Yoowaneesi 11

Laasaar kúm

1 Uninja ubɔ nìn būǹ ki bí Beetanii, kitiŋ kin Maarii nì u-maan Maarta nìn kóòyee, bi yíì-u Laasaar^a. 2 - Maarii gbanti di sá un nìn kpáatì talaalu ki sītì ti-Dindaan taaŋi pu ki dū u-yikpiti ki pítèe. U-niija di sá Laasaar un nìn būǹee. - 3 Ní Laasaar niisalibee tú ubɔ ú cùú tùkù Yeesu yii: «Ti-Dindaan, a-bɔɔ būǹ.» 4 Yeesu gbìl̄ mimmee, ní ki bí yii: «Laasaar weeŋyi nee kaa sá-u ŋkúm, i sá kí tīī Unimbɔti tinyool, ní ki làá tīī u-Jipɔɔn mun tinyool.»

5 Yeesu nìn néeń Maarta nì u-naal nì bi-niija Laasaar. 6 Nì míǹ kɔkɔee, u nín gbìl̄ yii Laasaar būǹee, u gíti kāl̀ laakin u nìn bée iwiin ili. 7 Ní boonee, u tùkū u-boonnooliibi yii: «Tí gítímaan Juudee!» 8 Ní u-boonnooliibi kíí-u yii: «Ukpil, yaadal nee ní Juuda yab kpilib kaa bíi nyàab̀ ataŋkpee kí yāŋkì kí kpɔ̀-saaa? Ní a là kí gítí niinaaa?» 9 Ní Yeesu bí-bi yii: «Ŋwìiń ń nyā kí dāa jēetée tikúti saalaa nì tili di kaa báaa? Sii un yaa còom̄ ŋwiimpuee, aa gbéetí, kun puee ŋwìiń wāĺ an kɔkɔ. 10 Ama sii un yaa còom̄ kunyeeuee di gbéetí, kun puee ŋwalifi kaa ti bí-si.» 11 Yeesu lī míǹ ki dóòyee, ní ki gíti kútì yii: «Ti-bɔɔ Laasaar gèen̄. Ama man làá cùú fìntī-u.» 12 Ní bi kíí-u yii: «Ti-Dindaan, u yaa gèen̄ee, u làá pɔ̄ɔkì deeyaa!» 13 Yeesu nìn là kí lì yii Laasaar kpíì ní, ama ní u-boonnooliibi bíǹ dākafì yii u sòoǹ ŋgeem min báà ŋma gèeǹee pu ní. 14 Míǹ puee ní Yeesu tùkū ki cántì-bi, yii: «Laasaar kpíì. 15 Ni-puee an mɔ̄ǹ-mi m nín kaa bí niinee, min làá ŋá ní fōō-mi kí kííyee dee. Kɔŋkɔnnee tí nīn cá u-cee!» 16 Niinee ní Toomasi (un bi gíti yíì Atee) bí Yeesu boonnooliibi bin kíǹee yii: «Ti mun ń táá-u ti nì ti-Kpiliu ń tin kpú dicilpu!»

Yeesu di sá difìkitil nì dimaŋfal

17 Yeesu bàn̄ee ní ki ká yii Laasaar nìn ŋá dikaakulin iwiin inaa. 18 Beetanii kaa nìn dátiǹ Jeerusaleem, an nìn sá kii ataŋkpee ata nyɔkɔm ní. 19 An di yì-tì ní Juuda yab tikpil nìn dɔ́miń kí sɔ̀ŋkì Maarii nì Maarta pɔbiliŋ bi-niija kúm pu.

20 Maarta nín gbìl̄ yii Yeesu dòońee, ní u yíkìi túŋkì-u, Maarii úǹ nìn gbíntìi kā kudiin. 21 Ní Maarta bí Yeesu yii: «Ukpil, a yaa bàà nìn bí doo, m-niija kaa bàà kúù. 22 Ama m nyí yii, kɔŋkɔnnee gba, tin tin kamaa ní a yaa mēē Unimbɔtee u làá tīī-si kudɔŋu.» 23 Ní Yeesu bí-u yii: «A-niija làá fìkitī.» 24 Ní Maarta kíí-u yii: «M nyí yii, ŋwinjoolkaa dal, difìkitil yuntiŋuee, u mun làá dāá fìkitī^b.»

25 Ní Yeesu kíí-u yii: «Man di sá difìkitil nì dimaŋfal. Sii un fōō-mi ki kííyee, báà a yaa kpíì gba, a làá nīn cáá dimaŋfal, 26 ní sii un yaa bí dimaŋfalin ní ki fōō-mi ki kííyee kaa ti kúù jaanjaan. A fōō ki kíí mimmaaa?» 27 Ní u kíí-u yii: «Iiin, m-Dindaan: M nyí yii sii di sá Meesiya, Unimbɔti Jipɔɔn un máaǹ kí dāan̄ duulinyanee.»

