Yoowaneesi 10

Upikpaal nì ipii bɔŋmantikaati

1 Yeesu bí yii: «Ibaamɔn, ibaamɔn ní m sòoǹ nì ni, un yaa kaa dī kipunyɔkɔ ki kɔ́ kupikpuŋkpuŋun ní ki yaa dī laabee, udaan sá digaŋgandaan ki sá unaayuu. 2 Un yaa dī kipunyɔkɔ ki kɔ́ kupikpuŋkpuŋunee di sá upikpaal. 3 Un cí kipunyɔkɔee pìitī-u, ní u-piii nyí u-neen. U yíì u-piii sá kamaa nì i-yiŋŋi, ní ki lìntī i-nyɔkɔpu ki cáǹ-i kupikpaaun. 4 U yaa nyántì i-kɔkɔ kupikpuŋkpuŋun ki dóòyee, ní ú lìntī i-nyɔkɔpu ní í páań u-boon, kun puee i nyí u-neen. 5 Iaa nōotí uniyaŋyan. I sáń-u ní, kun puee iaa nyí u-neen.»

6 Yeesu nìn dū tibɔti nee ki ŋmāntì, ama ní baa nìn gbìl̄ ti-taapu.

Yeesu di sá upikpaamɔnti

7 Míǹ puee ní Yeesu gíti lī yii: «Ibaamɔn, ibaamɔn ní m sòoǹ nì ni, man di sá kupikpuŋkpuŋu punyɔkɔki. 8 Bin kɔkɔ péeǹ-mi ki bāańee sá digaŋgandambi^a, ní ki sá binaayub, ipii mun kaa pílifíǹ-bi. 9 Man di sá kipunyɔkɔ. Un yaa dīń man pu ki kóońee kāntí difiil. Udaan ŋūǹ kí nīn kóò ki nyēē ki kāntí u-jinti. 10 Kun pu unaayuu dòońee di sá ú yɔ̀, kí kpɔ̀, kí bīil̀. Mamee m dɔ́miń í ká dimaŋfal ní, tiba nì tiba ń taa lóó-i dimaŋfal gbantin. 11 «Man di sá upikpaamɔnti^b, upikpaamɔnti piii pu ní u kúntí u-maŋfal. 12 Upaadaan un kpàá ki nyàab̀ animbil, kaa sá upikpaal, kaa yì ipiiyee, u yaa ká usaakpan dòońee, u dù ipii ní kí fá kí sāǹ kí kátí, ní usaakpan ń dāan̄ kí cūtì ipii kí yàaǹ-i. 13 Kun pu upaadaan sáńee di sá u nyàab̀ animbil ní, ipii bɔti kaa páb́-u. 14 Man di sá upikpaamɔnti. M nyí m-piii ní m-piii mun nyí-mi, 15 kii m-Baa nín nyí-mi, ma mun nyí m-Baa puee ní^c. M kúntí m-maŋfal m-piii pu ní. 16 M cáá ipii iba in kaa láá kóoń m-pikpuŋkpuŋku nee poonee. See ḿ cáań-i. I làá dāá gbìl̄ m-neen, ní kupicaŋkpuŋu ń ŋá kubaantiiu, ní upikpaal mun ń nīn sá ubaanti. 17 «Kun pu m-Baa néeń-mee di sá m tìì m-maŋfal ní kí fàtīí fōō-dì. 18 Ubɔ kaa ŋūǹ kí tìl̄ man maŋfal, see man m-ba di là ní kí dū-dì kí tīī. M ŋūǹ kí dū-dì kí tīī, ki ŋūǹ kí fàtīí fōō-dì mun. M-Baa nín bí ḿ ŋá miŋyee dee.»

19 Tibɔti gbanti pu ní Juuda yab cúu yākatì. 20 Bi-kansikin tikpil nìn lì yii: «Arasinii ubɔ di kā u-pu ní u sòoǹ fám fám. Ba pu ní ni pílifíǹ-u?» 21 Ní biba mun lì yii: «Unil un pu arasinii kēe kaa sòoǹ yéè. Mimmee arasinii ŋūǹ kí ŋúbití bijɔfub nimbiliŋaaa?»

