Unimbɔti!» Ní bi bākatì nì an nyɔɔbundi gbanti.

Bi bālifì Yeesu difìkitil bɔti

(Kpèè Maat 22.23-33, Luuki 20.27-40)

18 Ŋyuntee ní Sadusab dɔ́miń Yeesu cee. - Bíǹ di sá dikitil din lì yii difìkitil kpée^c. - Ní bi bí Yeesu yii: 19 «Ukpil, Mooyiisi ŋmàn̄ ki síiǹ-ti yii, unil yaa cáá kinabiki ní kinabikee yaa kpíì ki yāntì unimpu kaa cáá kibikee, ú fōō ukpiipu kí màal̀ kí téeǹ u-nabikee yil^d. 20 Kun pu ti bàlifēe di sá nnabiyaamu mululi di nìn bí. Upeepeekaa cáá unimpu ní ki kpíì ki yāntì unimpuee, kaa màl̄. 21 Uliliiti mun fōō ukpiipuee ní ki mun kpíì, kaa màl̄. Utataati mun míǹ, 22 ki tin sāā bilulee kɔkɔ cáá-u ki kpíì, kaa ká kibiki. Bíǹ kɔkɔ kúm boonee, unimpuee mun dāa dūu kpíì. 23 Míǹ puee, difìkitil dalee, bi-kɔkɔ yaa láa fīkitèe, bi-kansikin ŋma di dāa yì unimpuee? Kun puee bilulee kɔkɔ cáá-u ki ká.» 24 Ní Yeesu kíí-bi yii: «Kun pu ni bí diyìntil poonee di sá naa nyí Unimbɔti gbɔŋku poon bɔti, kaa nyí Unimbɔti pɔŋŋu mun. 25 Difìkitil yuntiŋuee, dinimpucaal nì dicamɔndi dāa kpá. Báà ŋma dāa bí kii Unimbɔti tuuŋyi nín bí pu yilpuee ní. 26 An yaa kíǹ bitaŋkpiibi fìkititamee, naa kàan̄ Mooyiisi nín ŋmàn̄ pu u-gbɔŋkuneeee? Laakin sòoǹ tin jítì kikuŋkumbiki caŋinee, Unimbɔti nìn lī-u yii: <Man di sá Abraam Nimbɔtiu, Isaaki Nimbɔtiu nì Jaakɔb Nimbɔtiu^e.> 27 Waa sá bitaŋkpiibi Nimbɔtiu, u sá bin wāĺee yɔu ní. Ni baasii bí diyintikpaandin ní!»

Mara un sá ukpaanee

(Kpèè Maat 22.34-40, Luuki 10.25-28)

28 Bimaradakaliibee ubɔ nìn bí ki gbìl̄ tibɔti tin pu Yeesu nì Sadusab nìn kpákèe. U nín ká yii Yeesu kíí-bi mmɔntiimee ní u sútìń ki pìl̄-u ki bālifì-u yii: «Marab kɔkɔ kansikinee, ulɔu di sá ukpaan ní?» 29 Ní Yeesu kíí-u yii: «Mara un sá ukpaanee di sá un lì yii: <Isirayeel yab pīlifìmaan. Ti-Dindaan Unimbɔti sá ubaanti ní. 30 Ni máaǹ kí nīn néeń ni-Dindaan ni-Nimbɔtiu nì ni-pɔbiliŋ kɔkɔ nì ni-naŋki kɔkɔ nì ni-landɔkɔŋu kɔkɔ nì ni-pɔŋŋu mun kɔkɔ^f.> 31 Maraliliiti di sá yii: <Á nīn néeń a-juti kii sii a-bee^g.> Mara ubɔ kaa ti bí ki jítiǹ bin bí nee.» 32 Ní umaradakalee lī-u yii: «An kā, ukpil. A lī nì ibaamɔn ní yii Unimbɔti sá ubaanti, ubɔ kaa ti bí asee úǹ baba^h. 33 Unil máaǹ kí nīn néeń Unimbɔti nì u-pɔbil kɔkɔ nì u-ciiŋyi kɔkɔ nì u-pɔŋŋu kɔkɔ, ní ki máaǹ kí nīn néeń u-juti kii úǹ u-bee. Míǹ jítiǹ tiwaŋkuti saraabi bin bi dù kí wà ŋŋmi kí tīī Unimbɔtee nì saraabi bin kɔ kíǹeeⁱ.» 34 Yeesu ká yii u kíí-u nì iciinee, ní u lī-u yii: «Aa dátiǹ Unimbɔti Beel.» Niinee báà ubɔ kaa ti mākaǹ kí bàlifì-u tiba.

Meesiya nì Daafiidi bɔti

(Kpèè Maat 22.41-46, Luuki 20.41-44)

35 Yeesu nìn bíi dàkà binib Unimbɔti bɔti kunimbɔtidiinee, u bālifì-bi tibɔti yii: «Nì nsan ŋulɔŋu poon ní bimaradakaliibi lì yii Meesiya sá Daafiidi naantiiu ní? 36 Di sá Unimbɔti Fam yāntì Daafiidi u-ba sòon̄ yii:

<Ti-Dindaan tùkū m-Dindaan yii:

Kàl̄ m-ŋaŋgiil pú kí nīn cí ŋyunti ŋun

m làá yàntī á nīn kíǹ ki tɔ́kɔ́ a-nannanliibi puee^j.>

37 Daafiidi u-ba yíì-u yii u-Dindaan, kin mana ní u ŋūǹ kí nīn sá u-naantiiu mun?» Kunipaau nìn pílifíǹ Yeesu ní an mɔ̄ǹ-bi.

Yeesu kūū bimaradakaliibi bɔti

(Kpèè Maat 23.1-36, Luuki, 20.45-47)

38 Yeesu dàkatam poonee, ní u gíti lī yii: «Nín̄ nyím̀maan ni-ba nì bimaradakaliibi! Bíǹ di néeń ki pèentí abɔkutifɔkɔ ki yìiǹ bi jáaḿ-bi ipaan in pu binib kpáfée, 39 ki kàal̀ nyɔkɔpu jaliŋ akpafidiinni nì diinabin. 40 Bíǹ di fìkì bikpiipoobi wanti ki gbēentí ki mèé ŋwimmeem ki yúntí fɔ́rrr bí ká-bi. Bíǹ gbanti di dāa kóò ditafadaaldi din gíti lákatèe ni!»

Unimpukpiipu ubɔ saraau

(Kpèè Luuki 21.1-4)

41 Yeesu cūtìi kāl̀ ki bíitiǹ laakin bi tòó saraa nimbiliŋee, ki kpèé kunipaau nín tòó animbil puee. Bigaajab tikpil nìn tòó animbikpaan, 42 ní ukpiipusoodaan ubɔ mun cáań igboo ili ki tɔ́. 43 Niinee ní Yeesu yíiń u-boonnooliibi ki bí-bi yii: «Ibaamɔn ní m tùkù-ni, ukpiipusoodaanee tɔ́ ki jítiǹ bin kɔkɔ tɔ́ saraa dooyee. 44 Bin béeyee cáań bi-nimbiliŋ ŋin baa làá dūu ŋá nì tibee ní ki tɔ́, ama unimpu nee, nì u-sool poonee, tin kɔkɔ u bàà cáá kí jēe ní u kúntì ki tɔ́.»