Luuki 10

Yeesu tú binib imuŋku ita nì saalaa nì bili

1 Boonee ní ti-Dindaan gíti lēē binib imuŋku ita nì saalaa nì bili^a biba, ki tú-bi bili bili bí lìntī u-nyɔkɔpu kí cù ntimu mun kɔkɔn úǹ u-ba bàà là kí cùee. 2 U nìn bí-bi yii: «Kudiceeu wīikí, ama bidicaliibi kaa náaǹ. Mèèmaan bukpaadaan ú tɔ̄ń bitɔntɔnliibi kí kūtì bí dāá cā u-jikaati. 3 Nín̄ cámaan. M tú-ni, ni làá nīn bí kii apibil ŋin bí isaakpan kansikinee ní. 4 Ní taa yòon̄ animbil, nì kuloou nì anaataka, kí taa yūĺ nsanni kí jāam̀ ubɔ. 5 Ni yaa kɔ́ kudicaŋu kunnee, ní péé péé kí jāam̀-bi yii: <Ŋgbansɔŋfi ń nīn bí kudicaŋu nee pu.> 6 Un yaa là ŋgbansɔŋfee yaa bí niinee, ní ú fōō ni-gbansɔŋfiŋuee. Un là ŋgbansɔŋfee yaa kpá niinee, ní kpáaǹ ni-gbansɔŋfiŋuee kí búntí. 7 Ni yaa kɔ́ laakin ní bi yaa fōō-nee, nín̄ kāmaan kudicaŋu gbantin. Tin kamaa ní bi yaa pée cáań-nee, ní jī kí nyɔ̀, kun puee utɔntɔnli máaǹ tipaal^b. Ní taa nín̄ kóò ki póotí adiin. 8 Ni yaa kɔ́ kitiŋ kin poon ní bi yaa fōō-nee, jīmaan tin kɔkɔ bi yaa pée cáań-nee, 9 ní kí cáam̀maan kitiŋ gbanti poon bunliibi, kí tùkù ki-nib yii: <Unimbɔti Beel sútì ki pìlīń-ni.> 10 Ama ni yaa kɔ́ kitiŋ kin poon ní baa fōō-nee, nyāmaan adan pu kí lì yii: 11 <Ti gbáfì ni-tiŋki kpɔŋkpɔm min táká ti-taaŋee gba ki gíiǹ ki tīī-ni^c. Ama nì míǹ kɔkɔee ní béé yii Unimbɔti beel sútì ki pìl̄-ni.> 12 Ibaamɔn ní m tùkù-ni, ibɔsoon dalee, Soodoom^d tiŋki tafadaaldi dāa sɔ́ǹ kitiŋ gbanti yal.»

Mbusu dɔ̄ ki cí ntimu mun kaa fōō Yeesu ki kííyee

(Kpèè Maat 11.20-24)

13 «Nimbi Kɔrasin tiŋki yab, mbusu dɔ̄ ki cí-ni, nimbi Beetisayida tiŋki nib. Mbusu dɔ̄ ki cí-ni, kun puee maamaaci tuuŋŋi ŋin m ŋáaǹ nimbi cee nee di yaa bàà nìn ŋá Tiir nì Siidɔn timmunee, kɔnampu nee ntimu gbanti nib bàà nìn pēeǹ ikpalcati ki dū ŋfantam ki pùkū bi-ba ki dàkā yii bi kpántì bi-bimbim^e. 14 Míǹ puee, ibɔsoon dalee, nimbi tafadaaldi dāa jítiǹ Tiir nì Siidɔn nib tafadaaldi. 15 Nimbi Kapeernayum tiŋki yab, ni nyí yii ni làá yīkì kí tin sāā kutagbɔŋu níii? Ni làá sìntī kí bà taapu taŋkpiibi ní^f.» 16 Ní u gíti lī u-boonnooliibi yii: «Un yaa pílifiǹ-nee, pílifiǹ man dee. Un yaa yíì-nee, yíì man dee, ní un yaa yíì mamee yíì un túnní-mee dee.»

Binib imuŋku ita nì saalaa nì bilee fātìi bāań

17 Binib imuŋku ita nì saalaa nì bili^g bin Yeesu túee fātìi bāań nì dipɔɔpindi, ní ki bí yii: «Ukpil, áli gba arasiniibi sīntiǹ bi-ba ki tīī-ti a-yindi pu!» 18 Ní Yeesu bí yii: «M ká Sitaan nín nyánní kutagbɔŋu ki bí kii ntaaŋmɔŋmɔee ki lítì. 19 M tùkù-ni yii m tīī-ni mpɔn ní tāā ikoobu nì inoom pu kí còom̀ kí nàan̄ Sitaan pɔŋŋu kɔkɔ, tiba kpá kí ŋá-ni tikpitil. 20 Ní taa nín fàal̀ yii arasiniibi nín sīntiǹ bi-ba ki tīī-nee ŋmaniŋma pu, ama ní nīn fàal̀ yii ni-yiŋŋi nín ŋmàn̄ yilpuee pu.»

Yeesu bíi fàal̀

(Kpèè Maat 11.25-27, 13.16-17)

21 Niinee ní Unimbɔti Fam yāntì Yeesu kíǹ ki bíi fàal̀, ní ki lī yii: «Óooo m-Baa, yilpu nì taapu Dindaan, m nyɔ́ŋkí-si a nín dū tibɔti nee ki bál̀ bin yíì bi-ba biciŋfitiibi nì binyiliibi bí taa béé-tì, ní ki dū-tì ki dàkā bin sá ŋwaamuee. M-Baa, tiŋman an sá míǹ, kun puee míǹ di ŋān̄ a-cee ki fáatì-si.

