Yoowaneesi 14

Yeesu di sá nsan ŋun cá Unimbɔti ceeyee

1 Ní Yeesu nìkī ki lī yii: «Ni-pɔbiliŋ ń taa bīil̀. Ní fōō Unimbɔti kí kíí, kí fōōmaan ma mun kí kíí. 2 Ikɔŋkoon tikpil bí m-Baa dumpu, m làá cù kí bɔ́ntí-i kí yóoń-ni. I yaa kaa bàà bí tiŋman, m bàà tùkù kí cántí-ni. 3 M yaa cūtì ki bɔ́ntì ipaan gbantee, ní ḿ gítiń kí yòon̄-ni, án nín làá ŋá pu laakin m làá nīn bée, ni mun ń nīn bí m-cee niinee. 4 Ni nyí laakin m cée, ki nyí nsan mun.» 5 Ní Toomasi bí-u yii: «Ti-Dindaan, taa nyí laakin a cée! Ti làá ŋá mana kí béé nsan?» 6 Ní Yeesu kíí-u yii: «Man di sá nsan, ki sá ibaamɔn ki sá dimaŋfal. Ubɔ kaa ŋūǹ kí dī laaba kí dāan̄ m-Baa Unimbɔti cee, see ú dīń man pu. 7 Ni yaa bàà nyí-mee, ni bàà nyí m-Baa mun ní. Ama kɔŋkɔnnee ni nyí-u, ki ká-u mun.»

8 Niinee ní Fiiliipi bí-u yii: «Ti-Dindaan, dàkà-ti a-Baa Unimbɔti ti-pɔbiliŋ ń sɔ̀ŋkì.» 9 Ní Yeesu kíí-u yii: «Fiiliipi, m nín bí ni-cee an yúntì pu nee, ní saa nyí-maaa? Un yaa ká-mee, ká m-Baa mun dee. Kin ba pu ní sii gíti lì yii ḿ dàkà-ni m-Baa? 10 Aa nyí yii man bí m-Baa ni, ní m-Baa mun bí man naaa? Tibɔti tin m sòoǹ nì nee, maa sòoǹ-tì m-ba pu, an sá m-Baa un bí m-nee di tūǹ u-tundi. 11 Fōō kí kíímaan yii m bí m-Baa ni ní m-Baa mun bí man ni. Báà ni yaa kaa fōō m-bɔti ki kíí, kpèèmaan m-tuuŋŋi ŋin m ŋá nee pu kí fōō kí kíí. 12 Ibaamɔn, ibaamɔn ní m sòoǹ nì ni, un yaa fōō-mi ki kííyee làá tɔ̄ atuun ŋin m tūǹee, úǹ làá tɔ̄ ŋin jítiǹ man yaŋ nee gba, kun puee m cá m-Baa cee ní. 13 Ní tin kɔkɔ ni yaa mēē m-yindi puee, m làá ŋá míǹ kí tīī-ni, ní m-Baa ń ká tinyool u-Jipɔɔn pu. 14 Ni yaa mēē tiba m-yindi pu, m làá ŋá míǹ kí tīī-ni.

Yeesu pōoǹ kí tɔ̄ń Circir Fam

15 «Ni yaa néeń-mee, nín̄ ŋúb́maan m-marab, 16 ní man ń mèè m-Baa Unimbɔti ú gíti tīiń-ni Ututunli ubɔ un làá nīn bí ni-cee kí nīn cá jaanjaanee. 17 Úǹ di sá Unimbɔti Fam ibaamɔndaan, un duulinya nib kaa ŋūǹ kí fōōyee, kun puee baa wāĺ-uaaa, kaa nyí-u mun. Ama an yaa sá nimbi, ni nyí-u kun puee u kóò ni-cee ní ki làá dāá nīn bí ni-ni. 18 «Maa làá dū-ni kí fá kii ataŋkpiibilee, m làá fàtīí gítiń ni-cee. 19 An kíǹ fiii duulinya nib kaa làá ti ká-mi, ama nimbi làá ká-mi, kun puee m bí dimaŋfalin, míǹ ní ni mun làá nīn bí dimaŋfalin. 20 Ŋwiin gbanti yaa láa bāańee, ni dāa béetí yii man bí m-Baa ni, ní nimbi bí man ni, ní man bí ni mun ni.

21 Un yaa cáá man marab ki ŋúb́-bee, udaanee di néeń-mi. Míǹ ní m-baa làá nīn néeń un néeń-mee, ma mun ń nīn néeń-u, ní kí nyāntí m-ba kí dàkà udaan.»

22 Ní Juudi - an kaa nín sá Juudasi Isikaariyɔti - bí-u yii: «Ti-Dindaan, mana ní a làá ŋá ní kí nyāntí a-ba kí dàkà timbi, ní kí taa dàkà duulinya nib?» 23 Ní Yeesu kíí-u yii: «Un yaa néeń-mee làá nīn ŋúb́ m-bɔti. M-Baa làá nīn néeń udaan, ní man nì m-Baa ń dāan̄ kí nīn kóò udaan cee. 24 Un kaa néeń-mee kaa ŋúb́ m-bɔti. M-bɔti tin m sòoǹ nì nee nyánní m-Baa un túnní-mee cee ní, an kaa sá m-ba pu ní m sòoǹ. 25 «M tùkū-ni tin bí nee ŋyunti ŋun m dáá bí ni-cee nee. 26 Ama Ututunlee, Circir Fam min m-Baa làá dāá tɔ̄ń man yindi puee, làá dāá dàkà-ni tikɔkɔ, ní kí téetí-ni tin kɔkɔ m sòon̄ nì nee.

27 «Ŋgbansɔŋfi ní m cáań-ni, man gbansɔŋfiŋu ní m dūu tīī-ni, maa tìì kii duulinya nín tìì puee^a. Ní taa bàkatī kí taa fàŋkì mun. 28 Ni gbìl̄ m nín lī yii m làá nīn cá kí dāá fàtīí gítiń ni-ceeyee. Ni yaa bàà néeń-mee, an bàà mɔ́ɔkíǹ-ni kii m nín cá m-Baa ceeyee pu, kun puee m-Baa jítiǹ man. 29 M tùkū-ni kɔŋkɔnnee ki yóoǹ kí wàatī ní án nín bàń, ní ŋyunti ŋun ní an yaa láa bāańee, ní ŋmā kí mɔ̀tīí fōō kí kíí. 30 Maa làá ti sòoǹ nì ni tikpil, kun puee duulinya bɔtiu Sitaan dòoń. Waa nín ŋūǹ kí ŋá-mi tiba. 31 Ama duulinya nib máaǹ kí béé yii m néeń m-Baa, an pu ní min ní m-Baa yaa bí ḿ ŋée, míǹ ní m ŋáań. Yīkìmaan, tí nīn cá.»