Yoowaneesi 21

Yeesu boonnooliibi biluli fātìi tí ká-u

1 Boonee ní Yeesu fātìi tí nyántì u-ba u-boonnooliibi ká-u Tiibeeriyaadi mɔɔgbandi. Bi nín ká-u, tin jítèe sèé. 2 Siimɔn Peetroo nì Toomasi un bi yíì Atee nì Natanayeel - un sá Kana Galiilee timbiliikinee - nì Seebeedee jipɔmbi nì Yeesu boonnooliibi bili biba mun di nìn kpáfì ki bí dicilpu. 3 Ní Siimɔn Peetroo bí-bi yii: «M cá dilaantɔl.» Ní bi bí-u yii: «Ti mun làá nóó-si kí cù.» Ní bi búntì ki cūtìi kɔ́ buŋalimbun. Ama, yaadal nyeekuee, baa nìn cúú báà tiba nì tiba. 4 Kutaa bíi wúntée, Yeesu dɔ́miń ki yú dimɔɔgbandi, ama u-boonnooliibi kaa nìn béè yii an sá úǹ di yú. 5 Ní Yeesu bí-bi yii: «Binaacimpɔmbee, naa cúú ijɔmaaa?» Ní bi kíí-u yii: «Aayee, taa cúú.» 6 Ní u bí-bi yii: «Dūmaan kulaaŋŋu kí tɔ̄ buŋalimbu ŋgiil pú, ni làá cúú ijɔm.» Ní bi dū kulaaŋŋu ki dūu tɔ́, ní an cúú ijɔm tikpil, áli gba baa ti kpáàa ŋūǹ kí dáaĺ kí nyāntiń^a. 7 Niinee ní uboonnool un Yeesu nìn néeńee bí Peetroo yii: «An sá ti-Dindaan!»

Siimɔn Peetroo nín gbìl̄ yii an sá ti-Dindaanee, ní u dū u-bɔkutil ki pēeǹ, kun puee u nìn pēetì ní ki jéetì nnyimin ki wáŋkìi dūtì. 8 Ní u-boonnooliibi bin kíǹee mun dāa bāań nì buŋalimbu, ki dátiń kulaaŋŋu nì ijɔm, kun puee baa nìn gíti dátiǹ dimɔɔgbandi, an nìn kíǹ fiii kí bà meetab dilaataal. 9 Bi kpákatì kitiŋee ní ki ká ijɔm pá amɔsiŋkoon pu, nì kpɔnɔ. 10 Ní Yeesu bí-bi yii: «Ní cáań ijɔm in ni cúúyee iba.» 11 Ní Siimɔn Peetroo kɔ́ buŋalimbu poon ki dáaliń kulaaŋŋu ki bíl̀ kitiŋ, ijɔŋkpaan gbí poon, i nìn sá ijɔm dilaataal nì imuŋku ili nì saalaa nì ita. Nì min kɔkɔ ijɔm nìn wīikí kulaaŋŋuee poonee, kuaa nìn cátì. 12 Ní Yeesu bí-bi yii: «Dāan̄ kí jīmaan tijin!» Ní u-boonnooliibi kansikin báà ubɔ kaa wāaǹ ki bālifì-u yii: «Sii di sá ŋma?» Bi nìn nyí yii an sá ti-Dindaan. 13 Ní Yeesu sútìń, ki dū kpɔnɔ ki tīī-bi, ní ki tīī-bi ijɔm mun. 14 Yeesu nín nìn kpíì ki fīkitèe, min bí nee di sá ntataatiim min u nìn nyántì u-ba ki dàkā u-boonnooliibee.

Yeesu bālifì Peetroo yii: «A néeń-maaa?»

15 Bi jíń tijin ki dóòyee, ní Yeesu bālifì Siimɔn Peetroo yii: «Siimɔn, Yoowaneesi jipɔɔn, a néeń-mi ki jítiǹ bin bí neeee?» Ní u kíí-u yii: «Iiin, m-Dindaan, a nyí m nín néeń-see.» Ní Yeesu bí yii: «Á nīn kpàá m-pibiliŋ.» 16 Ní u gíti bālifì-u nliliitiim yii: «Siimɔn, Yoowaneesi jipɔɔn, a néeń-maaa?» Ní u bí yii: «Iiin, m-Dindaan, a nyí m nín néeń-see.» Ní Yeesu bí-u yii: «Á nīn kpàá m-piii.» 17 Ní u gíti bālifì-u ntataatiim yii: «Siimɔn, Yoowaneesi jipɔɔn, a néeń-maaa?» An nìn kɔ́ Peetroo kunimbaau min ní Yeesu nìn bālifì-u ntataatiim yii, a néeń-maaayee, ní u kíí Yeesu yii: «M-Dindaan, a nyí tikɔkɔ, ki nyí m nín néeń-see!» Ní Yeesu bí-u yii: «Á nīn kpàá m-piii^b. 18 Ibaamɔn, ibaamɔn ní m sòoǹ nì si, a nín nìn sá unaacimpɔɔnee, a nìn gbìǹ a-dambalau a-ba, ní ki cá laakin a yaa lèe. Ama a yaa láa púĺee, a dāa tàntī a-ŋalii, ní ubɔ ń gbìn̄-si dambala, ní kí cáá-si kí cùnnì laakin aa bàà là kí cùee.» 19 Yeesu nìn sòon̄ an bɔti kí dàkà Peetroo ŋkúm min u làá dāá kpú kí tīī Unimbɔti tinyoolee. U lī míǹ ki dóòyee, ní ki bí yii: «Nín̄ nóó-mi!»

Yeesu nì uboonnool un u nìn néeńee

20 Peetroo fātèe, ki ká uboonnool un Yeesu néeńee di dòoń bi-boonee. Úǹ di sá un, bi nìn bíi jīǹ tijin u sútì ki nákáǹ Yeesu, ki bālifì-u yii: «Ti-Dindaan, ŋma di làá dū-si kí tīī a-nannanliibee?» 21 Peetroo ká-uee, ní ki bālifì Yeesu yii: «Ti-Dindaan, tilati di làá bàń unee úǹ ní?» 22 Ní Yeesu kíí-u yii: «M yaa là ú nīn bí kí nīn cí m-gítintam, tíǹ kaa ká-si. Sii dee, nóó-mi!» 23 An nyɔɔbundi pu ní nnabiyaamu kíǹ ki lì yii uboonnoolee úǹ kaa làá ti kpú. Ama Yeesu kaa nìn lī yii uboonnoolee kaa làá kpú. Tin tin u nìn lēe di sá yii: «M yaa là ú nīn bí kí nīn cí m-gítintam, tíǹ ká-si la?»

Tibɔkuntikaal

24 Uboonnool gbanti di ŋmàn̄ tibɔti nee, ní ti nyí yii tin kɔkɔwoooo u sòon̄ Yeesu puee sá ibaamɔn^c.

25 Yeesu gíti túń atuun tikpil. Bi yaa bàà làá ŋmà u-tuuŋŋi ŋin u túńee diba diba, maa pàkā yii duulinya bàà ŋūǹ tigbɔn gbanti kɔkɔ^d.