Luuki 16

Utɔntɔnli un yáb̀ee

1 Yeesu gíti kútì ki lī u-boonnooliibi yii: «Ugaaja ubɔ di bí ní ki cáá utɔntɔnli un kpèé u-wanti kɔkɔee, ní bi tùkū-u yii utɔntɔnlee cáá u-wanti ki bíiĺ. 2 Ní u yíiń-u, ní ki bí-u yii: <An kaa mɔ́ɔkiǹ-mi m nín gbìl̄ tin a ŋáańee. Ŋá akɔntaa kí tīī-mi kí tùkù-mi a nín túń ditundi ki gíiǹ puee, kun puee aa làá nīn gíti kpèé m-wanti.> 3 Ní utɔntɔnlee bālifì u-ba yii: <M-kpiliu làá jà-mi dee, m làá ŋá mana dee? Ḿ cùú nīn kù tikpaalaaa? Maa cáá mpɔn kí kpɔ̀. Ḿ cùú nīn mèéee? An cáá-mi icoo! 4 M béè m nín làá ŋá pu ní bi yaa jìn̄-mee, binib ń fōō-mi bi-dumpuyee.> 5 Niinee ní u yíiń bin kɔkɔ cáá u-kpiliu apɔɔnee ubɔ ubɔ, ní ki bālifì upeepeekaa yii: <Mana ní a cáá m-kpiliu dipɔndi ní?> 6 Ní u bí-u yii <Ŋkpam aŋkɔrab dilaataal.> Ní u fātìi bí yii: <A-pɔndi gbɔŋku sèé, fōō kí kàl̄ kí ŋmà malaa yii a cáá dipɔndi aŋkɔrab ili nì saalaa.> 7 Ní u bí un kíǹee yii: <Sii fáà, a-pɔndi sá mana?> Ní úǹ bí yii: <Idi kutukub dilaataal,> ní u bi yii: <A-pɔndi gbɔŋku sèé, fōō kí ŋmà idi kutukub imuŋku inaa.> 8 Utɔntɔŋkpitee kpiliu nín gbìl̄ tin u ŋée, ní u pàkā-u u nín yáb́ ki ŋá miŋyee: di sá yii bin kaa sá Unimbɔti nibee wálifì bi-jutiibi bɔti pu ki jítiǹ bin sá u-yabee.»

9 Ní Yeesu lī yii: «Man tùkù nimbi yii: Nín̄ cáámaan ni-gaajati ki ŋáań min fáatì Unimbɔtee, án nín làá ŋá pu, tì yaa láa kúntì ni-ceeyee, Unimbɔti ń fōō-ni kí kàan̄ ikɔŋkoon in bí jaanjaanee nee. 10 Un ŋúb̀ tiwan fiii nì deedeeyee tí ŋúb̀ tiwaŋkpaandi mun deedee ní. Un kaa ŋúb̀ tiwan fiii nì deedeeyee kaa tí ŋúb̀ tiwaŋkpaandi mun nì deedee. 11 Ni yaa kaa ŋūǹ kí ŋúb́ duulinya gaajati tin kaa sá timɔntiilee, Unimbɔti kaa dāa dù u-gaajawammɔntiiti kí ŋúbíǹ-ni. 12 Tin tin sá ubɔ wantee, ni yaa kaa ŋúb́-tì nì deedeeyee, Unimbɔti kaa tìì ni mun tin sá ni-yatee.

13 «Utɔntɔnli ubɔ kaa ŋūǹ kí nīn bí bikpilib bili cee. Asee ú nīn ná ubɔ kí nīn néeń un kíǹee, kí dū u-ba kí tīī ubɔ, kí nīn kpèé un kíǹee fám. Naa ŋūǹ kí kpāfì Unimbɔti nì animbil kí nóó^a.»

Yeesu wòon̄ Fariisab

(Kpèè Maat 11.12-13, 5.31-32, Maar 10.11-12)

14 Fariisab nín gbìl̄ an bɔtee ní bi bíi bèel̄ Yeesu, kun puee bíǹ néeń animbil. 15 Ní Yeesu bí-bi yii: «Ni là binib ń nīn wāĺ-ni yii ni sá deedeedambi. Ama Unimbɔti nyí tin kā ni-pɔbiliŋ poonee. Tin binib kpèé yii an sá tiwaŋkpaandee, an sá ntimbiil wanti ní Unimbɔti nimbiin.

