Luuki 18

Ukpiipu nì ubɔsoonli ubɔ bɔŋmantikaati

1 Ní Yeesu dū tibɔti nee ki ŋmāntì kí dàkà yii an máaǹ bí nīn pée mèé kí taa gbèen̄. 2 U nìn bí yii: «Ubɔsoonli ubɔ di nìn bí kitiŋ kiban, kaa fàŋkí Unimbɔtaa, kaa tɔ́ unil mun. 3 Kitiŋ gbanti poonee, ukpiipu ubɔ nìn bí ki dòoń ubɔsoonlee cee múlmul ki bí-u yii: <M-nannanliu ŋá-mi tibɔti, pɔ̀ m-bɔti kí tīī-mi.> 4 Ní ubɔsoonlee tafal kpá, an tin yúntì, boonee ní u dāa bí u-ba yii: <Nì min kɔkɔ maa fàŋkí Unimbɔti, kaa tɔ́ unilee, 5 ukpiipu nee nín dòoń ki páb̀-mi pu nee, m làá sòoǹ bi-bɔti nee kí tīī-u. An yaa sá fám, u làá nīn pée dòoń ki páb̀-mi yéè ní kí dāá tìl̄ m-fam.>» 6 Ní ti-Dindaan gíti bí yii: «Pīlifìmaan ubɔsooŋkpitee nín lī puee. 7 Míǹ ní Unimbɔti làá sòoǹ kí pɔ̀ bin u lútì bi tíminsí-u ŋwiimpu nì kunyeeuee, waa làá yàntī-bi, u làá tūtuǹ-bi malaa. 8 Ibaamɔn ní m tùkù-ni, see ú sòoǹ kí pɔ̀ bi-bɔti. Ama, man Kinibiki yaa láa fātìi gítìńee, m làá ká fookiidambi kitiŋ puɔɔɔ?»

Fariisa ubɔ nì ufɔtil bɔŋmantikaati

9 Yeesu gíti dū tibɔti nee ki ŋmāntiǹ bin nìn lì yii bíǹ bí deedee Unimbɔti nimbiin nì bi-ba nyítam ki kpèé ki sìnkīǹ bin kíǹeeyee, 10 yii: «Binib bili di nìn cūtì kunimbɔtidiin kí mèè, ubɔ nìn sá Fariisa ní un kíǹee sá ufɔtil. 11 Fariisee nìn yú ki mèé u-ban, yii: <Óo Unimbɔti, m jáaḿ-si man nín kaa bí kii bin kíǹee nín bí pu ki sá binaayub, binikpitib, bilaakpaadambee, m jáaḿ-si man nín kaa bí kii ufɔtil un bí neeyee. 12 M bōob̀ kinyɔkɔ mili kinyɔŋ poon, ní m-wanti tin kɔkɔ m kāntée, m lèekī saalaa sá kamaa puee kubɔ kubɔ ki tìì-si.> 13 Ní ufɔtilee, úǹ yúń kudandaŋu, kaa là kí yáatí u-yil gba, ki fátí u-bindi ki yáliŋkí u-kpitii pu ní ki lì yii: <Óò Unimbɔti, sɔ̄ m-saai, m sá unikpiti ní!>» 14 Ní Yeesu gíti lī yii: «M tùkù-ni yii ufɔtilee fātì u-dumpu, Unimbɔti dū u-kpitii ki pú-u, kaa pú un béeyee. Kun puee un sá kamaa yaa yòontí u-ba yilpuee, Unimbɔti làá sìntīǹ-u taapu, ní un sìntīǹ u-ba taapuee, Unimbɔti làá yòon̄-u yilpu.»

Yeesu fōō mbiyaamu

(Kpèè Maat 19.13-15, Maar 10.13-16)

15 Binib nìn cāabìń mbiyaawaamu gba Yeesu cee ú dū u-ŋal kí páań mu-pu kí mèè. U-boonnooliibi nín ká mimmee ní bi bíi ki jì-bi. 16 Ní Yeesu yíiń mbiyaamuee u-cee ki bí yii: «Yàntīmaan mbiyaawaamu ń dāan̄ m-cee. Ní taa pìin̄-mu nsan, kun puee Unimbɔti Beel sá ki tīī bin náań nì muee ní. 17 Ibaamɔn ní m sòoǹ nì ni, un kamaa yaa kaa fōō Unimbɔti Beel kii kibiyaawaayee kpá kí kɔ́ di-ni.»

