Luuki 17

Ikpiti nì i-pɔ̄tam

(Kpèè Maat 18.6-7, 21-22, Maar 9.42)

1 Ní Yeesu tí bí u-boonnooliibi yii: «Kun làá nīn yàntī binib ń nīn ŋáań ikpitee làá nīn pée bí ní. Ama mbusu dɔ̄ ki cí un pu ní án làá dīńee. 2 Bi yaa bàà dū ŋŋmii ki kúĺ kutaŋkpanaau ki dūu léeǹ u-neen, ki cáá-u ki tɔ́ tiŋkun, an bàà sɔ́ nì ú yàntī ŋwaamu nee kiba ń lítí ikpitin. 3 Ní nīn nyíǹ ni-ba tiŋan!

«A-nabiki yaa ŋá ikpitee, á wòoǹ-u ú taa ti ŋá míǹ. U yaa bí yii u-bɔti kpíìyee, dūú pɔ̄-u. 4 U yaa yīntiǹ-si áli miluli ŋwimbaanti ní ki dɔ́miń miluli gbantee ki tùkù-si yii: <M-bɔti kpíìyee,> dūú pɔ̄-u.»

Fookii

5 Ní Yeesu kpambaliŋ bí-u yii: «Ti-Dindaan, kūtì-ti fookii.» 6 Ní ti-Dindaan kíí-bi yii: «Ni yaa bàà cáámaan fookii ní báà u yaa bí fiii kii dijɔnjɔmbilee^a, ni bàà ŋūǹ kí tùkù busubu nee yii: <Á kpìkitī laakin a yú nee kí cùú cóoń tiŋku poon,> ní bú ŋá ni nín lī puee.»

Utɔntɔnli tundi

7 «Ni-kansikin ubɔ yaa cáá utɔntɔnli, u gbāā ki kù-u tikpaal àá u kpàá-u tiwaŋkuti, ní utɔntɔnlee yaa nyánní kusaau ki bāańee, u kíikí kí tùkù-u yii: <Dāan̄ malaa kí dāá nīn jīǹ tijinaaa?> 8 See ú tùkù-u yii: <Ŋá-mi tijin, kí kpántí a-bɔkutil kí yòon̄ tijin kí cáań-mi. Man yaa jíń ki nyùn̄ee, si mun ń nín jī a-yati.> 9 Aa cáá ijaam kí jāam̀ a-tɔntɔnliu u nín túń ditundi din a tīī-uee pu. 10 Míǹ mbaantiim ní an sá ni mun cee. Ni yaa ŋá tin Unimbɔti bí ní ŋée kɔkɔ ki dóòyee, lìmaan yii: <Timbi sá bitɔntɔnliibi bin kaa bí tibanee ní, ti-tundi din ti máaǹ kí tɔ̄ee ní ti túń nee.>»

Yeesu cáaǹ binyaŋgbantiibi saalaa

11 Yeesu nín nìn còom̄ ki cá Jeerusaleemee, u nìn jítì Samaarii nì Galiilee kansikin ní. 12 U làá kɔ́ kitimbilii kibanee ní binyaŋgbantiibi saalaa túŋkìń-u ki dɔ́miń ki yú kudandaŋu^b, 13 ní ki káaǹ yii: «Ukpil Yeesu, sɔ̄ ti-saai!» 14 Yeesu ká-bee ní ki bí yii: «Cáámaan ni-ba kí dàkà bisaraaŋaliibi^c.» Ŋyunti ŋun bi cée, ní bi pɔ́ɔkì. 15 Bi-kansikin ubɔ nín dáań ki ká yii u pɔ́ɔkèe, ní úǹ gbēeǹ niin ki fātì u-taaŋi pu ní ki nín gítiń ki sòoǹ mpɔn ki pàkà Unimbɔti. 16 U dɔ́miń ki tātìi dōoǹ Yeesu nimbiin dicincibil ki jáam̀-u. Kijapaayee nìn sá usamaariija ní. 17 Ní Yeesu bí yii: «M cáaǹ binib saalaa ní, kin biwa bin kíǹee bí la? 18 Mimmee báà ubɔ kaa dākafì kí gítiń kí nyɔ̄ŋkì Unimbɔti see unicaan nee babaaa?» 19 Ní Yeesu bí-u yii: «Yīkì kí nīn cá, a-fookiiu di fīī-si.»

