Yoowaneesi 12

Maarii dū talaalu ki sītì Yeesu taaŋi pu

(Kpèè Maat 26.6-13, Maar 14.3-9)

1 An nìn kíǹ iwiin iluu bí jī Dilákatil jiŋaaliu, ní Yeesu nìn bàn̄ Beetanii^a, laakin Laasaar, kijapaai kin u nìn fīkitèe nìn kóòyee. 2 Niin ní bi ŋá Yeesu tican. Maarta di nìn tìì tijin. Laasaar mun nìn ŋmàl̄ bin nì Yeesu nìn kā ki jīǹee kansikin. 3 Ní Maarii yōoǹní talaalumɔnti un bi yíì náaree, u pɔ̄ɔ̄ kudaau tikpil, ní ki cáań ki kpáatìi sītì Yeesu taaŋi pu, ní ki dū u-yikpiti ki pítì^b, ní kudii kɔkɔ jíń talaalu sɔnsɔfiŋu. 4 Niinee ní Yeesu boonnooliibi kansikin ubɔ, Juudasi Isikaariyɔti un dāa dū-u ki nyáfèe, bí yii: 5 «Ba pu ní baa dū talaalu nee kí nyāfì kí fōō animbil jitɔmbi^c alaataa ata kí dūú yàkatī biwɔfib?» 6 Tin u sòon̄ee, an kaa sá u sūǹ biwɔfib pu, u nìn sá unaayuu ní. Úǹ di nìn ŋúb́ bi-nimbiliŋ ní ki lèekī ŋi-poon. 7 Ní Yeesu bí-u yii: «Yàntī-u! U yāaǹ ki cíitì daliŋkin bi làá dāá dū-mi kí ŋá dikaakulinee dee. 8 Biwɔfib làá nīn pée bí ni-kansikin ní baabadal^d, ama man nì ni kaa làá nīn bí baabadal.»

Bi búkú Laasaar pu kí kpɔ̀-u

9 Juuda yab tikpil nín gbìl̄ yii Yeesu bāań Beetaniiyee, ní bi nín cá niin. An kaa nìn sá Yeesu ŋmaniŋma pu ní bi cá, ama kí tin kpáàa kpèè Laasaar un u fīkitèe mun. 10 Ní bisaraaŋakpilibee sòon̄ ki yóoǹ yii bí kpɔ̀ Laasaar mun, 11 kun puee úǹ pu ní Juuda yab tikpil kíǹ ki nóó Yeesu, kaa ti là bíǹ cee.

Yeesu kɔ́ Jeerusaleem nì ifaal

(Kpèè Maat 21.1-11, Maar 11.1-11, Luuki 19.28-40)

12 Kutaa wúntèe, kunipaau kun nìn dɔ́miń Dilákatil jiŋaaliuee gbìl̄ yii Yeesu dòoń Jeerusaleem. 13 Bi nìn bátì tikpakpati ki túŋkì-u nsanni, ní ki kūuntí yii: «Oosaana, tí dàntìmaan-u! Ti-Dindaan ń bìin̄ un dòoń úǹ yindi puee! Unimbɔti ń bìin̄ Isirayeel bɔtiu boon^e!» 14 Yeesu nìn ká dimampɔmbil ki kā, kii Unimbɔti gbɔŋku nín nìn lī ki yóoǹ puee, yii:

15 «Siiyɔn tiŋki, taa fàŋkì!

Kpèè, a-bɔtiu di dòoń,

ki kā dimampɔmbil puee^f!»

16 Ŋyunti gbantee, u-boonnooliibi kaa nìn dáá láá gbìl̄ taapu. Ama ŋyunti ŋun u fōō u-nyootee ní bi nín téetì yii Unimbɔti gbɔŋku nín nìn sòon̄ tin u-puee, míǹ ní bi ŋá ki tīī-u nee.