16 «Mooyiisi marab nì Unimbɔti bɔnaatiliibi nín sòoǹ tiŋyee nìn bí ki dāa sāā Yoowaneesi un fùul̀ binib Unimbɔti nyimee yuntiŋu. Ŋyunti ŋun Yoowaneesi bāańee ní binib gbìl̄ Unimbɔti Beel bɔti, ní báà ŋma kíǹ ki bíi mɔ̀ kí kɔ́ di-ni. 17 An pɔ̀fì ki tīī kutagbɔŋu nì kitiŋ ń jītí ki jítiǹ marab ŋmaŋmabiku kubɔ ń kpìtī.

18 «Un kamaa yaa jìn̄ u-nimpuu ní ki fātìi cáá upɔɔnee, udaan ŋá tilaakpaal Unimbɔti nimbiin, ní un cáá unimpu un u-cal jìn̄ee mun ŋá tilaakpaal Unimbɔti nimbiin.»

Yeesu sòon̄ ugaaja nì Laasaar bɔti

19 Ní Yeesu bí yii: «Ugaaja ubɔ di nìn bí ki pèentí abɔkutinyaan ŋin pɔ̄ɔ̄ kudaau tikpilee ní ki pée bí ki jīǹ jiŋaal mmɔntiimin baabadal. 20 Usoodaan ubɔ nìn bí bi yíì-u Laasaar. U nìn dɔ̀ ugaajee punyɔkɔpu ibunsoon píń u-wunti pu. 21 U bàà nìn là kí nīn tòó ugaajee nín jīǹ tin gbátí ki lítí kitiŋee kí kpíiǹ u-ba, ní iboo mun gíti dòoń ki líntí u-buuŋyi. 22 Usoodaanee dūu kpíì, ní Unimbɔti tuuŋyi dɔ́miń ki yōoǹ-u ki cáa nín jɔ́ḿ yilpu ki kāaǹ Abraam cee^b. Ní ugaajee mun dāa dūu kpíì, ní bi síb́-u. 23 U bàn̄ ditaŋkpiilinee ki bíi jīǹ falaakpaan. U bí falaa poonee ki wáaǹ ki kpēēyee ki ká Abraam ndan, Laasaar kā u-cee. 24 Niinee ní u téeń mpɔn yii: <Ti-baa Abraam, sɔ̄ m-saai kí pée tɔ̄ń Laasaar ú dū u-ŋambiki kí sēē nnyim kí cáań kí mèel̀ m-limbil, kun puee m bíi jīǹ falaa ŋŋmi nee poon tikpil.> 25 Ní Abraam kíí-u yii: <M-biki, téetí yii a nín nìn bí duulinyanee, a nìn jíń mmɔn, ní Laasaar úǹ jíń falaa. Kɔŋkɔnnee u mun bíi fòol̄ u-mɔŋŋu dee, ní si mun bí falaani. 26 Áli gba mbookpaan ŋubɔ di pītì timbi nì nimbi kansikin. Bin yaa bàà là kí nyānní timbi cee kí cù nimbi ceeyee ń taa ŋmāaa, bin mun yaa bàà là kí nyānní nimbi ceen kí dāan̄ timbi cee dooyee mun ń taa ŋmā.> 27 Ní ugaajee bí yii: <Mimmee, m gbàam̄-si, á tɔ̄ Laasaar m-baa dumpu, 28 kun puee m cáá nnabiyaamu muŋmoo, ú cù kí kpāafì-bi bíǹ ń taa dāan̄ nnaabu ŋun poon man bí nee ni.> 29 Ní Abraam kíí-u yii: <Bi cáá tin Mooyiisi nì Unimbɔti bɔnaatiliibi ŋmàn̄ee, bí nóó tíǹ.> 30 Ní ugaajee bí yii: <Aayee, m-baa Abraam, ubɔ di yaa bàà fīkitì bitaŋkpiibi kansikin ki cūtèe, bi bàà kpántí bi-bimbim.> 31 Ní Abraam fātìi bí-u yii: <Bi yaa kaa làá nóó Mooyiisi nì Unimbɔti bɔnaatiliibi nín ŋmàn̄ tiŋyee, báà ubɔ yaa nyáń bitaŋkpiibi kansikin ki fīkitì ki sòon̄ nì bi, baa làá fōō udaan bɔti kí kíí.>»