Luuki 19

Yeesu nì Jaasee bɔti

1 Yeesu bàn̄ Jeeriikooyee, ki bíi còom̄ ki jītí kitiŋin. 2 Uninja ubɔ nìn bí niin, bi yíì-u Jaasee. U nìn sá bifɔtiliibi kpiliu ní ki sá ugaaja. 3 Kijapaayee bàà pée nyàab̀ kí wāl̀ un ní Yeesu baasii sée, ama u nín sá kinigiŋgiŋee puee, waa nìn ŋūǹ kí wāl̀-u, kun puee binib nìn múkú Yeesu pu tikpil. 4 Ní u sáǹ ki līntì nyɔkɔpu ki cūtìi jɔ́m̀ busubu pu kí wāl̀ Yeesu, kun puee Yeesu làá nìn jītí niin ní. 5 Yeesu dūu bāań niinee, ní ki wáaǹ yilpu ní ki bí-u yii: «Jaasee, kpákatiń malaa, kun puee sii dumpu ní m làá kɔ́ díǹ.» 6 Ní Jaasee ŋá malaa malaa ki kpákatìń ní ki fōō Yeesu ki cūnnì u-dumpu nì dipɔɔpindi. 7 Bin nìn bí niin ki ká mimmee nìn bíi gbùkum̄ yii: «Uninja nee cūtì ki kɔ́ unikpiti dumpu dee.» 8 Ní Jaasee síl̀ ti-Dindaan nimbiin ní ki bí yii: «Ti-Dindaan, kpèè, m làá lēē m-gaajati dijandi kí tīī bisoodambi, ní m yaa nìn mūul̀ ubɔ ki fōō animbil u-cee, m làá téeǹ-u min m mūul̀-uee minaa pu^a.» 9 Ní Yeesu bí-u yii: «Difiil kɔ́nní kudii nee poon díǹ, kun puee uninja nee mun sá Abraam maaliŋun ní. 10 Di sá yii man Kinibiki dɔ́miń kí nyàab̀ kí fīī bin nìn wáŋkèe ní.»

Bitɔntɔnliibi bita biba bɔŋmantikaati

(Kpèè Maat 25.14-30)

11 Ní Yeesu gíti kútì tibɔŋmantikaal nee ki lī bin nìn bí ki pílifíǹ-uee, kun puee bi nìn dàkafī yii u nín tóob́ Jeerusaleem nee, Unimbɔti làá dū-u kí kàan̄ Dibeel kɔŋkɔnnee ní. 12 Ní u lī yii: «Uninja ubɔ di sá ubɔti maaliŋun, ní ki yíkì ki búntì kitiŋ kiba poon ndandati kí cù kí fōoń dibeel, kí gítiń u-tiŋki pu kí dāá kàl̄ tibɔtiil. 13 Kí wàatī ú nín yīkèe, u yíiń u-tɔntɔnliibi kansikinee saalaa ní ki tīī bi-kɔkɔ kinimbifɔŋ kiba kiba bí nīn cáa bàntī ú dāan̄. 14 Ama ní u-tiŋkin nib kaa là u-bɔti. U yíkì kpalaayee, ní bi tú binib u-boon bí cùú lì yii: «Timbi kaa là kijapaai nee ń nīn sá ti-bɔtiu.» 15 Ama u nín cūtì bi kāaǹní-u dibeel u fātìńee ní u yíiń u-tɔntɔnliibi saalaa bin u nìn tīī animbil bí nīn cáa bàntēe kí kpèè yii bi bāntì ki ká mana. 16 Ní upeepeekaa dɔ́miń ki bí yii: <Ukpil, a nín tīī-mi animbil ḿ dūú bàntēe, m bāntì ki ká míǹ saalaa mun ki kútì.> 17 Ní u-kpiliu bí yii: <Mbòó, a sá utɔntɔmmɔnti, kun puee m tīī-si tiwan fiii ní a ŋúb́-tì nì deedee. An puee m kāaǹ-si á nīn sá ntimu saalaa bɔtiu.> 18 Ní uliliiti mun bāań ní ki bí yii: <Ukpil, a nín tīī-mi animbil ŋiŋyee, m dūu bāntì ki ká míǹ miŋmoo pu ki kútì.> 19 Ní ukpilee bí yii: <Si mun ń nīn sá ntimu muŋmoo bɔtiu.> 20 Ní ubɔ mun bāań, ní ki bí yii: <Ukpil, kpèè a-nimbiliŋ sɔ̀. M dūu kúĺ kiŋaabikin ki yóoǹ-si. 21 M fāŋkì-si, kun puee a sá unil un bɔti pɔ̄ɔ̄yee. Kun saa yóoǹee, kúǹ ní a yòontí, ní ki cēē kun saa búĺee.> 22 Ní ubɔtee bí-u yii: <Utɔntɔŋkpiti ní a sá. Tin tin a sòon̄ee, tíǹ ní m làá gíiǹ kí dūú kpɔ̀ a-bɔti. A nyí m sá unil un bɔti pɔ̄ɔ̄yee, ní kun maa síiǹee ní m yòontí, ní ki cēē kun kun maa búĺee. 23 Kin, ba pu ní aa cáá m-nimbiliŋ kí ŋá baŋkan, m yaa láa fātìi gítìńee, ḿ bàà fōō m-nimbiliŋ nì ipaati?> 24 Ní u bí bin bí niinee yii: <Fōōmaan animbil u-cee kí dūú kūtì un cáá saalaayee.> 25 Ní bíǹ bí yii: <Ukpil, u cáá saalaayaa!> 26 Ní u kíí-bi yii: <M tùkù-ni yii, un kamaa yaa ŋúb́ tin u cááyee tiŋanee, bi dāa kútí-u ní. Ama un kamaa yaa kaa ŋúb́ tin u cááyee tiŋanee ní bí dāá fōō fiii un u cááyee. 27 An yaa kíǹ m-nannanliibi bin bí yii baa là ḿ nīn sá bi-bɔtiuee, cáaḿmaan-bi kí kpɔ̀-bi m-nimbiin doo.>»