17 Bin kɔkɔwoooo nìn bí ŋyunti ŋun Yeesu yíiń Laasaar dikaakulin ki fīkitì-u ditaŋkpiilinee bíi máafí tin bi ká Yeesu ŋée. 18 Di sá yii bi nín nìn gbìl̄ maamaaci un u nìn ŋée puee ní kunipaauee túŋkì-u. 19 Ní Fariisab bíi lì tɔb cee niin yii: «Ni káa! Naa làá ti ká báà tiba. Binib kɔkɔ di bìtifī ki cá kí nóó-uee.»

Greeki yab biba bíi nyàab̀ Yeesu

20 Greeki yab biba nìn ŋmàl̄ bin nìn dɔ́miń Jeerusaleem kí nyɔ̄ŋkì Unimbɔti jiŋaalee poonee kansikin. 21 Ní bi dɔ́miń ki ká Fiiliipi un sá Beetisayida Galiilee tiŋkinee, ki bíi gbàam̄-u yii: «Ukpil, ti là kí ká Yeesu.» 22 Ní Fiiliipi cūtìi tùkū Andree, ní bi-liitil cūtì ki tùkū Yeesu. 23 Ní Yeesu kíí-bi yii: «Ŋyunti ŋun man Kinibiki làá fōō m-nyootee bāań dee. 24 Ibaamɔn, ibaamɔn ní m sòoǹ nì ni, ŋwambool yaa kaa lítì kitiŋ ki kpíì, ŋu pée gbíntìi sá mbaanti ní. Ama ŋu yaa kpíìyee, ní ŋú nyā kí lòoǹ tikpil. 25 Sii un yaa néeń a-maŋfalee làá fá-dì, ní sii un yaa ná a-maŋfal taapu doo neeyee, siiyee di kpáafí-dì ki kāntí dimaŋfal din kaa cáá dikúntilee^g. 26 Un yaa là kí tɔ̄ m-tundee máaǹ kí nīn nóó-mi, ní laakin m yaa bée, m-tɔntɔnliu mun ń nīn bí niin. Un yaa tūǹ m-tundee, Ubaati làá tīī-u tinyool.»

Yeesu bíi sòoǹ u-kúm pu

27 «Kɔŋkɔnnee m bākatì. Mimmee, ḿ lì yii, m-Baa, nyāntí-mi tin làá bàń-mi ŋyunti nee pooneeee? Aayee, kun puee ŋyunti nee falaau pu ní m dɔ́miń. 28 Míǹ puee, m-Baa, tīī a-yindi tinyool!» Niinee ní Unimbɔti sòon̄ní yilpu ki bí yii: «M tīī m-yindi tinyool, ki làá gíti tí tīī-dì.»

29 Kunipaau kun nìn yú niinee gbìl̄ Unimbɔti neen puee ní ki bí yii: «An sá utaa di fáá didundi.» Ní biba mun bí yii: «An sá Unimbɔti tuuŋŋu ŋubɔ di sòon̄ nì u.» 30 Ní Yeesu bí-bi yii: «An kaa sá man pu ní nneenee sòon̄, ama an sá nimbi pu ní ŋu sòon̄. 31 Ŋyunti nee ní Unimbɔti làá sòoǹ duulinya bɔti, ní kí jà duulinya bɔtiu Sitaan. 32 Bi yaa láa yōoǹ-mi yilpuee, m làá dāá dáaliń nnibiyaamu kɔkɔ kí cáań m-cee.» 33 U nìn lī míǹ kí dàkà ŋkúm min u làá kpúee nín sá miŋyee ní. 34 Ní binibee kíí-u yii: «Ti bífì marab gbɔŋku poon yii Meesiya làá nīn pée bí ní kí nīn cá jaanjaan^h. Kin ba pu ní sii lī yii bi làá yòon̄ Kinibiki yilpu? Ŋma di sá Kinibiki gbanti ní?» 35 Ní Yeesu kíí-bi yii: «Ŋwalifi dáá bí ni-kansikin ŋyunti ŋubɔ poon fiii. Ní nīn còom̄ ŋwalifi gbanti poon, án nín làá ŋá pu dibɔmbɔndi ń taa jēetí ni-puee, kun puee un còom̄ dibɔmbɔndinee kaa nyí laakin u cée. 36 Ŋyunti ŋun ŋwalifi dáá bí ni-cee nee, ní fōō-ŋu kí kíí án nín làá ŋá pu ní kpántí ŋwalifin nibee.»