Juuda yab kaa ti là Yeesu

22 An nìn sá dipeepɔndi ní. Bi nìn bíi jīǹ bi nín nìn ŋáŋkì kunimbɔtidii puee jiŋaaliu. 23 Yeesu nìn bí kunimbɔtidiin, laakin bi nìn yíì Saloomɔn kasarkauee taapu ki còom̄. 24 Ní Juuda yab dɔ́miń ki māntì ki tú-u ní ki bí yii: «Áli kí tin sāā ŋyunti ŋulɔŋu ní a làá sòoǹ-ti ibaamɔn ní ti-landɔkɔi ń wāl̀ ní? Sii di yaa sá Meesiya, á cántí kí tùkù-ti!» 25 Ní Yeesu kíí-bi yii: «M pée tùkū-ni dooooyee, ní naa fōō-mi ki kíí. Atuun ŋin m cáá m-Baa pɔŋŋu ki tūǹ nee sòoǹ m-pu, 26 ní naa fōō-mi ki kíí, kun puee naa sá m-piii. 27 M-piii gbìl̀ m-neen pu, ní ma mun nyí-i, ní i nóó-mi. 28 M tīī-i dimaŋfal din kaa cáá dikúntilee, i kpá kí kpú jaanjaan, báà ubɔ mun kaa tí ŋūǹ kí fōō-i m-ŋaan. 29 M-Baa un tīī-mi-iee cáá mpɔn ki jítiǹ báà ŋma. Míǹ ní ubɔ kaa ŋūǹ kí fōō tiba m-Baa ŋaan. 30 Man nì m-Baa Unimbɔti, ti sá ubaanti ní.»

31 Niinee ní Juuda yab tí fātìi píí ataŋkpee kí yāŋkì kí kpɔ̀-u. 32 Ní Yeesu bí-bi yii: «M dū m-Baa pɔŋŋu ki túń atummɔnti tikpil ni-nimbilin. Mimmee, atuun gbanti kansikinee, dilal pu ní ni là kí yāŋkì-mi ataŋkpee kí kpɔ̀ na?» 33 Ní Juuda yab kíí-u yii: «An kaa sá atummɔnti pu ní ti là kí yāŋkì-si ataŋkpee kí kpɔ̀, an sá a nín sòon̄ ki bíil̀ Unimbɔtee pu. Kun puee sii sá unifantanti ní ki ŋèeǹ nì Unimbɔti^d.» 34 Ní Yeesu kíí-bi yii: «An kaa ŋmàn̄ ni-marau poon yii: <M bí yii, ni sá inimbɔtaaa^e?> 35 Mara gbɔŋku yaa ŋūǹ kí yíiń bin bin bi sòon̄ Unimbɔti bɔti ki tùkūee yii bi sá inimbɔtee, 36 kin un Unimbɔti baasii lēē ki túnní duulinyanee fáà! Kin an dī mana ní nimbi lì yii m ŋèeǹ nì Unimbɔti m nín bí yii man di sá Unimbɔti Jipɔɔnee. 37 M yaa kaa bíi tūǹ m-Baa tuuŋŋi, ní taa fōō-mi kí kíí. 38 Ní m yaa bíi tūǹ-ŋi, báà ni yaa kaa làá fōō-mi kí kíí, fōōmaan atuun ŋin m bíi tūǹee kí kíí kí baasii béé yii Ubaati bí m-ni ní ma mun bí Ubaatin.» 39 Niinee ní bi tí bíi nyàab̀ kí cúú-u ní u ŋmátì bi-ŋaan. 40 Ní u fātìi gítì Jɔɔdan buŋgbandi lapu pu, laakin Yoowaneesi nìn dáá kíĺ ki fùul̀ binib nnyimee, ki kāl̀ niin. 41 Binib tikpil nìn dòoń u-cee niin, ní ki lì yii: «Yoowaneesi kaa nìn ŋá maamaaci báà ubɔ, 42 ama tin kɔkɔwoooo u nìn sòon̄ kijapaai nee puee, an sá ibaamɔn.» Binib tikpil nìn fōō Yeesu ki kíí niin.