Ugaaja ubɔ bɔti

(Kpèè Maat 19.16-30, Maar 10.17-31)

18 Niinee, Juuda yab kpiliu ubɔ bālifì Yeesu yii: «Ukpimɔnti, m làá ŋá mana ní kí ká dimaŋfal din kaa cáá dikúntilee ní?» 19 Ní Yeesu fātìi kíí-u yii: «Ba pu ní a yíiń-mi yii umɔnti? Ubɔ kaa bí ki sá umɔnti, see Unimbɔti. 20 Kéè, sii a-ba nyí Unimbɔti marabaa! An lī yii: <Á taa ŋá tilaakpaal, kí taa kpɔ̀ unil, kí taa yɔ̀, kí taa mɔ̄ntì kí páań ubɔ pu fám, kí nīn tɔ́ a-baa nì a-na^a.>» 21 Ní uninjee fātìi kíí-u yii: «Doooo m-naacimpɔntin ní m pée ŋúb́ an marab gbanti.» 22 Yeesu gbìl̄ u nín lī puee, ní ki bí-u yii: «Kuwambaantiiu di kíǹ-si á ŋá. Nín̄ cá kí nyāfì tin kɔkɔ a cááyee kí dūú yàkatī bifalaadambi kí tin ká tigaajati Unimbɔti cee. A yaa ŋá mimmee, á dāan̄ kí nīn nóó-mi.» 23 Kijapaayee nín gbìl̄ mimmee, kunimbaau kɔ́-u, kun puee u nìn cáá tigaajawan tikpil. 24 Yeesu nín ká yii kunimbaau kɔ́-uee, ní u bí yii: «An pɔ̄ɔ̄ tikpil ki tīī bigaajab bí kɔ́ Unimbɔti Beelineeee! 25 An pɔ̀fì ki tīī ugutaamu ń jītí ujoo buŋŋun ki jítiǹ ugaaja ń kɔ́ Unimbɔti Beelin.» 26 Ní bin nìn bíi pílifíǹ-uee bí yii: «Kin, ŋma di làá nín ká difiil dee?» 27 Ní Yeesu kíí-bi yii: «Tin pɔ̄ɔ̄ binib ceeyee, kaa pɔ̄ɔ̄ Unimbɔti cee.» 28 Ní Peetroo bí yii: «Kin timbi bin cāntì tin ti cááyee ki táá-see fáà?» 29 Ní Yeesu kíí-u yii: «M sòoǹ nì ni ibaamɔn ní, un kamaa di yaa fá u-dumpu nì u-nimpuu nì u-nabiyaamu nì u-baa nì u-na nì u-biyaamu, Unimbɔti Beel puee, 30 làá fōō tipaal tikpil ŋyunti ŋun ti bí nee poon. U làá dāá gíti fōō dimaŋfal din kaa cáá dikúntilee ŋyunti ŋun dòońee.»

Yeesu gíti sòon̄ ntataatiim u-kúm nì u-fìkititam pu

(Kpèè Maat 20.17-19, Maar 10.32-34)

31 Ní Yeesu gāntì u-kpambaliŋ saalaa nì alee ní ki bí-bi yii: «Ní pīlifì tiŋan, Jeerusaleem un ti cá nee, tin kɔkɔ Unimbɔti bɔnaatiliibi nìn ŋmàn̄ ki yóoǹ yii an làá dāá bàń man Kinibiki puee, ŋyunti bāań ní nee án ŋá míǹ. 32 Bi làá cúú-mi kí tīī bin kaa sá Juuda yabee bí bèel̀-mi, kí sìì-mi, kí tíiĺ timɔtan kí làbitì-mi. 33 Bi làá gbá-mi anaalab ní kí kpɔ̀-mi. Ní iwiin ita dalee ḿ fìkitī.» 34 Ama u-kpambaliŋ kaa nìn gbìl̄ tíǹ gbanti kɔkɔ taapu, kaa nyí tin pu ní Yeesu sòoǹ mimmee, kun puee tibɔtee nìn dáá bí-bi dibalin.

Yeesu cáaǹ ujɔfu ubɔ Jeeriikoo

(Kpèè Maat 20.29-34, Maar 10.46-52)

35 Yeesu nín tóobiń Jeeriikooyee, uninja ubɔ nìn kā disaŋkaŋkpil ki sá ujɔfu ki mèé tiwan. 36 U gbìl̄ kunipaau jītée, ní u bālifì yii: «Án sá ba ní?» 37 Ní bi tùkū-u yii: «Yeesu Naasaareeti yɔuee di jītí.» 38 Niinee ní u téeń mpɔn yii: «Yeesu, Daafiidi naantiiu, sɔ̄ m-saai!» 39 Ní bin nìn līī nyɔkɔpuee bíi kpàtī u-pu yii ú ŋmīĺee. Ní u mɔ̄tìi bíi kāantí yii: «Daafiidi naantiiu, sɔ̄ m-saai!» 40 Ní Yeesu sāā ki síl̀, ní ki bí yii bí cáań-u u-cee. U bāańee, ní Yeesu bālifì-u yii: 41 «Ba ní a là ḿ ŋá kí tīī-si ní?» Ní u bí yii: «Ukpil, m là kí wāl̀ ní.» 42 Ní Yeesu bí-u yii: «Nín̄ kíǹ ki wāĺ! A-fookiiu di fīī-si.» 43 Niin niin ní u-nimbiliŋ cúu ŋúbitì ní u wál̀ ní ki kíǹ ki táá Yeesu ki nyɔ́ŋkí Unimbɔti. Kunipaauee kɔkɔ nín ká mimmee, ní bi bíi pàkà Unimbɔti.