Yeesu súń

28 U sòon̄ míǹ ki dóòyee, ní ki cūtì ki yíiń u-naal Maarii ki tùkū-u soooo yii: «Ukpil bāań ki bàlifī a-pu.» 29 Maarii gbìl̄ mimmee, ní ki yíkì dicilpu ki búntì Yeesu cee. 30 Di sá yii Yeesu nìn dáá gbíntìi bí laakin Maarta nìn túŋkì-uee, kaa láá kɔ́ kitiŋin. 31 Juuda yab bin nìn bí Maarii cee kudiin ki ŋmēentí-uee nín ká u yíkì dicilpu ki nín nyēēyee, ní bi dī-u. Bíǹ dàkafī yii u cá dikaakul pu kí sɔ̄ dee. 32 Ŋyunti ŋun Maarii bàn̄ laakin Yeesu bée ki ká-uee, ní u tātìi gbāaǹ u-nimbiin, ki bí-u yii: «Ti-Dindaan, a yaa bàà nìn bí doo, m-niija kaa bàà kúù.» 33 Yeesu nín ká u bíi sūǹee, ki kpáaǹ Juuda yab bin nìn nóoń-uee, ní kunimbaau kɔ́-u ki gbēē u-pɔbil, 34 ní u bālifì-bi yii: «La ní ni síb́-u ní?» Ní bi kíí-u yii: «Ti-Dindaan, dāá cùú kpèè.» 35 Ní Yeesu bíi sūǹ. 36 Ní Juuda yab bí yii: «Kpèèmaan, u nín bàà baasii néeń-u puee!» 37 Ama ní bi-kansikin biba mun bí yii: «Úǹ un nìn ŋúbitì ujɔfuee nimbiliŋee kaan ŋūǹ kí yàntī Laasaar ń taa bàà kpúɔɔɔ?»

Laasaar fīkitì

38 An fātìi tí gbēē Yeesu pɔbil, ní u búntì dikaakul laŋki. An nìn sá ntaŋkpalɔkɔn, ní bi dū ditaŋkpal ki ŋéeb́ di-nyɔkɔ pu^c. 39 Ní Yeesu bí yii: «Nyìkitīmaan ditaŋkpalee!» Niinee ní Maarta, utaŋkpiilee niisal, bí yii: «Ti-Dindaan, an ŋá iwiin inaa dee, u máaǹ ki tin núukì!» 40 Ní Yeesu kíí-u yii: «Maa tùkū-si yii, a yaa fōō-mi ki kíí, a làá ká Unimbɔti nyootaaa?» 41 Niinee ní bi nyīkitì ditaŋkpal dikaakul nyɔkɔ pu. Ní Yeesu wáaǹ kutaa pu, ní ki bí yii: «M-baa, m jáam̀-si kii a nín pílifíǹ-mee pu. 42 M nyí yii a pée pílifíǹ-mi baabadal, ama bin māntì ki tú-mi nee pu ní m bíi lì, bí fōō kí kíí yii sii di túnní-mi.» 43 U lī míǹ ki dóòyee, ní ki téeń mpɔn yii: «Laasaar, nyānní!» 44 Ní utaŋkpiil nyánní, u-taaŋi nì u-ŋalii fìn̄ iŋaabu, ki kpáaǹ u-nimbiin^d. Ní Yeesu bí yii: «Cúú fìntīmaan-u kí yàntī ú nīn cá!»

Juuda yab sòon̄ ki bɔ́ntì Yeesu pu

(Kpèè Maat 26.1-5, Maar 14.1-2, Luuki 22.1-2)

45 Juuda yab kansikin bin nìn dɔ́miń Maarii cee ki ká min min Yeesu ŋée tikpil fōō-u ki kíí. 46 Ama bi-kansikin biba cūtì ki ká Fariisab ki máafì-bi min Yeesu ŋée. 47 Ní bi nì bisaraaŋakpilib kpáfì bibɔsoonliibi kitil kɔkɔ ki sòon̄ yii: «Ti làá ŋá mana ní kijapaayee ŋáań maamaacib tikpil míǹ na! 48 Ti yaa yāntì u gbíntìi ŋáań míǹ, báà ŋma làá fōō-u kí kíí. An làá yàntī Room gɔminau ń dāan̄ kí wīī ti-nimbɔtidiiku nì ti-tiŋki.» 49 Bi-kansikinee ubɔ nìn bí, bi yíì-u Kaayiifi, úǹ di nìn sá usaraaŋakpil dibindi gbanti, ní úǹ bí-bi yii: «Naa gbìl̀ tibɔti taapu. 50 Naa dàkafī yii an ŋān̄ yii unibaanti ń kpú inifunaan pu ní ditimbundi kɔkɔ ń ŋmátáaa?» 51 An kaa nìn sá úǹ u-ba di là ní ki sòon̄ an bɔti. U nín nìn sá usaraaŋakpil dibindi gbantee puee, ní Unimbɔti yāntì u sòon̄ yii Yeesu làá dāá kpú Juuda yab pu. 52 An kaa sá Juuda yab baba pu, an sá kí kpāfì Unimbɔti biyaamu bin yàl̄ee kɔkɔ bí ŋá ubaanti. 53 Ki yōoǹ an wiiŋŋu gbanti ní bi bóob́ yii see bí kpɔ̀ Yeesu. 54 An di yì-tì ní Yeesu kíǹ ki còom̄, kaa yàntī Juuda yab kāntí-u, ní ki búntì kitiŋ kiban, kì bí kuteeu caŋin, bi yíì-kì Eefiraayiim. Niin ní u nì u-boonnooliibi nìn cūtìi kāl̀.

55 Dilákatil jiŋaaliu nìn tóobiń, ní binib tikpil nìn yíkí ki cá Jeerusaleem kí cù kí ŋá saraabi, kí nyā bi-jɔkɔntin kí wàatī ní jiŋaalee ń nín bàń. 56 Bi nìn nyàab̄ Yeesu niin. Bi bí kunimbɔtidiinee, ní ki bíi bàlifī tɔb yii: «Ni dàkafī yii ba ní? U làá dāan̄ jiŋaal neeyaaa, waa làá dāan̄?» 57 Di sá yii bisaraaŋakpilib nì Fariisab nìn síiǹ mara yii un yaa nyí laakin Yeesu bée ń lì bí cùú cúú-u.