Yoowaneesi 20

Yeesu fìkititam

(Kpèè Maat 28.1-10, Maar 16.1-8, Luuki 24.1-12)

1 Ŋwiŋŋuŋfikaa jítì kutaa wúntì, kutaafaau pɔ̀lpɔl an dáá bɔ̀ǹee, Maarii un sá Magidalaa tiŋkinee nín cá dikaakul laŋki, ní ki ká yii ditaŋkpal din bi nìn dūu pīiǹ dikaakul nyɔkɔ puee kaa ti pīī. 2 Ní u fātìi sáǹ, ki cūtì Siimɔn Peetroo nì Yeesu boonnooliu un u néeńee cee, ní ki bí-bi yii: «Bi cúú ti-Dindaan ki lēē dikaakulin. Taa nyí laakin bi cáá-u ki ŋée!» 3 Ní Peetroo nì uboonnool un béeyee nín cá dikaakul laŋki. 4 Bi-liitil kɔkɔ nìn sáń ki cá, ní uboonnool un béeyee sáǹ ki jítì Peetroo pu, ki péé ki bàn̄ dikaakul laŋki malaa. 5 U gbóońee, ki ká iŋaabu dɔ̄, ama waa kɔ́. 6 Boonee ní Siimɔn Peetroo mun bāań ki nín kóò dikaakul poon, ní ki ká iŋaabu in nìn fìn̄ Yeesu wuntee dɔ̄ kitiŋ 7 nì ŋŋaabu ŋun nìn fìn̄ u-yilee. Ŋŋaabu gbanti nì in nìn fìn̄ u-wuntee kaa nìn dɔ̄ dibɔɔbaantiil, ŋúǹ nìn póob́ ki dɔ̄ ŋkpaanceeti laaba. 8 Niinee ní Yeesu boonnooliu un nìn péé péé ki bàn̄ee mun kɔ́, ki ká, ní ki fōō ki kíí yii u fīkitì. 9 Ama Yeesu boonnooliibi kaa nìn dáá gbìl̄ Unimbɔti gbɔŋku nín lī yii Yeesu máaǹ kí fìkitī ditaŋkpiilinee taapu^a. 10 Niin ní bi fātì ki nín gítí bi-dumpu.

Maarii Magidalaa yɔu ká Yeesu

(Kpèè Maat 28.9-10, Maar 16.9-11)

11 Maarii nìn yú ki kɔ́ĺ dikaakul ki sūǹ. U yú ki sūǹee, ní ki gbóoń ki kpēē dikaakul poon, 12 ní ki ká Unimbɔti tuuŋyi ili kā laakin bi nìn bíl̀ Yeesu wuntee ki pēē tiwampin. Ŋubɔ kā u-yil laŋki, ní ŋun kíǹee mun kā u-taaŋi laŋki. 13 Ní ituunee bālifì-u yii: «Unimpuee, ba ŋá ní a sūǹ?» Ní u kíí-i yii: «Bi yōoǹ m-Dindaan. Maa nyí laakin bi dū-u ki ŋée!» 14 U lī mimmee, ki fātèe ki ká Yeesu yú, ama waa béè yii an sá Yeesu. 15 Ní Yeesu bālifì-u yii: «Unimpuee, ba ŋá ní a sūǹ ní? Ŋma ní a nyàab̀ ní?» Unimpuee nyí kii bukpaadaan di bíi bàlifī-u, míǹ pu ní u bí yii: «Ukpil, sii di yaa yōoǹ-u, dàkà-mi laakin a cáá-u ki ŋée, m làá cùú yòon̄-u». 16 Ní Yeesu yíiń-u yii: «Maarii!» Ní u fātìi u-ba ki túĺ-u ní ki lī-u nì eebru sooŋyin yii: «Rabuunii!» - An taapu sá yii, Ukpil. - 17 Ní Yeesu bí-u yii: «Taa gbēē-mi, di sá yii maa láá jɔ́m̀ m-Baa cee. Ama nín̄ cá kí tùkù m-nabiyaamu yii m nín jɔ́ḿ m-Baa un sá ni-Baayee, m-Nimbɔtiu un sá ni-Nimbɔtiuee cee.» 18 Niinee Maarii Magidalaa yɔu nín cá u-boonnooliibi cee ki tùkū-bi yii: «M ká ti-Dindaan!» Ní ki dū tin u tùkū-uee ki lī.