Yeesu kɔ́ Jeerusaleem nì inyɔŋki poon

(Kpèè Maat 21.1-11, Maar 11.1-11, Yoow 12.12-19)

28 Yeesu sòon̄ míǹ ki dóòyee, ní ki līntì bin táá-uee nyɔkɔpu ki búntì Jeerusaleem. 29 U nín tóob́ Beetifagee nì Beetanii, kigbantaŋ kin bi yíì Ɔliifi sufii joolee caŋinee^b, ní u dū u-boonnooliibi bili ki tú u-nyɔkɔpu ki tùkū-bi yii: 30 «Nín̄ cámaan kitimbilii kin bí ti-nyɔkɔpu nee. Ni yaa bàn̄ ki kɔ́ ki-nee, ni làá ká dimampɔmbil diba gbìn̄, din pu báà ubɔ kaa láá kāl̀ee, ní gbìntīmaan-dì kí cáań-mi. 31 Ubɔ yaa bālifì-ni yii: <Ba pu ní ni gbìntī-dèe?> ní kíí-u yii: <Ti-Dindaan di nyàab̀ kimaŋ.>»

32 Bin Yeesu túee búntì ní ki bàn̄ ki ká kii u nín tùkūń-bi puee deedee. 33 Ŋyunti ŋun bi bíi gbìntī kimaŋee ní ki-dindambi bālifì-bi yii: «Ba pu ní ni gbìntī-kì?» 34 Ní bi kíí-bi yii: «Ti-Dindaan di nyàab̀ kimaŋ.» 35 Bi cáań dimampɔmbilee Yeesu cee ní ki pēetì bi-wampeeŋkaati ki páaǹ di-pu ní ki yāntì Yeesu kāl̀^c. 36 Yeesu còom̄ ki cée, ní binib kpátí bi-wampeeŋkaati ki bīil̀ nsan pu^d. 37 U bíi kpákatí Ɔliifi sufii jool pu ki tóobiń Jeerusaleemee, u-boonnooliibi kpáfì dinikitikpaandi an mɔ̄ǹ-bi tikpil bi fàal̀ ki pàkà Unimbɔti mpɔn maamaacib bin bi nìn ká Yeesu ŋáaǹee pu. 38 Ní bi lì yii: «Ti-Dindaan ń bìin̄ ubɔti un dòoń u-yindi puee boon. Ŋgbansɔŋfi bí yilpu ní tinyool sá ki tīī Unimbɔti^e!»

39 Fariisab biba nìn bí kunipaaun, ní ki bí Yeesu yii: «Ukpil, tùkù a-boonnooliibi yii bí ŋmīĺee!» 40 Ní Yeesu kíí-bi yii: «M tùkù-ni ibaamɔn ní, báà bi nee yaa ŋmíl̀aaa, ataŋkpee làá kūuntì.»

Yeesu súń Jeerusaleem pu

41 Yeesu nín tóobiń kí kɔ́ Jeerusaleem ki wál̀ kitiŋee ní u bíi sūǹ ki-nib pu, 42 ní ki bí yii: «Díǹ wiiŋŋu nee ni yaa bàà ŋūǹ kí béé kun ŋūǹ kí cáań-ni ŋgbansɔŋfee, ama kɔŋkɔnnee an bí-ni dibalin. 43 An puee iwiin iba dòoń ni-nannanliibi làá dāan̄ kí bíĺ ataŋkpuku kí màntīí tū ni-tiŋki, ní kí lùtīí gɔ́ń-kì kí táká-ni. 44 Bi làá kúntí ni nì ni-tiŋki kɔkɔ, kí taa kíń báà kudigbuŋu, kun puee naa béè ŋyunti ŋun Unimbɔti dɔ́miń kí jòoń-nee.»

Yeesu jìn̄ biwannyafiliibi kunimbɔtidiin

(Kpèè Maat 21.12-17, Maar 11.15-19, Yoow 2.13-22)

45 Yeesu bāań Jeerusaleemee, ní ki kɔ́ kunimbɔtidiin, ki kíĺ ki bíi jì biwannyafiliibi, 46 ní ki tùkū-bi yii: «An ŋmàn̄ Unimbɔti gbɔŋkun yii: <M-diiku làá nīn sá ŋwimmeem diiku ní, ama ní nimbi dū-ku ki kpántì kunaayudii^f!>»

47 Yeesu nìn kíǹ ki bí baabadal kunimbɔtidiin ki dàkà Unimbɔti bɔti, ní bisaraaŋakpilib nì bimaradakaliibi nì bitindaŋkpilib bíi nyàab̀ bi nín làá dī pu kí kpɔ̀-uee. 48 Ama baa nìn nyí min ní bi làá ŋée, kun puee kunipaau kɔkɔ nìn bí ki pílifíǹ Yeesu kaa là kí lóó u-nyɔɔbundi báà diba.