Unimbɔti Beel dāantam

(Kpèè Maat 24.23-28, 36-41)

20 Fariisab bālifì Yeesu yii: «Ŋyunti ŋulɔŋu ní Unimbɔti Beel làá bàń ní?» Ní Yeesu kíí-bi yii: «Unimbɔti Beel kaa dòoń yéè kpìrrr bí ká-dì. 21 Baa dāa lì yii: Kpèèmaan di bí dooyaaa, di bíń lapu doo, ama ní béé yii Unimbɔti Beel kíǹ ki bí ni-kansikin doo.»

22 Ní u bí u-boonnooliibi yii: «Ŋyunti ŋubɔ dòoń ni dāa nyàab̀ man Kinibiki wiiŋyi nee ŋubɔ, kaa làá ká. 23 Bi dāa tùkù-ni yii: <U bí doo ní!> <Aayee, u bí lapu ní!> Taa sāǹ kí cùmaan laaba. 24 Man Kinibiki dāantam wiiŋŋu dal dāa sá kii utaa nín ŋmóò ki ŋmíntí pu kí kíliń kutagbɔŋu kílilaŋki kí nīn cá ku-kuntilaŋkee ní. 25 Ama kí wàatī míǹ ń nín bàńee, see ḿ jī falaa tikpil, waanee nib ń dū-mi kí fá. 26 Tin nìn jítì Noowa yuntiŋuee, tíǹ tibaantiil di làá dāá ŋá man Kinibiki mun wiiŋŋu dal. 27 Binib nìn jīǹ, ki nyù, bininjab cāab̀ binimpoobi ní binimpoobi mɔ́ń ticati áli ki tin sāā ŋyunti ŋun Noowa dāa kɔ́ meelanee, ní nnyiŋgbeen dɔ́miń ki kúntì bi-kɔkɔ pílpil^d.

28 «An làá dāá pée tí ŋá kii Looti yuntiŋuee ní: binib nìn jīǹ, ki nyù, ní bin dāāyee dāā, ní bin nyáfée nyáfí, ní bin kù tikpaalee bí ki kù, ní bidimaliibi bí ki māā. 29 Ama daliŋkin Looti yíkì Soodoomee, ní farwata nì ŋŋmi nyánní yilpu kii utaayee ki nìn̄ kitiŋ pu ní ki wùn̄ ki kúntì bi-kɔkɔ nyíki nyiki^e. 30 «Daliŋkin man Kinibiki yaa láa páaǹnée, min làá dāá ŋée dee.

31 Yaadal wiiŋŋuee, un yaa láa bí dicindee ń taa lì yii u làá kpákatí kí kɔ́ kudii poon kí yòon̄ u-wanti tiba^f, míǹ ní un bí kusaauee mun ń taa fàtīń mmɔŋki. 32 Téetímaan Looti nimpuu pu^g. 33 Un là kí fīī u-maŋfalee làá fá-dì. Ama un fá u-maŋfalee làá kpāafì-dì. 34 Ibaamɔn ní m tùkù-ni, an nyeekuee, binib bili dāa dɔ̄ kilambaŋ pu ní án yòon̄ ubɔ kí yàntī un kíǹee. 35 Binimpoobi bili dāa gbāā ki nà kunabaantiiu pu ní án yòon̄ ubɔ kí yàntī un kíǹee. [ 36 Bininjab bili dāa gbāā kusaau ki kù, ní án yòon̄ ubɔ kí yàntī un kíǹee^h.»] 37 Ní u-boonnooliibi bālifì-u yii: «Ukpil, la ní míǹ làá dāá ŋée?» Ní Yeesu kíí-bi yii: «Laakin diwaŋkpil yaa dɔ̄ee, niin ní kaajiikub kpáfíⁱ.»