Yoowaneesi 19

1 Niinee ní Piilati dū Yeesu ki tīī bí gbá-u anaalab. 2 Soojab nìn dū ikuŋkum ki lùn̄ kibeefuulii ki dūu cíkiǹ Yeesu, ní ki dū dibɔkutil diba dì máǹ cínciŋ^a ki dūu pēeǹ-u. 3 Ní bi sútíi kɔ́l̀-u, ní ki lì yii: «Juuda yab bɔtiu, ti jáaḿ-si!» ní ki fátí-u.

4 Ní Piilati fātìi tí nyánní, ní ki bí Juuda yab yii: «Kpèèmaan, m làá nyāntiń-ni-u mmɔŋki, ní béé yii man kaa ká kun pu ní kijapaai nee máaǹ ditafadaaldee.» 5 Ní Yeesu nyáń ki cíkí ikuŋkum fuuliiki ki pēē dibɔkutimandi cínciŋ, ní Piilati bí-bi yii: «Kpèèmaan unil!» 6 Bisaraaŋakpilib nì bi-pilisibee nín pée ká-uee, ní bi bíi tátí yii: «Bí kpáá-u ndɔpuntikaa pu! Bí kpáá-u ndɔpuntikaa pu!» Ní Piilati bí-bi yii: «Yòom̄maan-u kí cùú kpáá-u nimbi ni-ba ndɔpuntikaa pu, kun puee man kaa ká kun ní u ŋá ki máaǹ ditafadaaldee!» 7 Ní Juuda yab kíí-u yii: «Timbi marau poonee, u máaǹ ŋkúm, kun puee u bí yii u sá Unimbɔti Jipɔɔn^b.» 8 Piilati gbìl̄ mimmee, ní tifaandi mɔ̄tìi gíti kɔ́-u, 9 ní u nín kóò kudiin, ki bālifì Yeesu yii: «A baasii nyánní la ní?» Ní Yeesu kaa kíí-u báà tiba. 10 Ní Piilati bí-u yii: «Man ní saa làá kííii? Aa nyí yii m cáá mpɔn kí gíiǹ-si kí líí, ki cáá mpɔn kí yàntī bí kpáá-si ndɔpuntikaa puɔɔɔ?» 11 Ní Yeesu kíí-u yii: «Aa cáá mpɔn ŋubɔ ki kútì ŋun Unimbɔti tīiń-si yilpuee. Míǹ pu ní un dū-mi ki ŋúbíǹ-see kpitii wīikíǹ sii yai.»

12 Ki yōoǹ ŋyunti gbanti ní Piilati bíi nyàab̀ kí gíiǹ Yeesu kí líí. Ama ní Juuda yab bíi kūuntí ki lì yii: «A yaa gíiǹ kijapaai nee ki líìyee, aa ti sá gɔmina Seesaar bɔɔ! Un kamaa yaa yíì u-ba ubɔtee di sá Seesaar pulincɔnti.» 13 Piilati gbìl̄ mimmee, ní ki nyántìń Yeesu mmɔŋki ki dɔ́miń ki kāl̀ dibɔsoonjal pu laakin bi yíì ataŋkpee paaŋŋuee, (eebru sooŋyin bi yíì Gabata). 14 An nìn sá kuwiŋkuluu nyɔkɔm ní kutaa ń wúntí Dilákatil jiŋaaliu. Ní u lī Juuda yab yii: «Kpèèmaan, ni-bɔtiu sèé!» 15 Ní bi bíi tátí yii: «Bí kpɔ̀-u, bí kpɔ̀-u, bí kpáá-u ndɔpuntikaa pu!» Ní Piilati bí-bi yii: «Mimmee, ḿ yàntī bí kpáá ni-bɔtiu ndɔpuntikaa puɔɔɔ?» Ní bisaraaŋakpilib kíí-u yii: «Timbi kaa ti cáá ubɔti ubɔ ki kútì Seesaar pu.» 16 Niinee ní Piilati dū Yeesu ki tīī-bi bí cáá-u kí kpáá ndɔpuntikaa pu.