Yeesu boonnooliibi ká-u

(Maat 28.16-20, Maar 16.14-18, Luuki 24.36-49)

19 Ŋwiŋŋuŋfikaa jítì, ku wúntì kujoouee ní Yeesu boonnooliibi kpáfì ki kā kudii kubɔn ki pīiǹ mpunyɔmu nì saafii, kun puee bi fàŋkí Juuda yab kpilib. Ní Yeesu cílìń, ki dɔ́miń ki yúl̀ bi-kansikin, ní ki bí-bi yii: «Ni-pɔbiliŋ ń nīn sɔ̀m̀!» 20 U bíi sòoǹ mimmee, ní ki dàkā-bi u-ŋalii nì u-takakal. U-boonnooliibi nín ká ti-Dindaan mimmee, ní an mɔ́ɔkiǹ-bi tikpil. 21 Ní Yeesu gíti lī-bi yii: «Ni-pɔbiliŋ ń nīn sɔ̀m̀! Kii m-Baa nín túnní-mi puee, ma mun tú nimbi.» 22 U lī mimmee, ní ki púfì bi-pu, ní ki bí yii: «Fōōmaan Unimbɔti Fam. 23 Ni yaa dū bin kpitii ki pú-bee, bi làá ká bi-kpitii pɔ̄tam. Ni yaa kaa dū bin kpitii ki pú-bee, baa làá ká bi-kpitii pɔ̄tam^b.»

Yeesu nì Toomasi bɔti

24 Ama ŋyunti ŋun Yeesu dɔ́mińee, Toomasi un bi gíti yíì Ata ki sá Yeesu kpambaliŋ saalaa nì alee kansikin dibee, nìn kpá. 25 Ní u-boonnooliibi bin nìn bée bí-u yii: «Ti ká ti-Dindaan!» Ní Toomasi kíí-bi yii: «M-nimbiliŋ yaa kaa ká u-ŋalii laakin bi kpááyee, m yaa kaa dū m-ŋambiki ki bɔ́ laakin bi kpááyee, ki yaa kaa dū m-ŋal ki bɔ́ u-takakal laakin bi nìn sāāyee, maa làá fōō kí kíí.»

26 Iwiin inii boonee, Yeesu boonnooliibi fātìi kpáfì kudiin. Toomasi mun nìn bí bi-kansikin. Bi dū mpunyɔmu ki pīiǹ ki kpàl̄, ama ní Yeesu cílìń bi-kansikin, ní ki bí-bi yii: «Ni-pɔbiliŋ ń nīn sɔ̀m̀!» 27 Ní u bí Toomasi yii: «Dāá kpèè m-ŋalii, kí cáań a-ŋambiki kí máań! Cáań a-ŋal kí máań m-takakal, kí fōō kí kíí, kí taa nín̄ gíti kpākantí!» 28 Niinee ní Toomasi ń bí-u yii: «M-Dindaan, m-Nimbɔtiu!» 29 Ní Yeesu kíí-u yii: «A nín ká-mee ní a nín fōō ki kííyaa! Bin kaa ká-mi ki fōō ki kííyee bí mmɔnneeee^c!»

Kun pu bi ŋmàn̄ kugbɔŋu neeyee

30 Yeesu nìn ŋáaǹ maamaacib tikpil u-boonnooliibi kansikin bin ní baa ŋmàn̄ ki ŋá kugbɔŋu nee poonee. 31 Bi yaa ŋmàn̄ tin bí neeyee, an sá ní fōō kí kíí yii Yeesu sá Unimbɔti Jipɔɔn ki sá Meesiya. Ni yaa fōō-u ki kíí mimmee, ní ká dimaŋfal u-yindi pu.