Juuda yab kaa fōō Yeesu ki kíí

Yeesu sòon̄ míǹ ki dóòyee, ní ki yíkì bi-cee ki cūtì ndan ki bál̀-bi. 37 Nì min kɔkɔ u ŋáaǹ maamaacib tikpil bi-nimbiinee, baa fōō-u ki kíí. 38 Kii Unimbɔti bɔnaatiliu Yeesaya nín nìn ŋmàn̄ pu dooooyee, míǹ ní an ŋá nee. U nìn ŋmàn̄ yii:

«Ti-Dindaan, ŋma fōō ti-bɔti ki kíí?

Ŋma béè sii ti-Dindaan pɔŋŋuⁱ?»

39 Yeesaya nìn gíti lī kun pu ní baa nìn ŋúń ki fōō ki kííyee: u nìn bí yii:

40 «Unimbɔti yāntì bi jɔ̀b̄ ní ki pɔ́ɔkì bi-pɔbiliŋ,

án nín làá ŋá pu bi-nimbiliŋ ń taa nín̄ wāĺee

ní bi-pɔbiliŋ ń nīn gbìfì

bí taa kpántí bi-bimbim ú cáaǹ-bee^j.»

41 Yeesaya lī míǹ kun puee u nìn ká Yeesu nyooti, ní ki sòon̄ u-pu.

42 Nì míǹ kɔkɔee, Juuda yab kpilib tikpil nìn fōō-u ki kíí. Ama Fariisab ń taa jà-bi kukpafidiin puee, baa nìn nyántì bi-ba. 43 Di sá yii bi là binib ń pàkà-bi ki jítiǹ Unimbɔti ń pàkà-bi.

Yeesu bɔdakàtam kúntilaŋki

44 Yeesu téeń mpɔn ki lī yii: «Un yaa fōō-mi ki kííyee, an kaa sá man ní u fōō ki kíí, u fōō un túnní-mee ní ki kíí. 45 Un yaa ká-mee ká ki kpáaǹ un túnní-mee dee. 46 M dɔ́miń duulinyan kii ŋwalifee, án nín làá ŋá pu un sá kamaa yaa fōō-mi ki kííyee ń taa nín̄ gíti bí dibɔmbɔndinee. 47 Ama un di yaa gbìl̄ m-bɔti ní ki yaa kaa kpáafì-tèe, an kaa sá man di làá kpɔ̀ udaan bɔti, kun puee maa dɔ́miń kí kpɔ̀ duulinya nib bɔti, m dɔ́miń kí fīī-bi ní. 48 Un kaa là-mi, kaa fōō m-bɔtee cáá tin làá dāá sòoǹ u-bɔtee: an di sá m-bɔti tin m nìn dàkēe, tíǹ di làá dāá kpɔ̀ udaan bɔti ŋwinjoolkaa dal. 49 Di sá yii an kaa sá man m-ba pɔŋŋu pu ní m sòon̄, an sá m-Baa un túnní-mee u-ba di tīī-mi tin sá ḿ sòoǹee nì tin sá ḿ dàkèe. 50 Ní m nyí yii tin ní u sòoǹee cāabìń dimaŋfal din kaa cáá dikúntilee. Míǹ puee, tin m sòon̄ee, tin m-Baa tīī-mi ḿ sòoǹee dee.»