Bi kpáá Yeesu ndɔpuntikaa pu

(Kpèè Maat 27.32-44, Maar 15.21-32, Luuki 23.26-43)

Niinee ní bi cáá Yeesu ki búntì. 17 Ní Yeesu yōoǹ u-dɔpuntikaaŋu ki nyánní kitiŋin ki nín cá laakin bi yíì Kuyikpabiku laŋkee, (eebru sooŋyin bi yíì Gɔlgɔta.) 18 Niin ní soojab kpáá Yeesu ndɔpuntikaa pu, ní ki gíti kpáá binib bili ki ŋàl̄-u, ubɔ u-ŋaŋgiil pú, un kíǹee u-ŋaŋgan pú ní úǹ sáká kansikin. 19 Piilati nìn ŋmàn̄ tiŋmaŋmabiti ki tīī bí cáá nákań Yeesu dɔpuntikaaŋu pu. U nìn ŋmàn̄ yii: «Yeesu Naasaareeti yɔu, un sá Juuda yab bɔtiuee.» 20 Juuda yab tikpil nìn kàan̄ tiŋmaŋmabiti gbanti, kun puee laakin bi nìn kpáá Yeesuee nìn pìlīǹ kitiŋin, ní bi nìn ŋmàn̄ eebru sooŋyin ki ŋmàn̄ Room sooŋyin ní ki ŋmàn̄ greeki sooŋyin. 21 Ní Juuda yab saraaŋakpilib bí Piilati yii: «Taa ŋmà yii: <Un sá Juuda yab bɔtiuee>, ŋmà yii: <Uninja nee bí yii úǹ di sá Juuda yab bɔtiu.>» 22 Ní Piilati kíí-bi yii: «Tin tin m ŋmàn̄ee, tíǹ dee.»

23 Bijanjaliibi bin nìn kpáá Yeesu ndɔpuntikaa puee nìn pēetì-u ki yōoǹ u-wampeeŋkaati ki yākatì minaa pu, bi-kɔkɔ yōoǹ diba diba pu. An kíǹ dibɔkutifɔkɔl ^c din bi nìn lùn̄ dicilpu, kaa ŋáĺ ki kpáfì kpáfèe. 24 Ní soojabee bíi lì tɔb yii: «Tí taa cátí dibɔkutil gbanti, tí tɔ̄maan kasi kí kpèè ŋma di làá jī díǹ.» Ní bi lafun ŋá míǹ. Min bi ŋá nee nóó nì Unimbɔti bɔti nín nìn sòon̄ ki síiǹ puee, yii:

«Bi dū m-wampeeŋkaati ki yākatì,

ní ki tɔ́ kasi m-bɔkutifɔkɔl pu^d.»

Soojab nín nìn ŋá puee dee.

25 Yeesu na nì Yeesu nawaa, nì Maarii Kloopasi nimpuu nì Maarii un sá Magidalaa tiŋkinee di nìn sí ki kɔ́ĺ Yeesu dɔpuntikaaŋu. 26 Yeesu ká u-na nì u-boonnooliu un u néeńee yú ki kɔ́ĺ tɔb, ní u bí u-na yii: «M-na, kpèè a-jipɔɔn sèé», 27 ní ki bí u-boonnooliuee mun yii: «Kpèè, a-na sèé.» Ki yōoǹ ŋyunti gbantee ní u-boonnooliuee yōoǹ-u u kíǹ ki bí u-cee.