22 «M-Baa Unimbɔti dū tikɔkɔ ki tīī-mi. Báà ubɔ kaa nyí man un sá Unimbɔti Jipɔɔnee asee m-Baa, míǹ ní báà ubɔ kaa nyí un di sá Ubaatee, asee man u-Jipɔɔn nì bin man u-Jipɔɔn yaa là kí dū-u kí dàkèe.»

23 Ní u fātì u-boonnooliibi pu ní ki bí bíǹ ŋmaniŋma yii: «An sá diyimɔɔl ki tīī bin wāĺ tin ni wāĺ nee. 24 Ibaamɔn ní m sòoǹ nì ni, Unimbɔti bɔnaatiliibi nì bibɔtiibi tikpil bàà nìn pée nyàab̀ kí ká tin ni wāĺ nee ní kaa ká, ki bàà nìn nyàab̀ kí gbìl̄ tin nimbi gbìl̄ nee ní kaa gbìl̄^h.»

Usamaariija ubɔ niti

25 Niinee ní umaradakal ubɔ là kí píĺ Yeesu tibɔti kí kpèè u-nyɔkɔn, ní ki yíkì ki bí-u yii: «Ukpil, mana ní an sá ḿ ŋá ní kí ká dimaŋfal din kaa cáá dikúntilee?» 26 Ní Yeesu bí-u yii: «An ŋmàn̄ yii ba ní ti-marau poon? Tin tin a kàaǹee sòoǹ yii ba ní?» 27 Ní uninjee kíí-u yii: «An lī yii: <Á nīn néeń a-Dindaan a-Nimbɔtiu nì a-pɔbil kɔkɔ nì a-naŋki kɔkɔ nì a-pɔŋŋu kɔkɔ nì a-landɔkɔŋu kɔkɔ, ní kí nīn néeń a-juti kii sisi a-beeⁱ.>» 28 Ní Yeesu bí-u yii: «A kíí an ŋān̄, ŋá míǹ kí dāá ká dimaŋfal gbanti^j.»

29 Umaradakalee là kí pɔ̀ u-bee ní ki bālifì Yeesu yii: «Ŋma di sá m-juti ní?» 30 Ní Yeesu bí-u yii: «Uninja ubɔ di nyánní Jeerusaleem ki sìntī Jeeriikoo, ní digaŋgandambi biba kíntì-u nsanni ki tāfì-u tiŋan pu u fìkī. Bi fúkúl̀ u-wanti pílpil, ki búntì ki yāntì-u, u kíǹ ki dɔ̄ ki fìkī. 31 Ní usaraaŋal ubɔ mun yíkì ki dīń nsan gbanti. U bāań ki ká kijapaayee dɔ̄ee ní u páaǹ mpampa. 32 Ní Leefii yab ubɔ mun bāań ki ká kijapaayee dɔ̄, ní u mun páaǹ mpampa. 33 Ama usamaariija ubɔ cá nsan ki bāań ki yīkiǹ uninjee, ní ki súń u-saai, 34 ní ki sútì ki pìl̄-u, ní ki ŋá u-buuŋyi ŋkpam ní ki dū ndamam mun ki ŋá, ní ki póob́-u, ki yōoǹ-u ki kāaǹ u-maŋki pu, ní ki cáá-u ki cūnnì anicandiinni, ki kpēē-u tiŋan. 35 Kutaa wúntèe, ní u nyántì animbil ki tīī ukpil un kpèé anicandiinee, ní ki bí-u yii: <Á kpèè-mi kijapaai nee tiŋan. A yaa gíti jíń animbil min nyɔkɔm u-puee, m yaa láa fātìńee, ḿ téeǹ-si.>» 36 Ní Yeesu bālifì umaradakalee yii: «Binib bitee kansikinee, ŋma ní a ká yii u sá un digaŋgandambi kíntì ki gbáńee juti ní?» 37 Ní u kíí Yeesu yii: «Un ŋá-u tiŋanee di sá u-juti.» Ní Yeesu bí-u yii: «Too, a mun cùú ŋá míǹ mbaantiim.»

Yeesu māntì Maarta nì Maarii pu

38 Yeesu nì u-boonnooliibi nìn kíĺ nsan kí nīn cá ní ki dūu bàn̄ kitimbilii kiban. Unimpu ubɔ nìn fōō-u u-dumpu, bi yíì-u Maarta. 39 U nìn cáá naal ubɔ, bi yíì-u Maarii. Maarii úǹ nìn kā ti-Dindaan taaŋi taapu ki pílifí u-bɔti^k. 40 Maarta kaa nìn cáá mpaan, di sá yii atuun kupaau nìn ŋúb́-u, ní u dɔ́miń ki bí yii: «Ukpil, a-tafal kpá nì m-naal nín yāntì man baba pée bíi tūǹ atuun kɔkɔeeee? Tùkù-u ú dāá tūtuǹ-mi.» 41 Ní ti-Dindaan kíí-u yii: «Maarta, Maarta, a nìiǹ ki jìkì tiwan tikpil pu, 42 ama kuwambambaantiiu di páb́. Kúǹ ní Maarii lēē nee, ní ubɔ kaa ŋūǹ kí fōō-ku u-cee.»