Yeesu kúm

(Kpèè Maat 27.45-56, Maar 15.33-41, Luuki 23.44-49)

28 Míǹ boonee, Yeesu ká yii kɔŋkɔnnee tikɔkɔ dóòyee, ní u bí yii: «Nnyinnyoo cáá-mi.» An ŋá kii Unimbɔti gbɔŋku nín nìn pée sòon̄ ki síiǹ puee dee^e. 29 Dibool diba nìn yú niin, ndamam min gàm̀ee kā poon, ní bi dū kuca ki bɔ́ ndaamee poon^f ní ki dūu túuń isɔpi kpaŋkpaaŋŋu pu, ní ki cáa gbēē Yeesu nyɔkɔ. 30 Yeesu nyùn̄ee ní ki bí yii: «Tikɔkɔ dóò», ní ki tīntì u-yil ní ki dū u-fam ki tīī ki kpíì.

Bi dū kikpaŋ ki sāā Yeesu tikindi

31 Ŋwìiń bíi jēetí ŋwiŋŋuŋfikaa ń kíĺee, Juuda yab kpilib kaa nìn là bin bi kpááyee wunti ń nīn lúń idɔpuntikaa pu ŋwiin gbanti. Ŋwiŋŋuŋfikaa gbanti nìn sá ŋwiŋkpaan ní, míǹ pu ní bi nìn mēē Piilati yii bí kɔ̄fì bi-taaŋi bí kpú malaa^g, bí cúú-bi kí kpáatí. 32 Niinee soojab dɔ́miń ki kɔ́fì bin bin bi nìn kpáá idɔpuntikaa pu nì Yeesu dicilpuee upeepeekaa nì uliliiti taaŋi. 33 Bi bāań Yeesuee, ní ki ká yii u kpíì dooooyee, míǹ pu ní baa ti kɔ́fì úǹ taaŋi. 34 Ama ní sooja ubɔ bi-kansikin dū kikpaŋ ki sāā u-tikindi, ní fatiku nì nnyim nyáń. 35 Un bíi lèekī seera tibɔti nee puee baasii ká-tì ní, ní u-seerauee sá ibaamɔn, ní u nyí yii tin u sòoǹee sá ibaamɔn, ni mun ń ŋmā kí fōō kí kíí. 36 Tin bí nee ŋá míǹ, án ŋmā kí nóó nì Unimbɔti gbɔŋku nín nìn lī ki síiǹ puee, yii: «Baa làá wīī u-kpabil báà diba^h.» 37 Laaba mun gíti lī yii: «Bi làá dāá ká un tikindi bi sāā ki cíl̀eeⁱ.»

Bi síb́ Yeesu

38 Míǹ boonee, Jooseefi un sá Arimatee^j tiŋkinee, cūtì ki mēē Piilati nsan kí yòon̄ Yeesu wunti. - Jooseefi gbanti nìn sá Yeesu boonnooliu ní kaa là binib ń béé, kun puee u nìn fàŋkí Juuda yab. - Ní Piilati pú-u nsan, ní u cūtìi yōoǹ Yeesu wunti. 39 Niikoodeem un nìn cūtì dalba kunyeeu ki ká Yeesuee mun dɔ́miń, ki cáań tikaliŋkpun tin bi yíì miiree, tì ŋmàl̄ nì talaalu un bi yíì Alooweesi kiiloobi mmuŋku nì saalaa nyɔkɔm. 40 Bi yōoǹ Yeesu wunti mimmee, ní ki dū iŋaabu ki fìn̄-u ki dū talaalubee ki yāaǹ u-pu, kii Juuda yab koobiliŋ nín bàlifī bi yaa làá síb́ unil bí ŋá puee. 41 Laakin bi nìn kpáá Yeesuee, bukpaa bubɔ nìn bí niin. Bu-poon ní dikaakupɔndi din ni baa láá síb́ báà ubɔee nìn bí. 42 Niin ní bi nìn cáá Yeesu ki síb́ kun puee án nìn sá kutaa ń wúntí Juuda yab wiŋŋuŋfikaaŋuaa, ní dikaakulee mun nìn pìl̄ niin.